Read Ngaju 2 KORINTUS 8 Bible Online

2 KORINTUS 8 - Ngaju bible

2 KORINTUS 8

¹ Pahari handiai, ikei handak mangat keton katawan kea tahiu kilen ampin kahalap Hatalla dengan kare ungkup hong Makedonia.

²Ewen jari iuji hapan kare kasusah je babehat. Tapi marak kare kasusah te, ewen hanjak tuntang manenga sumbangan uka mandohop oloh beken, aloh ewen belom susah toto.

³Aku tau manyewut dengan pasti toto je ewen te manenga manumon kaolih ewen, malahan labih. Marak jaton oloh manyoho ewen,

⁴ewen balaku nyame-nyame dengan ikei amon tau ewen mandohop manenga sumbangan akan ungkup Hatalla hong Yudea.

⁵Ewen manenga kejau kalabiee bara je iharap ikei. Ewen te solake manyarah arepe akan Tuhan, limbah te akan ikei kea, tumon kanahuang Hatalla.

⁶Jete sababe ikei paham mamakat Titus — je manampara gawi toh — mangat ie manontong gawi je bahalap toh hong marak keton kea.

⁷Huang kare-kare hal keton aton kalabien keton: keton labien huang kapercaya, huang mamparahan kare tirok, huang hal pangatawan, huang kare-kare macam gawi, tuntang huang sintan keton dengan ikei.[5] Tagal te, keleh keton kea labien huang gawi je bahalap toh.

⁸Aku dia manyoho jete kilau ije parentah, tapi awiku mansanan kapaham gawin oloh beken mandohop sama arepe, aku kea handak katawan hong kueh sintan keton.

⁹Basa keton mangatawan toto je itah paham inyinta awi Yesus Kristus Tuhan itah. Ie tatau, tapi ie mawi arepe manjadi oloh je belom susah tagal kepentingan keton, uka hapan kasusah Ayue te, keton manjadi tatau.

¹⁰Manumon tirok ayungku, puna buah ih keton mahapus taloh je jari inampara keton nyelo male. Basa keton toh je sola-solake manirok tuntang manampara gawi toh.

¹¹Nah, toh keleh keton manontonge manumon kaolih keton. Keleh keton pahias uka mahapus gawi te, kilau bihin keton pahias marancanae.

¹²Amon keton rajin manenga, maka Hatalla kareh manarima panengan keton te hagalang taloh je aton intu keton, dia ie hagalang taloh je jaton intu keton.

¹³Aku samasinde jaton kanahuangku mado mempas oloh beken bara tanggong jawab, tuntang mambehat keton. Tapi awi keton wayah toh aton huang kasukup, maka puna patut ih keton mandohop huang katapas ewen. Kareh amon keton huang katapas, tuntang ewen ampie saraba sukup, maka ewen kareh mandohop keton. Awi kalote, kadaduee sama-sama indohop.

¹⁵ Huang Surat Barasih tarasurat, “Oloh je are pandinoe, jaton kalabiee, tuntang oloh je isut pandinoe, jaton katapase.”

¹⁶Angat ikei paham manarimakasih akan Hatalla awi ie jari mawi Titus pahias kilau ikei uka mandohop keton!

¹⁷Basa Titus te dia baya rajin manumon palakun ikei, tapi ie kea pahias toto handak mandohop keton sampai hapan kanahuang ayue kabuat ie manukas uka haguet manalih keton.

¹⁸Ikei mampait kea hayak dengae ije biti pahari je paham ihormat hong kare-kare ungkup tagal gawie mambarita Barita Bahalap bara Hatalla.

¹⁹Beken bara te oloh je jari iintih kea tuntang inukas awi kakare ungkup uka mampahayak ikei huang jalanan ikei. Basa ikei handak mawi jalanan uka manyampai sumbangan te, mangat Tuhan impahai tuntang mangat keton mite je ikei rajin mandohop.

²⁰Ikei paham batawat mangat ela aton oloh je manyalan ikei tahiu gawi manyampai sumbangan je paham hai toh.

²¹ Ikei handak malaluse dengan kabujur atei dia baya intu taharep Tuhan, tapi intu taharep olon kea.

²²Haya-hayak dengan Titus tuntang pahari jete, ikei mampait kea ije pahari beken. Ikei jari kinjap mauji ie tuntang ampie ie harajur rajin mandohop. Tuntang toh, ie labih rajin mandohop keton awi ie aton kaharape je hai dengan keton.

²³Tahiu Titus, ie te kawalku bagawi, je bagawi dengangku uka mandohop keton. Tuntang tahiu kadadue pahari te, je haguet hayak ie, ewen te nah oloh je inyoho awi kare ungkup tuntang manjadi oloh andal akan Kristus.

²⁴Ikei maharap keton mamparahan sintan keton dengan ewen, mangat ungkup samandiai katawan je keton sinta ewen tuntang taloh je iandal ikei tahiu keton te puna toto.