Read Ngaju 2 KORINTUS 7 Bible Online

2 KORINTUS 7 - Ngaju bible

2 KORINTUS 7

¹Pahari handiai je inyinta! Kakare janji te uras manintu itah. Awi te keleh itah marasih arep itah bara taloh handiai je mamapa biti tuntang hambaruan itah. Keleh itah mikeh dengan Hatalla mangat itah dengan tinduh-barasih tau belom baya akae bewei.

²Tarima ih ikei huang atei keton. Ikei dia basala dengan eweh bewei, tuntang jaton kea ikei puji mamparugi oloh. Ikei samasinde jaton manduan kaontong bara eweh bewei.

³Aku hamauh kalote dia awiku handak manyalan keton. Basa, sama kilau je jari insanangku bihin, ikei paham sinta keton, tuntang ikei toh kawal keton bara belom sampai matei.

⁴Aku percaya lepah dengan keton. Tuntang aku mangkeme tamam toto dengan keton! Aloh ikei mangkeme are kasusah, ateiku paham iampong tagal keton. Ateiku paham hanjak!

⁵ Katika ikei sampai hong Makedonia, mahin ikei dia sampet malayan kaheka ikei. Bara kare lapak pambelom ikei mandino kasusah; bara pihak beken lembut kalahi, bara huang atei ikei kabuat lembut kikeh.

⁶Tapi tarimakasih, Hatalla harajur mandehen atei oloh je bageto kaharap; ie mampamangat atei ikei dengan pandumah Titus.

⁷Atei ikei iampong dia baya awi Titus dumah, tapi awi ie kea mansanan kilen ampie atei ayue iampong awi keton. Ie mansanan akan ikei je keton taharu toto nahuang hasondau dengangku; je keton manyasal tagal gawin keton bihin tuntang toh pahias mambela aku. Hal te mawi aku labih hanjak hindai.

⁸Aloh suratku mawi atei keton kapehe, aku dia manyasal manyurat surat jete. Punae, katika aku katawan je suratku te mawi keton kapehe atei — aloh kapehen atei keton te baya hanjulo — aku puna manyasal kea.

⁹Tapi toh aku sanang — dia ie awi atei keton pehe, tapi awi kapehen atei keton te mobah hadat keton. Puna Hatalla je mangahandak keton mangkeme kapehen atei je kilau te. Jadi, ikei dia mamparugi keton.

¹⁰Basa kapehen atei je ingahandak awi Hatalla kilau te mimbit kahobah atei je manyalamat. Tuntang oloh dia akan manyasal tagal hal te. Tapi kapehen atei je bara kalunen toh jete kapehe je mimbit pampatei.

¹¹Coba keton manantuani en gunae akan keton bara kapehen atei je hakabuah dengan kanahuang Hatalla! Gunae iete keton toto-toto manggau jalan uka mamparasih taloh je keroh! Keton manjadi oloh je basingi dengan dosa, keton mikeh, keton taharu, keton manjadi oloh je pahias atei, keton pahias mahukum oloh je basala! Hong kakare soal toh keton jari mamparahan je keton dia basala.

¹²Jadi, aloh aku jari manyurat surat te, aku manyurat dia tagal oloh je basala te. Dia kea tagal oloh je buah kapehe awi kasalan te. Aku manyurat surat te uka intu taharep Hatalla, keton mangatawan kabuat kapaham keton manenga perhatian akan ikei.

¹³Jete sababe atei ikei iampong. Tuntang dia baya iampong, labi-labih hindai ikei impahanjak awi mite kahanjak atei Titus; ateie iampong awi pahari handiai.

¹⁴Aku puna jari mampatamam keton dengae. Ontong, keton dia mampahawen aku. Kare taloh je puji aku mansanae akan keton jete uras toto. Kalote kea taloh je impatamam ikei tahiu keton akan Titus ampie toto kea.

¹⁵Toh ie sasar sinta keton, awi ie mingat kilen ampie pahari samandiai handak manumon pimpinan ayue tuntang kilen ampie keton manarima ie dengan hormat tuntang panumon.

¹⁶Aku sanang toto, awi keton tau imercaya huang kakare hal.