Read Ngaju 2 KORINTUS 2 Bible Online

2 KORINTUS 2 - Ngaju bible

2 KORINTUS 2

¹Tagal te aku jari manduan kaputusan uka dia dumah tinai manalih keton amon baya mawi keton kapehe atei.

²Basa amon aku mangapehe atei keton, eweh hindai je tau mampong aku, beken bara kare oloh te je jari kapehe ateie awiku?

³Jete bukue aku manyurat surat toh akan keton. Aku dia handak manalih keton, palus ingapehe ateiku awi keton padahal keton te je kapunae musti mampahanjak aku. Basa aku yakin amon aku hanjak, maka pahari samandiai hanjak kea.

⁴Aku manyurat akan keton marak ateiku kapehe tuntang babehat hayak mampalua are danum mate. Kanahuangku dia uka keton manjadi kapehe atei, tapi mangat keton mangatawan je aku paham sinta keton.

⁵Amon aton oloh je mawi kapehen atei, maka hal te dia ie mawie akangku, malengkan akan Pahari samandiai atawa akan belahe bara kare pahari. Aku hamauh, “belahe bara kare pahari” awi aku dia handak lalau karas dengae.

⁶Akan oloh je kilau te, hukuman je inenga akae awi tapaare bitin kare pahari, jari sukup.

⁷Toh keton musti mampun ie tuntang manenga kahanjak tinai akae mangat ie dia lalau pehe ateie sampai nihau kaharap.

⁸Tagal te aku balaku, uka keton mamparahan tinai akae je keton toto-toto sinta ie.

⁹Aku manyurat surat toh akan keton hapaku mauji keton en keton handak manumon kare nasehat bara aku.

¹⁰Amon keton mampun oloh je jari mawi kasalan dengan keton maka aku kea mampun oloh te. Basa taloh je jari iampun — amon puna aton taloh je perlu iampun — aku mampun jete intu taharep Kristus akan kahalap keton.

¹¹Aku mawi jete uka setan ela sampet manguasa itah; awi itah katawan kare rencanae.

¹² Hong katika aku sampai intu Troas awiku handak mambarita Barita Bahalap tahiu Kristus, Tuhan jari muap jalan akangku uka bagawi hong eka te.

¹³Tapi aku gogop angatku awi jaton hasondau dengan paharin itah Titus intu hete. Maka aku balaku permisi dengan kare oloh hong eka te palus haguet akan Makedonia.

¹⁴Tapi tarimakasih akan Hatalla! Ie harajur mamimpin itah uka omba barisan kamanang ain Kristus awi ikei belom bulat hinje dengae. Hatalla mahapan ikei mangat barita tahiu Kristus kilau taloh je mangat ewaue nampaur akan hete-hete.

¹⁵Basa ikei toh kilau garo je mangat ewaue, je imapui awi Kristus akan Hatalla. Akan kare oloh je tantai manalih kabinasa, ikei toh kilau ewau taloh je baka matei akan pampatei; tapi akan kare oloh je manintu salamat, ikei toh kilau taloh je mangat ewaue je mimbit pambelom. Nah, eweh je olih malalus gawi toh?

¹⁷Ikei dia sama kilau oloh are je mawi barita bara Hatalla kilau ramon dagang bewei. Kare tintun kahimat ikei barasih, awi ikei inyoho awi Hatalla. Tuntang Hatalla kabuat mite je ikei manyampai barita te kilau kare rewar Kristus.