Read Ngaju 2 KORINTUS 5 Bible Online

2 KORINTUS 5 - Ngaju bible

2 KORINTUS 5

¹Basa ikei katawan, amon huma — iete biti — je ielai itah hong kalunen toh ingarak, Hatalla kareh manyadia akan itah ije huma huang sorga, je inampa awi Hatalla kabuat tuntang je tahan sampai katatahie.

²Intu huang huma je wayah toh, itah manarahing awi itah taharu toto melai intu human itah je huang sorga te.

³Huma jete iete bitin itah je taheta.

⁴Katahin itah melai intu huang huma je bara kalunen toh, itah manarahing awi tanggongan itah babehat. Dia ie awi itah mipen handak lapas bara bitin itah je bara kalunen toh, tapi awi itah mipen mangkepan biti je bara sorga te, mangat bitin itah je tau matei toh inguasa awi biti je belom.

⁵Je manatap itah akan jete iete Hatalla kabuat, tuntang ie manenga Roh ayue akan itah kilau ije jaminan.

⁶Tagal te atei ikei harajur mangkeme abas. Ikei kilau katawan je katahin ikei melai intu huang bitin ikei toh, ikei kejau bara huma je akan ielai ikei hinje Tuhan.

⁷Awi ikei belom hunjun galang kapercaya dengan Kristus, dia ie hagalang taloh je tau inampayah,

⁸jete bukue atei ikei tanggar. Ikei labih rajin lapas bara bitin ikei toh, mangat tau melai hinje Tuhan.

⁹Tagal te ikei manggau jalan toto-toto uka manyanang atei Tuhan aloh metoh ikei aton intu huang human ikei hetoh, atawa hong kanih.

¹⁰ Basa pasti itah samandiai kareh iimbit manaharep pengadilan Kristus, tuntang genep biti kareh mandino baleh je padan dengan gawie hong kalunen toh — gawi bahalap atawa papa.

¹¹Ikei katawan en rimae mikeh dengan Tuhan; jete sababe ikei manggau jalan mangat oloh tau percaya dengan ikei. Hatalla mangasene ikei sakalepah kandaleme, tuntang aku harap keton mahin mangasene ikei huang atei keton.

¹²Hapan jetoh ikei dia balaku uka keton manara ikei. Ikei baya handak manenga ije galang je bahalap akan keton mangat tau mangkeme hanjak dengan ikei, uka keton katawan kilen ampie keton musti tombah auh kare oloh je manampayah ampin oloh hila luar bewei tapi dia manampayah sipat oloh te.

¹³Amon ampin ikei puna jadi gila, jete awi akan kepentingan Hatalla. Tuntang amon ampin ikei barendeng, jete akan kepentingan keton.

¹⁴Sintan Kristus ih je manguasa ikei; tuntang ikei katawan amon ije biti oloh jari matei akan oloh samandiai, maka jete rimae oloh handiai kea jari matei.

¹⁵Kristus matei akan oloh handiai, mangat kare oloh je belom, dia hindai belom akan arepe kabuat, malengkan akan Kristus je jari matei tuntang imbelom haluli akan kepentingan ewen.

¹⁶Tagal te, ikei dia hindai manilai oloh manumon ukuran olon. Puna ikei puji manilai Kristus bara tampayah olon, tapi toh dia hindai.

¹⁷Oloh je jari hinje dengan Kristus, manjadi oloh je taheta samasinde. Je usang jari jaton hindai — taloh handiai uras manjadi taheta.

¹⁸Taloh handiai te uras inaheta awi Roh Hatalla. Mahalau Kristus Hatalla mangambuah itah haluli dengae, palus manyoho itah uka mimbit oloh beken mangat tau hakabuah kea dengan Hatalla.

¹⁹Ikei mambarita iete mahalau Kristus, Hatalla mangambuah olon dengan bitin Ayue.[4] Hatalla malalus jete sambil jaton manuntut kare kasalan je jari ilalus oloh kalunen intu taharep Ie. Tuntang ikei jari inyoho Hatalla uka mangabar barita te.

²⁰Jadi ikei toh puna kare utusan Kristus. Mahalau ikei Hatalla kabuat je manyampai petehe. Huang aran Kristus ikei balaku nyame-nyame, keleh manyambut gawin lengen Hatalla je olih mimbit keton hakabuah dengae.

²¹Kristus dia badosa, tapi Hatalla mawi ie mananggong dosan itah, mangat itah hakabuah haluli dengan Hatalla awi itah ije dengan Kristus.