Read Ngaju EPESUS 4 Bible Online

EPESUS 4 - Ngaju bible

EPESUS 4

¹Jete bukue aku — oloh tahanan, je inahan awiku manyang Tuhan — balaku toto-toto dengan keton: keleh keton belom tumon pangkat keton kilau oloh je jari intehau Hatalla.

² Keleh keton harajur randah atei, balemo, tuntang sabar. Parahan sintan keton awi keton mandohop sama arep keton.

³Keleh keton manggau akal toto-toto uka belom huang kadamai mangat mahaga kahinje je injapa awi Roh Hatalla.

⁴Biti baya aton ije, tuntang Roh ije. Kalote kea keton intehau akan ije kaharap jete kea.

⁵Tuhan baya aton ije, kapercaya ije, pampandoi ije,

⁶tuntang ije Hatalla je manjadi Bapa oloh handiai. Ie te Tuhan langit tuntang petak, je bagawi mahalau taloh handiai tuntang bara kuasa huang taloh handiai.

⁷Genep bitin itah manarima ije panenga manumon taloh je inenga Kristus.

⁸ Huang Surat Barasih tarasurat, “Katika Ie mandai akan eka je gantong, Ie mimbit are tawanan; tuntang Ie manenga kare panenga akan olon.”

⁹Nah, amon inyewut “Ie mandai” rimae solake Ie jari mohon sampai akan eka je pangkarandahe hong kalunen toh.[5]

¹⁰Tuntang Ie je jari mohon te, Ie te kea je mandai sampai akan eka je labih gantong haream bara kare langit sampai hapus taloh handiai je injapae basuang dengan panumah Aie.

¹¹Ie kea je “manenga kare panenga akan olon”; akan belahe Ie manenga pangkat rasul, akan je beken pangkat nabi, pangabar Barita Bahalap, pahaga ungkup tuntang kare guru.

¹²Jete ilalus Awie uka ungkup Hatalla uras iharagapan mangat tau manyang Tuhan tuntang manjadi bitin Kristus.

¹³Awi kalote itah handiai manjadi ije huang kapercaya jete kea tuntang kaharati je sama tahiu Anak Hatalla. Tuntang itah manjadi oloh bakas je sasar tinduh-barasih sama kilau Kristus.

¹⁴Maka itah dia manjadi kare anak korik hindai je murah hanyut awi dehes sepsimpan kare ajar ain kare oloh je apik manirok. Ewen mampalayang oloh hapan tanjaron ewen.

¹⁵Dia! Tapi itah musti mamparahan kare taloh je bujur tuntang atei je kontep asi, sampai huang kakare hal itah sasar tahi sasar manjadi tinduh-barasih kilau Kristus, je manjadi kapalan itah.

¹⁶ Penda pimpinan Ayue, kakare anggota biti tau inyusun-iator, tuntang je inontong awi kare sapan tulang kabuat-kabuat. Tuntang amon genep anggota te bagawi manumon kapunae, maka hapus biti te kareh belom manjadi batue tuntang abas mahalau sinta.

¹⁷Awi te tagal aran Tuhan, jetoh taloh je handak insanangku tuntang katukas auhku: ela hindai belom sama kilau oloh je dia mangasene Hatalla, tuntang manirok taloh je mia-mias.

¹⁸Tirok ewen jari kaput. Ewen dia mangasene pambelom je inenga Hatalla, awi ewen samasinde jaton bara pangatawan en-en tahiu Hatalla. Ewen kalote, awi ewen batekang ateie.

¹⁹Ewen jari jaton mangkeme kahawen hindai, sampai ewen manumon kakare kipen ewen, tuntang belom harayap sakahandak ateie.

²⁰Tapi Kristus je kasenan keton, dia kalote!

²¹Keton jari mahining tahiu Ie! Tuntang kilau oloh Ayue, keton jari iajar kea tahiu kare sipat Hatalla je aton intu Ie!

²² Tagal te engkak kaolon je usang tuntang cara belom je usang je irusak awi kare kahandak je mampalayang.

²³Keleh atei tuntang tirok keton inaheta lepa-lepah.

²⁴ Keleh keton belom kilau olon taheta je injapa manumon sonto ain Hatalla; iete sipat je buah, bujur tuntang barasih.

²⁵ Tagal te pahari, ela tinai mananjaro. Keleh keton bujur atei sama arep keton, awi itah handiai sama-sama anggota bitin Kristus.

²⁶ Amon keton balait, ela manaluae sampai kalait te mawi keton badosa. Ela balait hapus andau,

²⁷mangat setan jaton mandino kesempatan.

²⁸Oloh je patuh manakau keleh terai manakau. Tapi ie musti bagawi mangat dinon rajaki dengan bujur-buah tuntang tau mandohop oloh je tapas.

²⁹Amon keton hakotak ela mahapan kare auh je papa. Keleh mahapan auh je mampamangat tuntang manenga pandohop akan oloh beken. Kare auh kilau te akan mimbit kahalap akan kare oloh je mahininge.

³⁰Ela mangapehe atei Roh Hatalla. Keton jari inenga cap hapan Roh, manjadi oloh ain Hatalla. Roh te kea kilau jaminan je Andau Kaliwus te dumah akan keton.

³¹Kanan kare angat kapehen atei, kasingi tuntang kalait. Ela hindai meha-mehang tuntang manyapa. Ela hindai aton angat kasingi atawa pangkeme beken je kilau te.

³² Tapi keleh keton bahalap atei tuntang pamasi sama arep keton, tuntang hampun sama kilau Hatalla kea mampun keton mahalau Kristus.