Read Ngaju 2 KORINTUS 12 Bible Online

2 KORINTUS 12 - Ngaju bible

2 KORINTUS 12

¹Puna jaton kaontonge mawi arep tama-tamam. Tapi aku handak kea mampatamam kare hal je imparahan Hatalla akangku huang auh atawa huang tampayah.

²Aku mangasene oloh Kristen je epat walas nyelo je jari halau inggatang akan eka je pangkagantonge hong sorga. (Aku dia katawan en bitie puna buju-bujur tagatang atawa jete baya ije tampayah — Hatalla ih je katawan.)

³Aku manangkalulie sinde tinai: aku katawan je oloh toh inggatang akan Pirdaus. (Aku dia katawan en bitie buju-bujur tagatang atawa jete baya tampayah — Hatalla ih je katawae.) Hong kanih oloh te mahining kare hal je dia olih ingasene awi oloh tuntang dia kea olon inyoho uka mangotake.

⁵Tahiu oloh je handak impatamamku, dia ie tahiu arepku kabuat. Tahiu bitin ayungku, baya kare hal je mamparahan kalemoku te ih je handak impatamamku.

⁶Jaka aku mipen kea mampatamam taloh en-en, aku dia maku manjadi oloh pangamburau je hakotak bewei; aku handak mansanan taloh je toto. Tapi aku manahan arepku, mangat jaton oloh maanggap aku labih bara kilau je gitae aku malaluse atawa taloh je ihininge aku manyewute.

⁷Tapi mangat aku ela lalau sombong tagal kare taloh je malabien bara helo te, akangku inenga ije macam panyakit hong bitingku je kilau alat ain setan. Panyakit te inenga uka mamukul aku mangat aku dia sombong.

⁸Hantelo kali aku balakudoa akan Tuhan mangat panyakit te induan bara aku.

⁹Tapi Tuhan tombah, “Aku sinta ikau tuntang jete jari sukup akam; basa kuasangku paham hai amon ikau huang kalemo.” Jete sababe aku labih sanang mampatamam kare kalemon ayungku, basa amon aku balemo, maka hong katika te kea aku mangkeme Kristus manganjungen aku hapan kaabase.

¹⁰Jadi aku hanjak dengan kare kalemon ayungku. Aku kea hanjak amon tagal Kristus aku imapa, aku buah kajake, inggoang oloh tuntang aku buah kasusah. Basa metoh aku balemo, maka metoh te kea aku abas.

¹¹Puna toto aku jari mawi arepku sama kilau oloh humong — tapi puna keton je mawi aku kilau te. Manumon kapunae, keton musti manara aku. Basa aloh aku jaton harati taloh en-en, aku samasinde dia kalah manaharep “kare rasul” je labih tamam te!

¹²Kare taloh heran tuntang kare hal je dia puji helo dengan kare gawi hai je jari imparahan huang kasabar akan keton uka mambuktie je aku toh ije biti rasul.

¹³Huang hal en aku kurang manantuani keton amon inanding dengan kare ungkup je beken? Baya ije ih je katawangku iete: aku dia puji manyusah keton uka manenga ongkos akangku. Ampun ih aku tagal kasalangku te!

¹⁴Toh jari kali je kateloe aku manatap arepku uka maja manalih keton. Tuntang aku dia handak manyusah keton, basa taloh je ingahandakku dia ie ramon keton, malengkan bitin keton. Basa dia ie anak korik je musti manggau ongkos akan oloh bakas, tapi oloh bakas te je musti manggau ongkos akan kare anake.

¹⁵Tagal te, dengan sanang atei aku rajin mangorban kare taloh handiai akan keton, malahan bitingku kabuat. Amon kalote ampingku sinta keton, en patut amon keton dia sinta aku?

¹⁶Nah, keton satuju je aku dia puji manyusah keton. Tapi magon aton oloh je manyewut aku toh haliau; awi koae, aku mandino ontong bara keton awiku mamikir keton.

¹⁷Dia mungkin! En mahalau kare oloh je impaitku manalih keton te aku manduan kaontong bara keton?

¹⁸Aku jari manyoho Titus haguet manalih keton, tuntang aku manyoho pahari oloh Kristen je beken te haguet haya-hayak dengae. En Titus manduan kaontong bara keton? Tapi ikei due bagawi dengan tintun kanahuang je sama tuntang mawi taloh hapan kare cara je sama!

¹⁹Tau kea keton mangira ikei katahin toh manggau jalan mambela arep ikei intu taharep keton? Keton sala toto! Hatalla mangatawan taloh handiai je insanan ikei te jete uras tumon kanahuang Kristus. Tuntang taloh handiai je ilalus ikei te jete akan indu kahalap pambelom roh keton.

²⁰Aku mikeh amon aku manalih keton kareh, aku mite keton dia kilau je iharapku, tuntang keton kareh mite aku dia kilau tumon je iharap keton. Ela-ela kareh aton oloh je hakalahi hakahiri, ateie balasut, manirok kepentingan arepe kabuat, hapapa kolae, rajin mahasut, balecak tuntang mangacau.

²¹Aku meles, mikeh kareh amon aku dumah, Hatallangku akan mamparandah aku intu taharep keton, tuntang aku kareh manangis basa bihin, are bara keton je badosa, dia hobah tuntang dia terai malalus kare gawi je harayap, papa tuntang dia patut.