Read Ngaju GALATIA 3 Bible Online

GALATIA 3 - Ngaju bible

GALATIA 3

¹Pahari handiai oloh Galatia! Keton humong toto! En keton toh jari kana pangaruh eweh? Pampatei Kristus hong kayu sampalaki jari inarangku tarang toto akan keton!

²Coba sanan akangku ije hal jetoh: En keton jari manarima Roh Hatalla awi keton malalus hukum agama, atawa awi keton mahining Barita Bahalap bara Hatalla tuntang percaya dengan Kristus?

³Mbuhen keton humong kalote? Keton jari nampara pambelom taheta huang Roh Hatalla, toh lalehan keton handak manggoang katinduh-karasih hapan kaabas keton kabuat?

⁴En jaton gunae-kah taloh je jari iawi keton te? Lalehan kajaton gunae!

⁵Hatalla manenga Roh Ayue akan keton tuntang mawi kare taloh heran hong marak keton. En Hatalla mawie kalote awi keton malalus hukum agama atawa awi keton mahining Barita Bahalap te tuntang percaya dengan Kristus?

⁶ Jete sama kilau je tarasurat huang Surat Barasih tahiu Abraham — kalotoh, “Abraham percaya dengan Hatalla, tuntang awi kapercayae te ie inarima awi Hatalla kilau oloh je mampahanjak atei Hatalla.”

⁷ Jadi keleh keton mingat, oloh je puna toto turonan Abraham iete oloh je percaya dengan Hatalla.

⁸ Surat Barasih jari manampayah bara helo je Hatalla nguan kare oloh je dia Yehudi mules haluli manalih Hatalla, asal ewen percaya Dengae. Barita Bahalap te imbarita labih helo akan Abraham hapan janji jetoh, “Mahalau ikau, Hatalla kareh mamberkat hapus ungkup oloh kalunen.”

⁹Awi Abraham percaya maka ie imberkat. Kalote kea oloh handiai je percaya, akan imberkat haya-hayak dengan Abraham.

¹⁰ Kare oloh je bahapang dengan hukum agama, uras belom penda sapa. Basa huang Surat Barasih tarasurat, “Oloh je dia baketep malalus taloh je inyurat huang Surat Hukum Agama, inyapa Hatalla!”

¹¹ Ije biti mahin jaton oloh je bahalap haluli manalih Hatalla awie malalus hukum agama. Hal te jari insanan huang Surat Barasih, “Baya oloh je percaya dengan Hatalla sampai hubungae dengan Hatalla manjadi bahalap haluli, kareh belom!” [4]

¹² Tapi hukum agama dia inggalang awi kapercaya. Huang Surat Barasih tarasurat tahiu oloh je malalus hukum agama, akan belom awi hukum te.

¹³ Tapi Kristus maliwus itah bara sapa ain hukum agama. Ie mawi jete awie manalua Arepe tarasapa tagal itah. Basa huang Surat Barasih tarasurat, “Tarasapa ie je matei inggantung intu tihang kayu.”

¹⁴Kristus malalus jete mangat berkat je injanji akan Abraham inenga kea akan kare oloh je dia Yehudi. Awi kalote itah je percaya dengan Hatalla, mahin tau manarima Roh je injanji Hatalla te.

¹⁵Pahari handiai! Keleh aku mahapan sonto bara pangalaman manda-mandau. Amon oloh manampa ije peteng janji tuntang janji te jadi indehen, maka ije biti mahin jaton oloh tau mambalang janji te, atawa mandahang taloh en-en intu hete.

¹⁶ Kare janjin Hatalla inampa awi Hatalla akan Abraham tuntang akan oloh turonan Abraham. Huang Surat Barasih jaton inyurat, “tuntang akan kare oloh turonan Abraham” je rimae are oloh. Je tarasurat intu hete iete, “tuntang akan oloh turonan ayum”, rimae ije biti bewei, iete Kristus.

¹⁷ Je handak insanangku intu hetoh iete: janjin Hatalla jari inampa tuntang jari dehen bara solake. Hukum agama je inampa epat ratus telo puluh nyelo limbah te jaton tau mambalang jete atawa manganan janjin Hatalla te.

¹⁸ Basa amon panengan Hatalla bahapang dengan hukum agama, maka jete dia ie panenga je injanji Hatalla hindai. Puna awi Hatalla jari manjanji jete dengan Abraham, maka Hatalla manenga jete akae.

¹⁹Amon kalote, akan en hukum agama te inenga? Auh tombahe iete hukum agama te indahang hapa mamparahan kasalan olon. Hukum agama te baya ihapan sampai panumah ije biti turonan Abraham, je insanan huang janjin Hatalla akan Abraham. Hukum agama te inyampai awi kare malekat mahalau ije biti oloh helat.

²⁰Nah, musti aton due baris oloh, harue tau mahapan ije biti oloh helat. Tapi Hatalla dia mahapan ije biti oloh helat, awi Ie kabuat malaluse.[5]

²¹En rimae jete hukum agama hakalawan dengan janjin Hatalla? Batantu dia! Basa amon hukum agama inenga hapa manenga pambelom akan olon, maka olon tau badamai dengan Hatalla mahalau hukum agama.

²²Tapi huang Surat Barasih tarasurat hapus ungkup oloh kalunen melai hong penda kuasan dosa. Tagal te, panenga je injanji hagalang kapercaya dengan Yesus Kristus inenga akan oloh je percaya.

²³Helo bara katika itah percaya dengan Kristus, itah injaga toto-toto awi hukum agama; itah sama kilau ingarambang sampai kapercaya te imparahan.

²⁴Awi kalote, hukum agama manjadi kilau pangawas itah sampai Kristus dumah uka mawi itah badamai haluli dengan Hatalla awi itah percaya dengan Kristus.

²⁵Toh, awi katikae jari sampai akan oloh tau percaya dengan Kristus, maka itah dia tinai irentah awi hukum agama.

²⁶Awi keton percaya dengan Kristus Yesus, maka keton hinje Dengae; tuntang awi keton manjadi anak Hatalla.

²⁷Keton handiai uras jari impandoi huang aran Kristus, jadi keton manarima akan arep keton kare sipat ain Kristus kabuat.

²⁸Huang hal toh maka jaton hindai kabekee oloh Yehudi dengan oloh je dia Yehudi, jipen dengan oloh mardeka, oloh hatue dengan oloh bawi. Pahari handiai uras manjadi ije tagal Kristus.

²⁹ Amon keton oloh ain Kristus, maka keton oloh turonan Abraham. Tuntang keton kareh manarima taloh je injanji Hatalla.