Read Ngaju PILIPPI 1 Bible Online

PILIPPI 1 - Ngaju bible

PILIPPI 1

¹ O pahari ungkup Hatalla samandiai je melai hong Pilippi, tuntang je jari hinje dengan Kristus Yesus. Tuntang kea kare pahari je mamimpin tuntang mandohop ungkup! Aku, Paulus, dengan Timoteus, kare rewar Kristus Yesus,

²maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton.

³Gagenep aku mingat keton, aku manyewut tarimakasih akan Hatalla.

⁴Tuntang gagenep kali aku balakudoa akan pahari samandiai, aku balakudoa dengan sanang atei.

⁵Aku manarimakasih intu Hatalla awi bara andau je solake sampai toh, keton jari mandohop aku mangabar Barita Bahalap ain Hatalla.

⁶Hatalla kabuat je manampara gawi bahalap te akan keton, tuntang aku percaya Ie kareh marajur gawi te sampai kahapuse hong Andau Kristus Yesus dumah haluli.

⁷Puna buah toto akangku awi aton pangkemeku je macam te dengan keton, awi pahari samandiai harajur tokep hong ateiku. Tuntang kea awi keton haya-hayak dengangku omba manarima panenga je inenga Hatalla akangku; aloh metoh toh pandehan aku hong penjara atawa intu katika aku aton intu luar mangat mambela tuntang mandehen auh Barita Bahalap te.

⁸Hatalla katawan aku taharu toto dengan keton awi angat sinta je paham huang Kristus Yesus kabuat.

⁹Jetoh ie lakudoangku akan keton: Keleh keton sasar sinta Hatalla tuntang sinta sama arep keton tuntang harajur mandahang huang pangatawan je bujur tuntang panampayah je harati.

¹⁰Awi kalote keton tau mintih taloh je pangkahalape, tuntang pambelom keton tau barasih bara kasalan atawa bara auh dawa en bewei huang andau Kristus dumah haluli.

¹¹Pambelom keton kareh tau manjadi tatau dengan gawi je puna bahalap toto je baya tau ihasil awi Yesus Kristus kabuat; maka Hatalla kareh impahai tuntang inara.

¹²Aku handak mangat keton mangatawan, kare hal je jari manjadi buah aku te mawi sabab oloh sasar are mahining tuntang percaya dengan Barita Bahalap te.

¹³ Kajariae, uras pangawal istana tuntang kare oloh beken hong lewu toh uras katawan je aku inamean akan huang penjara awi aku manyang Kristus.

¹⁴Awi aku inamean akan penjara, jete mawi sabab oloh Kristen hong lewu toh manjadi labih percaya tinai dengan Tuhan, sampai ewen sasar bahanyi mambarita peteh Hatalla[1] sambil jaton mike-mikeh.

¹⁵Puna aton pire-pire oloh marak ewen je mambarita Kristus awi kahirin ateie tuntang handak hasoal, tapi aton kea oloh je beken mambarita Kristus dengan kahias atei je barasih.

¹⁶Kare oloh toh malalus jete awi ewen sinta Hatalla tuntang sinta aku, basa ewen katawan Hatalla jari manyoho aku mangat mandehen Barita Bahalap te.

¹⁷Tapi aton oloh beken je mambarita tahiu Kristus awi hapan kahandak je dia bahalap; ewen mambarita akan kepentingan arep ewen kabuat. Dengan cara te ewen maharap uka tau mawi aku labih susah hindai huang penjara.

¹⁸Tapi dia en-en ih! Basa aloh kilen ampie kea, taloh je ilalus hapan kahandak je barasih atawa hapan kahandak je sala, aran Kristus mahin imbarita kea; jadi aku hanjak. Tuntang aku tetep mangkeme kalote,

¹⁹basa aku katawan tagal kare lakudoan keton tuntang awi pandohop bara Roh Yesus Kristus, aku kareh iliwus.

²⁰Taloh je ingahandak tuntang iharapku toto iete uka ela samasinde aku gagal huang gawingku. Tapi aku harap uka genep katika, je mambatang toto wayah toh, aku tau menteng salepah bereng tuntang hambaruangku aloh aku belom atawa matei — aran Kristus ininduh-impahai.

²¹Basa akangku, tintun pambelomku baya Kristus bewei! Tuntang matei jete ontong.

²²Tapi amon hapan pambelom hong kalunen toh, aku tau malalus gawi je labih baguna, maka aku dia katawan gawi je kueh je musti iintihku. Aku injijit bara due pihak.

²³Aku mipen toto malihi kalunen toh mangat tau haguet palus melai omba Kristus, basa jete ih je pangkahalape;

²⁴tapi awi baguna akan keton, labih bahalap amon aku melai hong kalunen.

²⁵Aku percaya tahiu hal te. Jete sababe aku katawan aku kareh tetep melai dengan pahari samandiai, mangat tau mandohop keton manjadi sasar sanang huang kapercaya dengan Tuhan.

²⁶Tagal te, amon aku kareh haluli manalih keton, keton je jari hinje dengan Yesus Kristus kareh mandino labih are tinai alasan mangat tau mangkeme anda-andal tagal aku.

²⁷Nah, je mambatang metoh toh iete keton belom hakabuah tumon taloh je inuntut awi Barita Bahalap tahiu Kristus te. Awi kalote, en aku tau hasondau dengan keton atawa dia, aku kareh mahining keton bulat segah tuntang sama-sama berjuang akan ije tujuan bewei tuntang ije kahandak; iete akan kapercaya je hakabuah dengan Barita Bahalap ain Hatalla te.

²⁸Keleh keton harajur bahanyi; ela mikeh manaharep kare oloh je malawan keton. Awi kalote keton kareh tau maninjok baun ewen awie kalah, tuntang keton kareh manang, basa Hatalla kabuat je manenga kamanang akan keton.

²⁹Basa Hatalla jari manyarah panenga akan keton dia baya mangat percaya dengan Kristus, tapi kea uka manyarenan kapehe akan Kristus.

³⁰ Toh keton kea omba dengangku huang perjuangan te; iete je puji keton mite aku memperjuange bara bihin sampai toh, kilau je wayah toh jari ihining keton.