Read Ngaju GALATIA 2 Bible Online

GALATIA 2 - Ngaju bible

GALATIA 2

¹ Epatwalas nyelo limbah te, aku haluli akan Yerusalem dengan Barnabas, hayak mimbit Titus kea.

²Aku haguet akan Yerusalem awi Hatalla jari mansanan akangku aku musti haguet. Tuntang huang pumpong je tantai iawi akan te dengan kare pamimpin intu hete, aku manarang Barita Bahalap je imbaritaku akan kare oloh je dia Yehudi. Basa aku dia handak gawingku je bihin tuntang je wayah toh kea, palus hayang.

³Titus, je mampahayak aku, ie te oloh Yunani, tapi ie dia imaksa manumon atoran sunat,

⁴aloh aton kare oloh je manjuju hal te. Ewen te kare oloh je tame taka-takau marak itah tuntang manyamar kilau pahari. Ewen tame suni-suni awie mado manyalidik kabebasan itah je aton awi itah bulat hinje dengan Kristus Yesus. Ewen handak mimbit itah haluli akan ampin itah je solake bihin kilau jipen,

⁵tapi ikei isut mahin dia handak manyarah dengan ewen, awi ikei handak manjaga uka Barita Bahalap te tetep barasih akan keton.

⁶ Aloh kalote, dia aton kare hal je taheta je inuntut bara aku awi kare oloh je ianggap basewut — akangku jaton kabekee en ewen te basewut atawa dia, basa Hatalla dia manampayah ampin oloh.

⁷Tapi kare oloh je ianggap basewut te mangaku Hatalla jari manyoho aku uka mambarita Barita Bahalap akan kare oloh je dia Yehudi, sama kilau Ie jari manyoho Petrus uka mambarita Barita Bahalap te akan oloh Yehudi.

⁸Basa Hatalla je manenga kaolih akan Petrus mangat tau manjadi rasul akan oloh Yehudi, manenga kea kaolih akangku mangat tau manjadi rasul akan oloh je dia Yehudi.

⁹Yakobus, Petrus tuntang Yohanes, je ampie manjadi pamimpin ungkup, mangaku je Hatalla jari manenga akangku gawi je beken ampie toh. Maka ewen hatabe dengan Barnabas tuntang dengangku kilau tanda hasobat. Palus ewen tuntang ikei kea pakat mangat ikei bagawi hong marak kare bangsa je dia Yehudi, tuntang ewen hong marak oloh Yehudi.

¹⁰Baya ije ih palakun ewen dengan ikei iete uka ikei manantuani oloh je belom susah. Tuntang aku puna rajin[3] malalus hal te.

¹¹Katika Petrus dumah hong Antiokhia, aku tara-tarang malawan ie basa cara gawie sala.

¹²Sola-solake ie mondok kuman haya-hayak dengan kare pahari je dia Yehudi. Tapi limbah kare oloh utusan ain Yakobus dumah, ie mangejau arepe bara kare pahari je dia Yehudi tuntang dia maku tinai kuman hayak dengan ewen, awi mikeh dengan kare oloh je mangahandak kakare oloh uras inyunat.

¹³Kare pahari Yehudi awang beken omba kea gawin Petrus je haliau sampai Barnabas mahin buah pangaruh omba gawi je kilau te.

¹⁴Sana aku mite cara gawin ewen te dia cocok dengan katoton Barita Bahalap te, aku hamauh dengan Petrus intu taharep kare oloh je aton hete, “Amon pahari kilau ije biti oloh Yehudi jari belom kilau oloh je dia Yehudi, mbuhen toh pahari handak mamaksa kare oloh beken mangat belom kilau oloh Yehudi?”

¹⁵Punae amon manumon jereh, ikei toh oloh Yehudi tuntang dia ie “oloh je dia Yehudi je badosa”.

¹⁶Aloh kalote ikei katawan oloh tau badamai haluli dengan Hatalla baya awi kapercayae dengan Yesus Kristus, tuntang dia awi ie malalus hukum agama. Ikei kabuat mahin percaya dengan Yesus Kristus, uka ikei badamai dengan Hatalla mahalau kapercayan ikei te, dia awi ikei malalus hukum agama. Basa awi malalus hukum agama, ije mahin jaton oloh tau badamai haluli dengan Hatalla.

¹⁷Ikei manggau jalan uka tau badamai haluli dengan Hatalla mahalau kahinjen pambelom dengan Kristus. Tapi amon limbah malalus taloh te, ampin ikei magon “oloh badosa” kea sama kilau kare oloh je dia Yehudi, en rimae jete? En Kristus te je mawi ikei badosa? Batantu dia!

¹⁸Amon aku nampara tinai mampendeng atoran hukum agama je jari irusakku, maka jete tandae aku jari manjadi oloh je malanggar hukum.

¹⁹Tapi aku jari matei intu taharep hukum agama — impatei awi hukum te kabuat — mangat aku tau belom akan Hatalla. Aku jari inyampalaki hayak Kristus.

²⁰Toh dia ie aku hindai je belom, tapi Kristus je belom huang bitingku. Pambelom jetoh je ingkemeku metoh toh, jete pambelom awi kapercaya dengan Anak Hatalla je sinta aku tuntang je jari manyarah Arepe akangku.

²¹Aku dia manaha gampang asin Hatalla. Amon hubungan oloh dengan Hatalla manjadi bahalap haluli awie malalus hukum agama, jete rimae pampatei Kristus jaton gunae!