Read Ngaju 2 KORINTUS 1 Bible Online

2 KORINTUS 1 - Ngaju bible

2 KORINTUS 1

¹ Pahari handiai ungkup Hatalla hong Korintus tuntang hapus jalahan ain Hatalla hong salepah lewu Akhaya. Aku, Paulus, rasul Kristus Yesus, je iangkat awi kanahuang Hatalla, haya-hayak dengan paharin itah Timoteus,

²maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton.

³Tara akan Hatalla, Bapa Tuhan itah Yesus Kristus. Ie Bapa je paham kahalap ateie tuntang ie Hatalla je mandehen pambelom hambaruan oloh kalunen.

⁴Ie mandehen atei-huang ikei hong gagenep kapehe je ingkeme ikei, uka hapan kaabas je inarima ikei bara Hatalla te, ikei kea tau mandehen atei-huang oloh handiai je buah kasusah.

⁵Kare kapehe je ingkeme Kristus jari are ingkeme ikei kea. Tuntang mahalau Kristus kea, atei-huang ikei paham indehen.

⁶Amon ikei mangkeme kasusah, jete akan hapan mampaabas atei-huang keton, akan kasalamat keton. Amon atei-huang ikei impaabas, maka keton kea omba impaabas sampai keton manjadi tahan manaharep kare kasusah-kapehe kilau je ingkeme ikei kea.

⁷Ikei harajur percaya tuntang dia puji bembang tahiu pahari, awi ikei katawan keton omba mangkeme kapehe je ingkeme ikei. Tuntang tagal te keton omba kea impaabas haya-hayak dengan ikei.

⁸ Pahari handiai! Ikei handak uka keton katawan tahiu kasusah-kapehe je ingkeme ikei hong Asia. Kasusah-kapehe je inanggong ikei te mahenyek ikei lalau babehat, sampai ikei dia maharap akan belom hindai;

⁹angate sama kilau jari buah hukum matei ih. Tapi hal te manjadi, mangat ikei ela bahapang dengan kaabas arep ikei kabuat, tapi dengan Hatalla je mambelom oloh matei.

¹⁰Ie te je jari manyalamat ikei bara bahaya pampatei je hai[1] te. Tuntang ie te kea je kareh manyalamat ikei hong kare andau rahian, awi puna dengae ikei harap.

¹¹Ikei percaya iete hapan kare lakudoan keton akan ikei, Hatalla kareh manyalamat ikei tinai bara bahaya. Hatalla pahias mamberkat ikei kilau baleh tagal kare lakudoa akan ikei, tuntang tagal te are oloh kareh manyewut tarimakasih akan Hatalla.

¹²Ikei mangkeme hanjak, awi atei-huang ikei mawi ikei percaya tahiu pambelom ikei huang kalunen toh — je mambatang hubungan ikei dengan pahari — jari ilalus ikei dengan kabujur[2] tuntang karasih atei. Ikei malalus jete, dia mahapan kapintar-kaharatin olon, tapi hapan kaolih je inenga Hatalla akan ikei.

¹³Taloh je inyurat ikei akan keton jete baya tahiu kare taloh je tau keton mambasae tuntang haratie. Metoh toh keton hindai olih lepa-lepah harati auh ikei, tapi kareh aku harap keton akan toto-toto harati auh ikei. Awi kalote, hong katika Tuhan Yesus dumah kareh, keton mangkeme andal tagal ikei, kilau ikei kea andal angat ikei tagal keton.

¹⁵Tagal kapercaya jete maka aku sola-solake marancana uka maja manalih keton mangat keton mandino berkat due kali lipet.

¹⁶ Aku aton kanahuangku uka manalih keton huang panjalanangku akan Makedonia tuntang tende tinai intu eka keton huang panjalanangku buli, mangat keton tau mandohop aku marajur panjalanangku akan Yudea.

¹⁷Tapi aku jari mobah kanahuangku te; nah, en jete mamparahan ampin katukas ateiku dia segah? Metoh manampa rencana, en aku manampae manumon kanahuang ayungku kabuat, limbah manyewut “Iyoh”, limbah te “Dia” tinai?

¹⁸Tagal aran Hatalla je tau imercaya, janjingku dengan pahari jaton “Iyoh” tuntang “Dia”.

¹⁹ Basa Yesus Kristus, anak Hatalla, je imbarita akan keton awi Silas, Timoteus, tuntang awiku kabuat dia ie oloh je “Iyoh” tuntang “Dia”. Tapi jete kilau auh tombah “Iyoh” bara Hatalla.

²⁰Basa mahalau ie Hatalla jari manyewut “Iyoh” dengan kare janjie handiai. Hagalang auh jete itah manyewut “Amen” akan Hatalla tagal Yesus Kristus. Ikei mawie kalote mangat Hatalla ihormat inara.

²¹Hatalla kabuat ih je mawi itah tau segah huang kahinje dengan Kristus; ie kea je tantai mintih itah akan arepe kabuat.

²²Akan jete Hatalla jari manyegel itah manjadi oloh ayue tuntang manenga Roh ayue huang atei itah kilau jaminan je ie kareh manenga akan itah taloh handiai je injanjie.

²³Hatalla saksi ayungku — basa ie katawan taloh huang ateiku — je aku balang haguet akan Korintus, awi aku dia handak mangapehe atei keton.

²⁴Aku dia mamaksa keton dengan taloh je musti imercaya awi keton, awi keton jari percaya toto dengan Kristus. Aku baya sama-sama bagawi dengan keton mangat keton sanang.