Read Ngaju GALATIA 4 Bible Online

GALATIA 4 - Ngaju bible

GALATIA 4

¹Tapi aku perlu manepas auhku: amon ije ahli waris magon penda umur, musti aton oloh je mangawas ie tuntang maurus kare taloh je mambatang akae sampai ie ombet umure manumon je inukas awi bapae. Ie iawi kilau ije biti jipen, aloh ie sapunae tempon kare ramo te.

³Kalote kea dengan itah: katahin itah hindai sukup kabakas, itah ihajipen awi kare roh je manguasa kalunen jetoh.

⁴Tapi huang katika je buah, Hatalla manyoho Anake akan kalunen. Anake te inakan awi ije biti oloh bawi tuntang belom penda kuasan hukum agama.

⁵ Awi kalote Ie mambebas kare oloh je belom hong penda kuasan hukum agama; mangat itah kea tau manjadi anak Hatalla.

⁶Awi keton toh[6] anak Hatalla, maka Hatalla manyoho Roh Anak Ayue tame akan huang atei pahari tuntang ateiku, iete Roh je mantehau, “Bapa, o Bapaku.”

⁷Jadi, keton dia hindai jipen, tapi anak. Tuntang awi keton toh anak Hatalla, maka Hatalla manenga akan keton kare taloh handiai je inatap Awie akan kare anak Ayue.

⁸Bihin keton dia mangasene Hatalla, jete sababe keton manjadi jipen ain kare kuasa je ianggap kilau hatalla tapi sapunae jete dia ie Hatalla samasinde.

⁹Tapi toh keton mangasene Hatalla, atawa labih buah hindai, Hatalla mangasene keton. Nah, mbuhen keton handak haluli tinai manalih kare roh kalunen jetoh, je balemo tuntang susah? Mbuhen keton handak ihajipen tinai awi kare roh te?

¹⁰Keton mahaga kare andau, kare bulan, tuntang kare nyelo.

¹¹Aku meles angatku ela-ela kare kahekaku akan keton te hayang bewei.

¹²Pahari handiai! Aku balaku toto-toto uka keton manjadi sama kilau aku. Basa aku kea jari manjadi sama kilau keton. Keton jaton malalus taloh je sala intu taharepku.

¹³Batantu keton magon mingat taloh je mawi sabab solake mbuhen aku mangabar Barita Bahalap te akan keton. Sababe iete awi aku buah kahaban.

¹⁴Hong katika te keton jaton mangkeme bajilek dengangku, aloh ampin bitingku kilau ije tingkes hai akan keton. Malahan keton manarima aku sama kilau manambang malekat Hatalla atawa sama kilau manambang Kristus Yesus kabuat.

¹⁵Keton paham hanjak hong katika te. Tapi toh, hong kueh kahanjak te? Aku katawan hong katika te keton pahias mangaruit matan keton kabuat uka manengae akangku, jaka tau keton mawie kalote.

¹⁶En keton wayah toh jari maanggap aku kilau musoh, awi aku mansanan taloh je bujur akan keton?

¹⁷Kare oloh beken te hapan sakalepah angate manggau keton, tapi kare maksud ewen te dia bahalap. Ewen baya handak manggeto hubungan keton dengan ikei, mangat keton omba ewen hapan sakalepah angat atei keton.

¹⁸Puna bahalap mahapan sakalepah atei huang kare hal je bahalap, asal harajur kalote tuntang ela baya amon aku aton hinje dengan keton.

¹⁹O keton, anakku je inyinta! Metoh toh aku kapehe tinai tagal keton. Aku kapehe sama kilau ije biti ibu je kapehe metoh luas. Aku kareh harajur kapehe, amon kare sipat Kristus hindai muhat huang bitin keton!

²⁰Aku mipen toto handak melai hong bentok keton metoh toh, mangat aku tau hakotak dengan keton hapan auh je beken, awi aku jari dia katawan handak malalus en hindai akan keton!

²¹Kare pahari je handak belom hong penda kuasan hukum agama, keleh mahining auhku! Aku handak mambarita akan keton taloh je sapunae tarasurat huang Surat Hukum Moses.

²² Intu hete tarasurat tahiu Abraham aton dinon due anak: ije anake te baindu dengan jipen, tuntang ije biti tinai baindu dengan ije biti oloh mardeka.

²³Anak je baindu dengan jipen, inakan kilau bahut manumon kahandak olon. Tapi anak je indue te oloh mardeka, inakan tagal janjin Hatalla.

²⁴Jetoh tau ihapan kilau paribasa. Due biti oloh bawi te iete paribasa tahiu due janji: janji je solake te asale bara Bukit Sinai — jete Hagar; kare anake inakan kilau jipen.

²⁵Jadi, Hagar te jete Bukit Sinai hong tanah Arab. Jete tanding[7] lewu Yerusalem dengan salepah huange je wayah toh manjadi jipen.

²⁶Tapi Yerusalem je huang sorga te jete Yerusalem je mardeka, tuntang ie te indu itah.

²⁷ Basa huang Surat Barasih tarasurat, “Keleh ikau hanjak o oloh bawi tamanang, je dia puji luas! keleh hanjak tuntang basasurak o keton je dia puji mangkeme kapehen oloh manak! Basa oloh bawi je ilihi banae kareh mandino labih are anak bara oloh bawi je belom hinje banae.”

²⁸Pahari handiai! Keton toh anak Hatalla je inakan tagal janjin Hatalla; keton sama kilau Isaak.

²⁹ Hong katika te anak je inakan manumon kahandak olon, mangapehe anak je inakan awi kahandak Roh Hatalla. Kalote kea wayah toh.

³⁰ Tapi en taloh je inyurat huang Surat Barasih? Intu hete tarasurat kalotoh: “Harak jipen bawi te hayak dengan anake, basa anak bara bawin jipen te dia tau manjadi ahli waris hayak dengan anak ain oloh bawi mardeka te.”

³¹Jadi, Pahari handiai, itah toh dia ie anak bawin jipen; itah toh anak ain bawin oloh mardeka.