Read Ngaju 2 KORINTUS 10 Bible Online

2 KORINTUS 10 - Ngaju bible

2 KORINTUS 10

¹Toh aku, Paulus, aton taloh je handak insanangku akan keton. Aku toh, manumon koan oloh, balemo amon hataharep dengan keton, tapi bahanyi amon hakangkejau. Nah, tagal kalemo tuntang kahalap atei Kristus,

²aku balaku nyame-nyame ela mawi aku terpaksa kasar dengan keton amon aku dumah kareh. Basa aton tirokku uka manindak tegas kare oloh je manyewut ikei bagawi akan kare kepentingan kalunen.

³Ikei puna magon belom huang kalunen, tapi ikei bagawi dia akan kepentingan kalunen.

⁴Kare sanjata je ihapan ikei huang gawin kalahi toh dia ie sanjata ain kalunen toh, tapi kare sanjata ain Hatalla je bara kuasa. Hapan sanjata te ikei mampahancor kare kubu; ikei manangkis kare perdebatan oloh

⁵tuntang mampalongkang kare kota kasombong je imangun hapan malawan pangatawan tahiu Hatalla. Ikei manawan kare tirok oloh tuntang mawi ewen marup mamenda Kristus.

⁶Tuntang amon keton jari taat hapan salepah atei, ikei tatap uka mahukum oloh handiai je dia taat.

⁷Keleh keton mangatawan keadaan je sabujure. Amon oloh yakin ie te oloh ain Kristus, keleh ie mampingat arepe kabuat tuntang mangatawan je ikei kea oloh ain Kristus sama kilau ie.

⁸Aku dia mahamen amon aku musti labih are mampatamam kuasa je jari inenga Tuhan akan ikei, basa kuasa te inenga akan hapan mampamaju keton tapi dia hapan mampanjato keton.

⁹Aku dia handak keton mangkeme aku mampikeh keton mahapan kare suratku.

¹⁰Oloh hamauh, “Kare surat Paulus te karas tuntang bapangaruh, tapi amon ie kabuat aton intu marak itah, ie balemo tuntang kare auhe jaton rimae en-en!”

¹¹Keleh oloh je kilau te mangatawan amon ikei aton intu bentok keton, gawin ikei pas sama kilau je inyurat ikei huang kare surat ikei.

¹²Batantu kea ikei puna dia bahanyi mananding atawa manyama arep ikei dengan kare oloh je maanggap arepe gantong. Lalehan kahumong ewen! Ewen manampa ukuran kabuat tuntang manilai arep ewen mahapan ukuran te.

¹³Ikei dia kalote. Amon ikei tama-tamam dengan arep ikei, ikei dia malabien bara tikase. Ikei melai hong watas gawi je jari inantu awi Hatalla akan ikei. Tuntang keton kea tame huang watas te.

¹⁴Jadi, metoh ikei manalih keton tuntang mimbit Barita Bahalap tahiu Kristus akan keton, ikei puna dia balua bara watas gawin ikei.

¹⁵Ikei dia manara arep tagal gawin oloh beken je aton intu luar watas je inantu awi Hatalla akan ikei. Tapi ikei tetep huang watas je inantu awi Hatalla akan ikei tuntang maharap keton sasar percaya dengan Kristus, uka ikei tau malalus gawi je labih hai hong marak keton.

¹⁶Awi kalote ikei tau mangabar kea Barita Bahalap te hong kare lewu beken sambil dia usah ikei musti mampatamam arep ikei tagal gawi je jari ilalus hong watas gawin oloh beken.

¹⁷ Huang Surat Barasih tarasurat, “Oloh je handak tama-tamam tagal taloh en-en, keleh ie tama-tamam tagal taloh je jari ilalus awi Tuhan.”

¹⁸Basa oloh je inara jete oloh je inara awi Tuhan, dia ie oloh je manara arepe kabuat.