Read Ngaju GALATIA 6 Bible Online

GALATIA 6 - Ngaju bible

GALATIA 6

¹Pahari handiai! Amon aton oloh je tarasondau mawi dosa, keleh keton, je belom manumon Roh Hatalla, mangagalan oloh te haluli akan jalan je bujur. Tapi keton musti malalus jete hapan kalemo tuntang jaga ela sampai keton kea buah tingkes.

²Keleh keton hadohop sama arep keton meton kare tanggongan, uka[8] tagal te keton mamenda parentah Kristus.

³Amon aton oloh je mangkeme arepe mambatang, padahal dia, oloh te mananjaro arepe kabuat.

⁴Genep biti musti mariksa arepe en hadat ayue te bahalap atawa dia. Amon bahalap, ie tau mangkeme tamam tagal jete. Tapi dia usah ie mambandinge dengan taloh je ilalus awi oloh beken.

⁵Basa genep biti musti meton tanggung jawab ayue kabuat.

⁶Oloh je manarima auh ajar Kristus, keleh ie mambagi dengan gurue kakare taloh bahalap je aton intu ie.

⁷Ela buah tipu. Hatalla dia tau iureh! Taloh je iimbul oloh, jete kea kareh je inggeteme.

⁸Amon oloh mimbul manumon sipat kaolon, ie kareh manggetem pampatei bara sipat jete. Tapi amon ie mimbul manumon pimpinan Roh Hatalla, ie kareh manggetem pambelom je bujur tuntang katatahie bara Roh Hatalla.

⁹Tagal te ela itah peda malalus kare taloh je bahalap; basa amon itah dia terai malalus kare taloh te, rahian jeha itah akan manggetem hasile.

¹⁰Jadi, katahin aton katika akan itah, keleh itah mawi gawi bahalap akan oloh handiai, je mambatang akan kare paharin itah je sama kapercayae.

¹¹Keleh manantuani bua-buah bagian jetoh je inyuratku kabuat hapan hurup je hai-hai.

¹²Kare oloh je handak manggatang arepe hapan kare taloh je gitan, ewen te je manggau akal mamaksa keton manumon atoran sunat. Tapi ewen malalus jete baya uka ewen dia ingapehe awi oloh Yehudi tagal sampalakin Kristus.

¹³Kare oloh je omba manumon atoran sunat mahin dia olihe malalus hukum agama. Tapi ewen mangahandak keton inyunat mangat ewen tau tama-tamam awi keton mamenda atoran te.

¹⁴Tapi aku jaton samasinde mampatamam taloh en-en, beken bara Tuhan itah Yesus Kristus je jari matei intu kayu sampalaki. Basa awi Ie jari matei intu kayu samapalaki te, maka kalunen jaton rimae hindai akangku. Tuntang taharep kalunen jetoh, aku mahin kila-kilau jari matei.

¹⁵Inyunat atawa dia inyunat, jete dia mambatang. Je mambatang iete manjadi oloh je taheta.

¹⁶Akan kare oloh je belom hapan tirok jete, tuntang kalote kea akan hapus ungkup Hatalla, aku maharap Hatalla handak manenga kasanang tuntang Asie.

¹⁷Tuntang tinai, ije biti mahin ela aton oloh je manyusah aku tinai, basa intu bitingku aton kare bukti je aku toh oloh ain Yesus.

¹⁸Keleh Tuhan itah Yesus Kristus harajur mamberkat pahari handiai. Hormat ikei, Paulus