Read Ngaju 2 KORINTUS 4 Bible Online

2 KORINTUS 4 - Ngaju bible

2 KORINTUS 4

¹Ikei malalus gawi toh tagal asin Hatalla. Jete sababe ikei dia bageto kaharap.

²Ikei dia mahapan kare cara kakaput je mampahawen. Ikei dia nahuang bagawi mahapan tanjaro atawa manambalik auh Hatalla. Ikei bagawi akan Hatalla mahapan atei je barasih manumon kanahuange. Awi te, ikei maharap oloh samandiai marega ikei tumon kahalape intu huang atei ewen.

³Amon Barita Bahalap je imbarita ikei te magon hindai kea oloh haratie, maka kare oloh je akan manalih kabinasa bewei je dia haratie.

⁴Dewa papa je manguasa kalunen toh manutup tirok atei kare oloh je dia percaya te. Ie te je mahambang ewen te mangat ewen dia mite kalawa bara Barita Bahalap te tahiu kahain Kristus, je puna kilau gambar Hatalla.

⁵Barita je inyampai ikei te dia ie barita tahiu arep ikei kabuat. Barita te jete barita tahiu Yesus Kristus; je ie te Tuhan; tuntang ikei toh kare rewar ayue tagal ie.

⁶ Hatalla je hamauh, “Keleh kalawa lembut bara huang kakaput,” Hatalla jete kea je mampalembut kalawa te huang atei itah, mangat tirok atei itah manjadi tarang uka mangasene katarang Hatalla je manyingah baun Kristus.

⁷Tapi panatau roh je bahalap te iimbit ikei huang arep ikei je dia barega toh je inampa bara petak. Awi kalote maka bakarinah kahain kuasa te aton intu Hatalla tuntang dia intu ikei.

⁸Ikei iamok bara hete-hete tapi dia hapit. Ikei bembang, tapi dia bageto kaharap.

⁹Are oloh je manyingi ikei, tapi ikei dia puji miar kabuat. Tuntang aloh ikei kinjap imukul sampai balongkang, tapi ikei dia matei.

¹⁰Harajur ih ikei mangkeme pampatei Kristus hong bitin ikei, uka pambelom ayue kea tau gitan intu bitin ikei.

¹¹Katahin ikei belom, ikei harajur iancam awi pampatei tagal Kristus, mangat awi jete pambelom Yesus kea tau gitan hong bitin ikei je pandehan toh.

¹²Jetoh rimae je intu bitin ikei gawin pampatei kanjerae miar, tapi ikei hanjak awi pambelom kanjerae bagawi hong bitin keton.

¹³ Huang Surat Barasih aton auh toh, “Aku percaya, jete sababe aku hakotak.” Nah, hapan kahias kapercaya je kalote kea, ikei hakotak awi ikei percaya.

¹⁴Ikei percaya Hatalla je jari mambelom Tuhan haluli, handak mambelom ikei kea dengan Yesus, tuntang mimbit keton tuntang ikei manaharep ie.

¹⁵Kare taloh samandiai te uras akan kepentingan keton. Basa sasar are oloh mangkeme asin Hatalla, sasar are kea lakudoa tarimakasih je inyampai akan Hatalla; awi kalote Hatalla ihormat-impahai.

¹⁶Jete sababe ikei dia bageto kaharap. Aloh huang luare ikei sasar rusak ampie, tapi atei-huang ikei manjadi taheta genep andau.

¹⁷Tuntang kasusah je dia sapire toh, je ingkeme ikei pandehan, kareh akan mahasil ije kasanang je dia tarasanan tuntang katatahie akan ikei. Kasanang te kejau kahaie amon inanding dengan kasusah te kabuat.

¹⁸Basa ikei dia baya manampayah bara kare taloh je gitan, tapi taloh je dia gitan. Je gitan te baya tahan hanjulo, tapi je dia gitan te eter sampai katatahie.