Read Ngaju 2 KORINTUS 9 Bible Online

2 KORINTUS 9 - Ngaju bible

2 KORINTUS 9

¹Sapunae dia usah hindai aku manyurat akan keton tahiu bantuan je jari impait akan ungkup Hatalla hong Yudea.

²Aku katawan keton rajin mandohop, tuntang aku jari mansanan angat kahanjakku tahiu keton akan kare oloh hong Makedonia. Aku mansanan akan ewen iete, bara nyelo male kare pahari hong Akhaya jari tatap manenga sumbangan. Tuntang karajin keton jari mangalasot kea angat karajin tapaare bara kare bitin ewen.

³Toh aku manyoho Titus tuntang kadadue pahari te manalih keton mangat taloh je paham iandal ikei tahiu keton ela sampai manjadi taloh je hayang bewei. Jadi keleh keton tatap, awi aku jari mansanan akan ewen je keton jari tatap akan hal te.

⁴Aku mikeh, tau aton kare oloh Makedonia je omba haya-hayak dengangku kareh katika aku manalih keton. Tuntang amon ewen mite keton hindai tatap, bah, mahamen toto ikei kareh, awi ikei jari mansanan ikei percaya toto dengan keton! Tuntang keton kabuat mahin tau mahamen kea.

⁵Awi te aku mangkeme perlu toto manyoho ewen te helo manalih keton, mangat maurus panenga je injanji keton te. Aku mawie kalote mangat kareh amon aku dumah, panengan keton te jari tatap. Awi kalote, maka bakarinah ampin panengan keton je inenga dengan sanang atei, tuntang dia awi imaksa.

⁶Keleh mingat! Oloh je manawor binyi misut-misut kareh manggetem isut kea hasile. Tapi oloh je manawor binyi are-are, kareh mandino are kea hasile.

⁷Gagenep oloh musti manenga dengan kahias ateie. Ela ie manenga awi kanyasale awi imaksa, basa Hatalla masi dengan oloh je manenga dengan sanang ateie.

⁸Hatalla aton kuasae manenga akan keton je hakotoh karee, mangat keton harajur mandino taloh je imerlu keton; malahan keton tau dinon malabien haream karee mangat malalus gawi bahalap tuntang baamal.

⁹ Huang Surat Barasih aton inyurat kalotoh auhe tahiu Hatalla, “Hapan kajentan Aie Ie manenga akan oloh je belom susah; kahalap atei Aie sampai katatahie.”

¹⁰ Hatalla je manatap binyi akan oloh je mimbul tuntang panginan akan itah. Ie kea nahuang manatap tuntang mandahang taloh je inawor keton, mangat hasil kahalap atei keton mandahang kea.

¹¹Awi kalote keton kareh saraba sukup hong kakare hal sampai keton tau harajur manenga hapan kajentan atei. Tuntang kare panengan keton je imbagi ikei, mawi oloh are manarimakasih akan Hatalla.

¹²Basa gawi bahalap je ilalus keton toh dia baya akan manyukup katapas ungkup Hatalla bewei, tapi mawi oloh beken kea manarimakasih akan Hatalla.

¹³Tuntang bara gawi bahalap je imparahan keton te, are oloh Kristen hong Yudea kareh manara Hatalla awi mite kaketep atei keton dengan Barita Bahalap tahiu Kristus je inuntut keton te. Tuntang tinai, ewen manara Hatalla, awi kajentan atei keton je mambagi akan ewen tuntang akan kare oloh beken kea kare taloh je aton intu keton.

¹⁴Ewen kea balakudoa akan keton hapan sinta tuntang asi awi Hatalla paham bahalap atei dengan keton.

¹⁵Keleh keton manarimakasih akan Hatalla tagal panengan Aie je hakotoh te!