Read Ngaju EPESUS 2 Bible Online

EPESUS 2 - Ngaju bible

EPESUS 2

¹ Bihin keton matei secara roh awi keton badosa tuntang malanggar kare parentah Hatalla.

²Hong katika te keton manumon ampin hadat kalunen jetoh; rimae keton mamenda kare taloh je mimbing kuasa intu langit iete roh je manguasa atei kare oloh je dia taat dengan Hatalla.

³Bihin itah samandiai kea sama kilau ewen; itah belom manumon hadat itah olon, tuntang malalus taloh je manyanang biti tuntang tirok itah. Hong katika te itah toh oloh je buah kalait Hatalla kea, sama kilau oloh beken.

⁴Tapi dia lue-luen kahain sintan atei Hatalla! Kalote kapahame Ie sinta itah,

⁵sampai hong katika itah magon matei secara roh tagal kare kasalan itah, Ie mambelom itah haluli haya-hayak dengan Kristus. Jadi, baya awi kahalap atei Hatalla, keton inyalamat Awie.

⁶Awi itah hinje dengan Kristus Yesus, Hatalla mambelom itah haluli haya-hayak Dengae, mangat itah marentah kea haya-hayak Dengae huang sorga.

⁷Hatalla malalus hal te mangat hong wayah je rahian, olon tau mite kapaham kahain sintan Hatalla. Sinta te imparahan Hatalla mahalau kahalap ateie dengan itah mahalau Kristus Yesus.

⁸Hatalla sinta keton, jete bukue Ie manyalamat keton awi keton percaya dengan Yesus. Kasalamat keton te dia ie hasil gawin keton kabuat. Jete baya panengan Hatalla. Jadi, ije biti mahin jaton oloh je tau mampatamam arepe tahiu hal te.

¹⁰Itah toh inampa awi Hatalla, tuntang mahalau Kristus Yesus, Hatalla manampa itah uka itah malalus kare taloh je bahalap je jari inatape akan itah.

¹¹Pahari handiai je dia Yehudi! Keleh keton mingat ampin keton bihin: Keton inyewut “oloh je dia inyunat”, awi oloh Yehudi je mangaku arepe inyunat (rimae je jari mandino tanda je inampa olon intu bitin ewen).

¹²Hong katika te keton dia hinje dengan Kristus, keton metoh te oloh luar je dia tame ungkup je iintih Hatalla. Keton dia tame huang peteng janji je inampa Hatalla dengan ungkup Ayue. Keton belom huang kalunen toh jaton huang kaharap tuntang jaton huang Hatalla.

¹³Tapi toh, awi keton jari hinje dengan Kristus Yesus, keton je bihin kejau, jari impatokep awi pampatei Kristus.

¹⁴Basa Kristus kabuat je manjadi pandamai itah. Ie mampahinje kare oloh Yehudi tuntang kare oloh je dia Yehudi manjadi ije bangsa. Dinding pamisah je mahelat ewen, iete kamusoh, jari impahancor awi Kristus awie manyarah Arepe kabuat uka impatei.

¹⁵ Hukum agama Yehudi dengan kare parentah tuntang kare atoran ayue impahapus awi Kristus mangat due bangsa te manjadi ije jalahan oloh taheta, je hinje Dengae. Hapan cara jete Yesus manampa kadamai.

¹⁶ Tagal pampatei Aie hong kayu sampalaki Kristus mampahinje due bangsa te, tuntang mandamai ewen dengan Hatalla, sampai kamusoh ewen te nihau.

¹⁷ Jete bukue Kristus dumah uka mangabar Barita Bahalap tahiu kadamai te akan keton; iete akan keton oloh je dia Yehudi je bihin kejau bara Hatalla, tuntang akan oloh Yehudi je tokep dengan Hatalla.

¹⁸Mahalau Kristus, itah handiai — aloh oloh Yehudi atawa dia Yehudi — tau manokep Bapa awi Roh Hatalla ije te.

¹⁹Awi te, keton dia hindai tatame oloh tamuei atawa oloh luar. Toh keton aton hinje dengan ungkup ain Hatalla. Keton toh anggota keluarga ain Hatalla.

²⁰Keton kea imangun intu hunjun galang je inyimpan awi kare rasul tuntang kare nabi,[4] tuntang Kristus kilau batu je mambatang.

²¹Ie te je manyusun hapus pangun te manjadi Human Hatalla je barasih baya akan Tuhan bewei.

²²Awi keton belom hinje dengan Kristus, keton kea kanjerae imangun hayak dengan kare oloh beken manjadi ije huma akan Hatalla; intu hete Hatalla melai dengan Roh Ayue.