Read Ngaju 2 KORINTUS 6 Bible Online

2 KORINTUS 6 - Ngaju bible

2 KORINTUS 6

¹Awi ikei toh bagawi sama-sama dengan Hatalla, maka ikei balaku nyame-nyame ela keton dia marega kahalap atei Hatalla te.

² Huang Surat Barasih Hatalla hamauh, “Hong katika je buah, aku jari mahining ikau, tuntang hong andau salamat, aku jari mandohop ikau.” Ingat bua-buah! Wayah jetoh ie katika je buah te. Katika jetoh ie andaue uka itah inyalamat.

³Ikei jaton mawi taloh en-en je mawi oloh manjadi badosa. Jadi, ije biti mahin jaton oloh je tau manyalan gawin ikei.

⁴Tapi huang kare gawin ikei, ikei mamparahan arep ikei kilau kare jipen Hatalla. Kakare macam kasusah kajake jari inyarenan ikei dengan sabar:

⁵ ikei ingapehe, inamean akan penjara, iamok oloh are; ikei bagawi paham, kinjap dia batiroh tuntang kinjap kea jaton panginan.

⁶Hapan kabujur atei, kapintar-kaharati, sabar tuntang bahalap atei, ikei mamparahan je ikei toh rewar Hatalla. Tuntang kea awi ikei bahapang dengan pandohop Roh Hatalla, tuntang hapan sinta je bujur,

⁷hayak sambil mansanan barita je bara Hatalla, tuntang hapan kuasa bara Hatalla, ikei mamparahan je ikei toh rewar Hatalla. Ikei bahimbing dengan kanahuang Hatalla kilau sanjatan ikei hapan manyarang atawa hapan mangalindong arep.

⁸Ikei ihormat, tapi ihina kea; inara, tuntang imapa kea. Aloh ikei bujur, ikei indawa oloh pananjaro.

⁹Ikei ianggap oloh je dia basewut, tapi oloh handiai mangasene ikei. Ikei inyangka matei, tapi ampie ikei magon belom. Aloh ikei ingapehe, ikei dia matei.

¹⁰Aloh atei ikei ingapehe, tapi ikei harajur hanjak kea. Ampin ikei kilau oloh belom susah, tapi ikei mawi oloh are manjadi tatau. Ampin ikei kilau jaton taloh en-en, tapi sapunae ikei tempon kare taloh handiai.

¹¹Pahari handiai je inyinta hong Korintus! Ikei jari hakotak terus-tarang dengan pahari. Kakare taloh huang atei ikei jari impalua kea.

¹²Atei ikei iuap hai-hai akan keton, baya keton ih je manutup atei keton akan ikei.

¹³Toh keleh aku hakotak kilau dengan kare anak ayungku kabuat. Keleh keton muap atei keton akan ikei.

¹⁴Ela handak pakat dengan tirok sala ain oloh je dia percaya dengan Yesus; jete dia buah. Kueh tau oloh je malalus kanahuang Hatalla hapakat dengan oloh je malawan Hatalla! Dia mungkin kalawa hinje dengan kakaput.

¹⁵Dia mungkin Kristus pakat dengan setan. En kasamae oloh Kristen dengan oloh je dia Kristen?

¹⁶ En hubungan human Hatalla dengan human dewa? Itah toh human Hatalla, iete Hatalla je belom. Hatalla kabuat hamauh, “Aku kareh melai intu bentok ewen, tuntang belom hinje dengan ewen. Aku kareh manjadi Hatallan ewen, tuntang ewen kareh manjadi ungkup ayungku.

¹⁷ Tagal te, keleh malihi kare oloh je dia mangasene Hatalla te, tuntang misah arep keton bara ewen. Ela mawi hubungan samasinde dengan taloh je papa, maka aku kareh manarima keton.

¹⁸ Aku kareh manjadi Bapa keton, tuntang keton kareh manjadi anakku, kalote koan Tuhan je Pangkahai Kuasae.”