Read Ngaju EPESUS 1 Bible Online

EPESUS 1 - Ngaju bible

EPESUS 1

¹ Ungkup Hatalla hong Epesus,[1] je baketep dengan Kristus Yesus!

²Aku, Paulus, rasul Kristus Yesus tagal kahandak Hatalla, maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton.

³Tara akan Hatalla, Bapa Tuhan itah Yesus Kristus! Ie mamberkat itah hapan kakare berkat roh intu huang sorga, awi itah hinje dengan Kristus.

⁴Helo bara kalunen toh injapa, Hatalla jari mintih itah mahalau Kristus uka itah manjadi oloh Ayue bewei tuntang jaton bara kasalan intu taharep Ie. Awi sintan Hatalla,

⁵maka Ie[2] jari manukas bara helo mahalau Yesus Kristus, Ie handak mangkat itah manjadi anak Ayue kabuat. Tuntang puna jete je handak ilalus Awie.

⁶Tara akan Hatalla je pangkahai, basa mahalau Anake je inyinta Awie Ie paham masi itah.

⁷ Basa, tagal pampatei Kristus itah ilapas awi Hatalla, jete rimae Ie jari mampun itah bara kare dosan itah.

⁸Ie malalus jete awi Ie paham masi itah, tuntang Asie te imparahae lepah akan itah hapan salepah kapintar-kaharati.

⁹Manumon kahandak Ayue kabuat, Hatalla mansanan akan itah rahasia rencanae; Ie jari mamutus rencanae te akan impahapus mahalau Kristus.

¹⁰Rencanae te iete uka kakare taloh handiai, aloh je huang sorga kalote kea je hunjun petak, manjadi ije dengan Kristus kilau kapala. Tuntang hal te akan impajadi lepah awi Hatalla amon katikae jari sampai.

¹¹Hatalla malalus taloh handiai manumon kahandak Ayue tuntang kaputusan Ayue kabuat. Bara solake Ie jari mintih itah awi Ie handak mangat itah manjadi ungkup Ayue awi itah ije dengan Kristus.

¹²Itah je bara solake harap dengan Kristus, keleh itah manara Hatalla tagal kahaie!

¹³Keton mahin jari manjadi ungkup ain Hatalla katika keton mahining peteh Hatalla, iete Barita Bahalap je mimbit salamat akan keton. Keton percaya dengan Yesus Kristus, tagal te Hatalla manenga tanda akan keton manjadi oloh Ayue, iete Roh je injanji Awie.

¹⁴Roh jete manjadi jaminan iete itah akan manarima taloh je jari injanji Hatalla akan ungkup Ayue. Jete mawi itah percaya je Hatalla kareh maliwus ungkup Ayue. Tara akan Hatalla tagal kahaie!

¹⁵Tagal te, bara katika aku mahining keton percaya dengan Tuhan Yesus, tuntang keton sinta dengan hapus ungkup ain Hatalla,

¹⁶aku jaton hakalayan manarimakasih intu Hatalla tahiu keton. Harajur aku manyewut aran keton amon aku balakudoa.

¹⁷Aku balaku mangat Hatalla Tuhan itah Yesus Kristus, Bapa je pangkahai, manenga Roh Ayue akan keton. Roh te kareh tau manjadian keton pintar-harati, tuntang handak mamparahan Hatalla akan keton sampai keton mangasene Ie.

¹⁸Aku balaku uka Hatalla muap tirok keton sampai manjadi balawa; mangat keton harati taloh je tau iharap keton bara Hatalla je mantehau keton. Tinai mangat keton katawan dia lue-luen kare berkat je bahalap je inatap Hatalla akan ungkup Ayue;

¹⁹tuntang dia lue-luen kapaham Hatalla bagawi hapan salepah kuasae huang itah je percaya. Kuasan Hatalla te sama kilau kuasa je jaton tanding-tampengae

²⁰ je ihapan katika Ie mambelom Kristus haluli bara pampatei tuntang manenga Akae pangkat je gantong haliai haya-hayak dengan Hatalla hong sorga.

²¹Pangkat Kristus te kejau kagantonge bara kakare pangkat huang pamarentah, bara kare panguasa, bara kakare pamimpin, bara kakare tuan tuntang eweh bewei je jari mandino pangkat gantong; en ie te oloh je belom wayah toh atawa je belom hong wayah je rahian.

²² Hatalla jari mampakalah kare taloh samandiai te penda kuasan Kristus, tuntang Ie manenga Kristus akan ungkup kilau kapala akan kakare taloh handiai.

²³Ungkup te bitin Kristus, ininduh Awie je maninduh taloh handiai hong kueh bewei.[3]