Read Ngaju PILIPPI 2 Bible Online

PILIPPI 2 - Ngaju bible

PILIPPI 2

¹Keton abas, awi keton hinje dengan Kristus. Tuntang keton iampong awi Kristus sinta keton! Keton ingagalan Roh Hatalla,[2] tuntang keton kea sinta sama arep keton tuntang mina sinta akan sama arep keton.

²Nah, coba keton buju-bujur manyanang ateiku hapan kare hal toh: keleh belom hinje huang sinta je sama, hapan tirok je sama tuntang tintun kahandak je sama.

³Ela malalus taloh en-en akan kapentingan arep kabuat, atawa handak mampatamam arep. Tapi keleh keton genep biti dengan randah atei maanggap oloh beken labih bahalap bara arep kabuat.

⁴Keleh manantuani kapentingan oloh beken; ela baya kapentingan arep kabuat.

⁵Keleh atei keton sama kilau Yesus Kristus:

⁶Hong kapunae Ie te sama dengan Hatalla, tapi Ie dia mangkeme kahatallae te musti impertahan Awie.[3]

⁷Tapi Ie malekak taloh handiai te palus manjadi sama kilau ije biti rewar. Ie manjadi sama kilau olon, tuntang ampie belom sama kilau olon.

⁸Ie mamparandah Arepe, tuntang belom kete-ketep dengan Hatalla sampai matei — iete matei hong kayu sampalaki.

⁹Tagal te Hatalla manggatang Ie salepah kagantonge, hayak manenga Akae kuasa je labih hai bara kakare kuasa awang beken.

¹⁰ Maka uka mahormat Yesus, salepah kawan taloh belom hong sorga, tuntang hunjun petak, tuntang je hong penda petak, [4] kareh manyembah Ie.

¹¹Ewen samandiai kareh mangaku Yesus Kristus te Tuhan: awi kalote Hatalla Bapa impahai.

¹²Tagal te, pahari handiai je inyinta, sama kilau keton mamenda aku katika aku aton hong marak keton, maka labi-labih katika toh metoh aku kejau, keleh keton kete-ketep hindai dengangku. Keton jari inyalamat awi Hatalla, jadi keleh tarus manggau jalan mangat kasanang keton manjadi tinduh-barasih. Lalus jete dengan hormat tuntang kaketep dengan Hatalla,

¹³karana Hatalla kabuat je bagawi hong keton mangat keton pahias tuntang mangat olih manyanang atei Hatalla.

¹⁴Lalus kare taloh handiai hayak dia bakotok tuntang dia hakalawan.

¹⁵ Awi kalote keton mamparahan arep keton puna anak Hatalla je jaton bara kasalan, je belom dengan kabujur tuntang bujur atei hong marak oloh papa tuntang badosa. Tuntang hong katika keton manyampai akan ewen barita je mimbit pambelom, keleh keton manjadi oloh je sama kilau kalawa je paha-pahai mampalawa kalunen. Amon keton belom sama kilau te, kareh aton alasan akangku mangkeme tamam tahiu keton hong katika Yesus Kristus dumah haluli. Jete buktie perjuangan ayungku dia hayang tuntang gawingku te aton hasile.

¹⁷Tau kea aku toh kareh impatei tuntang dahangku manjadi parapah je inusoh hunjun taloh je iluput keton akan Hatalla kilau tanda keton puna percaya Dengae. Amon jete puna musti kalote, aku manarimakasih tagal hal te tuntang omba hanjak dengan keton.

¹⁸Kalote kea keleh keton mangkeme hanjak tuntang omba hanjak dengangku.

¹⁹Hapan pandohop Tuhan Yesus, aku percaya tau bajeleng manyoho Timoteus manalih keton, mangat aku tau iampong awi barita tahiu keton.

²⁰Baya Timoteus kabuat ih oloh je sama ateie dengangku, tuntang buju-bujur manirok kasanang keton.

²¹Oloh awang beken te baya maurus kepentingan arepe kabuat ih, dia kepentingan Yesus Kristus.

²²Keton kabuat jari mite buktie Timoteus te puna baguna. Ie jari bagawi paham mampahayak aku uka mambarita Barita Bahalap bara Hatalla. Ikei badue sama kilau bapa dengan anak ih.

²³Tagal te, dia tahi limbah aku mangatawan kilen ampie kajarian perkara ayungku kareh, aku handak mangirim ie manalih keton.

²⁴Hapan pandohop Tuhan, aku percaya aku kabuat mahin dia tahi hindai handak maja keton kea.

²⁵Tahiu paharin itah Epaproditus je ingirim keton uka mandohop aku, aku mangkeme perlu uka manyoho ie haluli manalih keton. Ie jari mampahayak aku huang gawi tuntang perjuangan ayungku.

²⁶Ie taharu toto dengan pahari samandiai, tuntang ie balisah awi keton jari mandino barita ie haban.

²⁷Puna toto ie haban sampai handak matei. Tapi Hatalla masi dengae; tuntang dia baya dengae bewei, tapi dengangku kea, mangat ela aku manjadi labih kapehe atei hindai.

²⁸Jete sababe aku sasar hai hindai kahandakku uka manyoho ie haluli manalih keton, uka keton hanjak tinai amon keton hansondau dengae tuntang ateiku kea manjadi sanang.

²⁹Jadi, keleh tarima ie hapan kakare kasanang atei kilau ije biti pahari je sama kapercayae. Keleh marega oloh handiai sama kilau ie.

³⁰Akan gawin Kristus karenga ih ie matei; ie dia manyayang hambaruae uka mandohop aku tagal aran keton.