Read Ngaju GALATIA 5 Bible Online

GALATIA 5 - Ngaju bible

GALATIA 5

¹Metoh toh itah mardeka, awi Kristus jari mambebas itah! Tagal te imbing dehe-dehen kamardekan keton te, tuntang ela hakon ihajipen tinai.

²Ingat, amon keton balaku inyunat, jete rimae Kristus dia aton gunae hindai akan keton. Je mansanan jetoh iete aku kabuat, Paulus.

³Sinde tinai aku manenga pampingat akan oloh je balaku inyunat, ie musti malalus salepah hukum agama!

⁴Amon keton manggau jalan handak badamai dengan Hatalla mahalau hukum agama, jete rimae hubungan keton dengan Kristus jari bageto. Awi kalote keton belom hong luar bara watas asin Hatalla.

⁵Tapi akan ikei, ikei harap hapan pandohop Roh Hatalla tuntang hagalang kapercayan ikei dengan Kristus, Hatalla mampaolih ikei badamai dengae.

⁶Basa amon itah jari hinje dengan Kristus Yesus, hal manumon atawa dia manumon atoran sunat dia manjadi soal hindai. Je mambatang itah baya percaya dengan Kristus, tuntang jete gitan huang sintan itah dengan oloh beken.

⁷Bihin keton berjuang dengan bahalap! Toh mbuhen keton jaton taat hindai dengan kahandak Hatalla? Eweh je jari malacok keton?

⁸Je mawi jete pasti dia ie Hatalla je jari mantehau keton!

⁹ “Ragi je isut akan mangamer salepah tepong wadai,” koan oloh.

¹⁰Aloh kalote aku magon percaya je keton dia akan mimbing auh oloh beken, awi itah jari ije huang Kristus. Tuntang aku yakin eweh bewei je mangacau tirok keton, kareh ihukum awi Hatalla.

¹¹Tahiu aku, pahari handiai, mbuhen aku harajur ingalahi, awiku magon mambarita je sunat te dia baguna? Awi amon aku mambarita kilau te, maka kahandalem barita sampalaki te jaton mampalembut soal en-en.

¹²Labih bahalap oloh je manderoh tirok keton te langsung ih balua samasinde bara ungkup!

¹³Pahari jari intehau uka manjadi oloh mardeka. Tapi ela mahapan kamardeka te akan malalus taloh je ingahandak keton raju-rajur. Tapi keton musti hasinta tuntang hadohop sama arep keton.

¹⁴ Salepah hukum agama imbulat huang parentah ije toh, “Keleh ikau sinta sama arepm sama kilau ikau sinta arepm kabuat.”

¹⁵Tapi amon keton hakakas-hakaramak, bua-buah keton, kareh keton sama-sama hancor.

¹⁶Maksudku kalotoh: Keleh Roh Hatalla mangagalan keton tuntang ela belom manumon sipat olon.

¹⁷ Basa kahandak olon hakalawan dengan kahandak Roh Hatalla, tuntang kahandak Roh Hatalla hakalawan dengan kahandak olon. Kadaduee te hakalawan, sampai keton jaton tau malalus taloh je ingahandak keton.

¹⁸Tapi amon Roh Hatalla mamimpin keton, maka keton dia inguasa awi hukum agama.

¹⁹Kipen sipat kaolon gitan huang gawi je harayap, papa tuntang jaton patut;

²⁰manyembah dewa tuntang kare kaji lampah; huang kamusoh, hakalahi, kahiri-kabehu, murah balait, tuntang mingat arep kabuat; kapusit tuntang pihak-mamihak,

²¹hayak kahirin atei, barami-rami babusau, pesta-mamesta tuntang kakai tinai. Tagal taloh samandiai te aku mampingat keton toh kilau aku bihin mampingat keton kea, iete oloh je malalus kare hal je kilau te dia tau manjadi anak ungkup ain Hatalla.

²²Tapi kare oloh je imimpin awi Roh Hatalla, iete: Ewen te hasinta sama arepe, ewen hanja-hanjak, ewen mandino kadamai, ewen sabar tuntang ateie ewen sanai, ewen sabar tuntang bahalap budie, ewen buah ampie dengan oloh beken, ewen baketep,

²³ewen randah ateie, tuntang harajur olih mahaga arepe. Dia aton hukum agama je mangahana kare hal je kilau te.

²⁴Kare oloh je jari manjadi oloh ain Kristus Yesus, oloh te jari mampatei sipat kaoloe hayak dengan kare belai tuntang kipee.

²⁵Roh Hatalla jari manenga akan itah pambelom je taheta; tagal te Ie kea je musti manguasa pambelom itah.

²⁶Dia tau itah manjadi bajoho, tuntang mangapehe atei sama arep itah, tuntang hakahiri sama arep.