Read Ngaju 1 KORINTUS 9 Bible Online

1 KORINTUS 9 - Ngaju bible

1 KORINTUS 9

¹En aku toh dia oloh bebas? En aku toh dia rasul? En aku toh hindai puji mite Yesus, Tuhan itah? En keton toh dia hasil gawingku akan Tuhan?

²Paribasa kare oloh beken dia handak mangaku aku kilau rasul, paling dia, keton je mangaku jete! Basa pambelom keton kilau oloh Kristen jete buktie je aku toh rasul.

³Amon oloh manyalan aku, aku tau tombah kalotoh:

⁴En aku jaton hak manarima panginan tuntang taloh ihop bara gawingku?

⁵En aku jaton hak mimbit ije biti kabalingku oloh Kristen haya-hayak dengangku huang panjalanangku, kilau je iawi kare paharin Tuhan Yesus tuntang kare rasul beken, tatamput kea Petrus?

⁶Atawa baya Barnabas tuntang aku bewei je musti manggau taloh kinan kabuat?

⁷Jaton tantara je musti maongkos arepe kabuat huang angkatan perang! Jaton kea oloh pamalan je mimbul anggor intu kabon ayue palus dia kuman hasil anggor bara kabon te! Jaton kea sakatik je mahaga tabiri palus dia mihop susu bara kare tabiri te!

⁸Aku mansanan jete dia awi ganan kebiasaan je ingkeme genep andau, tapi awi Surat Barasih mansanan hal te kea.

⁹ Intu Surat Moses tarasurat, “Sapi je ihapan mihik gandom, nyamae ela imbangus.” En taloh je inantuani Hatalla te sapi?

¹⁰Atawa jete kilau tanding akan itah? Puna jete inyurat akan itah. Basa oloh je manggawi tana tuntang oloh je marasih gandome puna buah ih ie bagawi sambil maharap uka manarima bagi bara hasil gawie.

¹¹ Ikei jari manawor binyi roh huang pambelom keton. Maka amon ikei manggetem kare berkat ramon kalunen bara keton, en jete rimae ikei manuntut lalau karee bara keton?

¹²Amon kare oloh beken aton hak maharap jete bara keton, en hak ikei dia labih hindai bara ewen te? Tapi aku hindai mangguna hak te. Katambalike aku labih rajin mananggong kare taloh handiai bara aku mampalembut taloh je mahambang Barita Bahalap inyiar tahiu Kristus.

¹³ Pahari batantu katawan tahiu oloh je bagawi intu huang Human Hatalla manarima panginan ewen bara Human Hatalla. Tuntang kare oloh je maurus eka maluput parapah mandino bagi parapah je inyarah intu hete.

¹⁴ Kalote kea Tuhan jari manukas iete oloh je mambarita Barita Bahalap te musti mandino taloh kinae bara gawie mambarita te.

¹⁵Tapi ije mahin hindai puji aku mahapan bara kare hak te. Tuntang aku manyurat jetoh dia kea awi aku handak mangat kare hal te ilalus metoh toh kea akangku. Labih bahalap aku matei bara aku nihau taloh je eka kahanjakku te.

¹⁶Basa, amon jete baya mambarita Barita Bahalap bara Hatalla, maka aku jaton hak tau tama-tamam, awi Hatalla jari marentah aku uka malaluse. Maka calaka aku, amon aku dia mambarita Barita Bahalap te!

¹⁷Paribasa aku malalus gawi te awi kanahuang ayungku kabuat, maka aku tau maharap mangat mandino upah. Tapi aku mambarita Barita Bahalap te puna awi aku inyoho. Aku inyoho awi Hatalla uka malalus jete.

¹⁸Amon kalote, en upahku? Upahku iete: aku tau mambarita Barita Bahalap te hayak jaton mambehat ije biti oloh kea, awi aku dia manuntut kare hak ayungku kilau pambarita Barita Bahalap te.

¹⁹Aku toh dia jipen eweh bewei; aku bebas. Aloh kalote, aku jari manjadian arepku toh jipen kare oloh handiai. Aku malalus jete mangat aku tau mimbit sapire karee oloh je olihku dinoe akan Kristus.

²⁰Akan oloh Yehudi, aku mawi arepku kilau oloh Yehudi, mangat aku tau dinon oloh Yehudi akan Kristus. Taharep kare oloh je belom manumon hukum Moses, aku mawi arepku kilau jaka aku heret dengan hukum te, aloh aku sapunae dia leket dengan hukum te. Aku malalus jete mangat aku tau manjijit ewen manjadi oloh ain Kristus.

²¹Taharep oloh je dia Yehudi, aku mawi arepku kilau ije biti oloh je dia Yehudi, je belom intu luar hukum Moses. Aku malalus jete mangat aku tau manjijit ewen manjadi oloh ain Kristus. Tapi jete dia baarti aku dia taat dengan kare parentah Hatalla; sapunae aku inguasa awi kare parentah Kristus.

²²Hong marak kare oloh je kapercayae dia dehen, aku mahin mawi arepku kilau ije biti oloh je kapercayae dia dehen mangat aku tau manjijit ewen manjadi oloh ain Kristus. Jadi, hapan auh pandak, aku manjadi kilau oloh handiai akan oloh handiai mangat hapan jalan je kilen ampie kea aku tau manyalamat belahe ewen te.

²³Uras jete ilalusku akan Barita Bahalap bara Hatalla te, mangat aku kea tau tamput dinon berkat.

²⁴Pahari batantu katawan amon oloh hasalanja hadari maka oloh uras omba hadari, tapi baya ije biti ih je dinon hadiah. Tagal te keleh hadari kalote sampai pahari dinon hadiah.

²⁵Genep oloh je metoh huang latihan, manyarenan kanahuange bara taloh handiai. Ie malalus jete awi ie handak uka ie inyaling oloh hapan kambang kamanang, iete kambang je bajeleng akan balayu. Tapi itah toh manahan arep huang kare taloh handiai awi itah handak inyaling hapan rantai kambang je dia akan balayu.

²⁶Jete bukue aku hadari manintu taloh je batantu. Kilau huang pertandingan tinju, aku dia manampar barangai ampie.

²⁷Aku manalua bitingku imukul manyangit sampai aku olih manyarenae. Aku puna mawie kalote, awi aku dia hakon amon kajariae kareh aku je jari mimbit oloh beken huang pertandingan te, salenga aku kabuat je dia inarima.