Read Ngaju 2 KORINTUS 13 Bible Online

2 KORINTUS 13 - Ngaju bible

2 KORINTUS 13

¹ Jetoh ie kali je kateloe aku dumah manalih keton. Huang Surat Barasih tarasurat, “Gagenep perkara musti inyaksi awi due atawa telo biti oloh, uka perkara te dehen.”

²Kare oloh je mawi dosa hong katika je jari halau tuntang kakare oloh beken, jari impingatku labih helo katika aku manalih keton hong kali je kaduee. Toh, pandehan aku dengan keton hakangkejau, aku mampingat tinai, amon aku dumah tinai, jaton ije biti bara ewen je lapas bara hukum.

³Maka keton kareh mandino kakare bukti je inggau keton iete Kristus puna toto hakotak mahalau aku. Amon Kristus manindak keton, ie manindak dia lowa-lowah, tapi ie mamparahan kuasan Aie marak keton.

⁴Punae metoh ie inyampalaki, ie belom, tapi toh ie belom awi kuasan Hatalla. Ikei kea balemo hong pambelom ikei je hinje dengan Kristus, tapi amon manaharep keton, ikei kea abas hayak dengan Kristus awi kuasan Hatalla.

⁵Coba keton mariksa arep keton kabuat en keton toto-toto belom tumon kapercaya dengan Kristus! Pasti keton mangatawan je Kristus Yesus aton huang keton! — beken soale amon puna keton dia toto-toto percaya.

⁶Aku harap pahari mangatawan je ikei toh dia ie oloh je jari kalah.

⁷Ikei balakudoa intu Hatalla, keleh ie mandohop keton uka dia mawi taloh sala. Jete dia ie hapan ikei mamparahan je ikei toh puna apik malalus gawi, tapi uka keton malalus taloh je ingahandak Hatalla aloh ampie ikei gagal, dia men ih!

⁸Basa ikei dia tau mawi taloh je hakalawan dengan kabujur; ikei musti manumon taloh je bujur.

⁹Ikei sanang amon ikei balemo, tuntang keton abas. Ikei balakudoa kea mangat keton manjadi tinduh-barasih.

¹⁰Jete sababe aku manyurat surat toh hong katika aku hindai aton hong marak keton. Awi kalote, amon aku dumah kareh, dia usah karas aku manindak keton mahapan kuasa je inenga Hatalla akangku. Kuasa te inenga akan kahalap keton dia akan hapan marusak.

¹¹Kajariae, pahari handiai, keleh keton hanjak, tuntang keleh manggau jalan uka manjadi tinduh-barasih. Tarima kare auh nasehatku. Keleh keton hinje atei tuntang belom hakabuah dengan sama arep. Hatalla je tempon sinta tuntang damai te mampahayak keton samandiai.

¹²Keleh keton hatabe sama arep keton huang kaheret atei kilau oloh Kristen. Hapus ungkup Hatalla mampait tabe akan keton.

¹³Tuhan Yesus Kristus mamberkat keton, Hatalla sinta keton, Roh Hatalla mampahayak keton handiai! Hormat ikei, Paulus