Read Ngaju EPESUS 5 Bible Online

EPESUS 5 - Ngaju bible

EPESUS 5

¹Keton toh anak Hatalla je inyinta, awi te keton musti manggau jalan uka manumon sonto bara Hatalla.

² Pambelom keton keleh inyuang awi asi, sama kilau Kristus kea masi itah. Ie mangorban bitin Aie akan itah, kilau ije parapah je mangat ewaue tuntang manyanang atei Hatalla.

³Keton toh ungkup ain Hatalla. Awi te, kare gawi je harayap tuntang je dia sanonoh, atawa kabungo dia patut aton intu marak keton. Ela sampai oloh beken tau manampa alasan uka manyewut keton mawi kare taloh je kilau te.

⁴Dia patut kea keton manyewut kare auh je papa, je harayap tuntang je dia pantas. Tapi keleh keton manarimakasih intu Hatalla.

⁵Tampayah bua-buah: oloh je mawi karayap, atawa dia sanonoh, atawa kea kabungo (gawi kilau te sama ih kilau manyembah dewa), oloh te dia tau manjadi anggota ungkup je irentah awi Kristus tuntang Hatalla.

⁶Ela keton buah tanjaro awi kare pander hayang. Basa kare hal te je mampalembut kalait Hatalla dengan kare oloh je dia mamenda Ie.

⁷Jadi, ela keton hapakat samasinde dengan kare oloh je macam te.

⁸Keton kabuat bihin melai huang kakaput. Toh keton manjadi ungkup Tuhan, jadi keton melai huang kalawa. Tagal te keton musti melai huang kalawa.

⁹Basa bara kalawa[6] te lembut kakare macam gawi je bahalap, bujur tuntang tinduh intu tampayah Hatalla.

¹⁰Keleh keton manggau jalan mangat mangasene taloh je manyanang atei Tuhan.

¹¹Ela malalus kare gawi je dia baguna je ilalus awi kare oloh je belom huang kakaput. Tapi keleh keton manampalak kare taloh macam te. (

¹²Basa kare hal je ilalus ewen suni-suni te, mamandere mahin mampahawen.)

¹³Taloh handiai je inyingah huang kalawa, akan gitan tarang.

¹⁴Basa taloh handiai je tau inampayah dengan tarang, jete kalawa.[7] Maka jete sababe oloh manyewut, “Misik, o ikau je batiroh, tuntang hingkat bara pampatei! Kristus kareh balawa paha-pahai hunjun ikau.”

¹⁵Awi te, riksa bua-buah cara keton belom. Ela belom sama kilau oloh humong; keleh belom kilau kare oloh je harati.

¹⁶ Keleh mangguna toto-toto genep katika je aton ain keton, awi wayah toh wayah je papa.

¹⁷Ela humong, tapi keleh manantuani taloh je ingahandak Tuhan.

¹⁸Ela keton babusau awi anggor, basa jete kareh marusak keton. Tapi keleh keton inguasa awi Roh Hatalla.

¹⁹ Keleh keton mahapan kare auh bara Masmur, nyanyi tara tuntang lago nyanyin ungkup huang kare kotak pander keton. Keleh keton mahapan kahanjak atei manyanyi tara akan Tuhan.

²⁰Tahiu taloh en bewei keleh keton manyewut tarimakasih akan Hatalla Bapa, huang aran Yesus Kristus Tuhan itah.

²¹Mangat mahormat Kristus, keleh keton mamenda sama arep keton.

²² Oloh bawi je kawin keleh ie mamenda banae, sama kilau dengan Tuhan.

²³Basa oloh hatue manjadi takolok akan sawae, sama kilau Kristus kea manjadi takolok akan ungkup tuntang Ie kabuat kea Raja Panyalamat akan ungkup je manjadi bitin Ayue.

²⁴Sama kilau ungkup kea tundok dengan Kristus, kalote kea huang kakare hal sawae musti tundok dengan banae.

²⁵ Oloh hatue keleh sinta sawae sama kilau Kristus sinta ungkup Ayue hayak mangorban Arepe akan ungkup te.

²⁶Kristus malalus jete uka Ie tau marasih ungkup te hapan auh Ajare tuntang mahalau danum pampandoi, mangat limbah te Ie tau manyarahe tinai akan Hatalla.

²⁷Tagal kalote Kristus mampendeng ungkup te huang kahai tuntang tinduh intu taharep Aie, jaton cacat atawa kasalae en-en.

²⁸Kalote kea oloh hatue musti sinta sawae sama kilau ie sinta bitin Ayue kabuat. Oloh je sinta sawae rimae ie sinta arepe kabuat. (

²⁹Jaton puji oloh je basingi dengan bitin Ayue kabuat. Tapi ie mahaga tuntang manjagae sama kilau Kristus kea mahaga ungkup Ayue.

³⁰Itah katawan jete, awi itah toh anggota bitin Kristus.)

³¹ Huang Surat Barasih tarasurat, “Awi te ije biti oloh hatue kareh malihi indu-bapae mangat hinje dengan sawae, tuntang ewen due kareh manjadi ije.”

³²Ayat jete aton rimae je handalem. Tuntang aku marima jete huang hubungan Kristus dengan ungkup.

³³Tapi ayat jete aton hubungae kea dengan keton: Keleh genep oloh hatue sinta sawae sama kilau ie sinta arepe kabuat tuntang keleh genep oloh bawi manggau akal uka mahormat banae.