Read Ngaju PILIPPI 3 Bible Online

PILIPPI 3 - Ngaju bible

PILIPPI 3

¹Kajariae, paharingku samandiai, keleh keton hanjak awi keton jari hinje dengan Tuhan. Aku dia mangkeme babehat manangkaluli taloh je jari inyuratku akan keton bihin; awi hal te bahalap akan kasalamat keton.

²Keleh bua-buah manaharep kare oloh je malalus kare taloh papa iete kare oloh je patut inyewut ‘aso’. Ewen te hajajuan mangat kare oloh uras inyunat.

³Padahal itah toh oloh je jari manarima sunat je bujur, ewen te dia. Itah manyembah Hatalla ingagalan Roh Hatalla kabuat, tuntang itah manarimakasih awi itah belom hinje dengan Kristus Yesus. Itah dia bahapang dengan kare upacara je gitan hila luar bewei.

⁴Sapunae aku tau ih bahapang dengan kare upacara te. Basa amon aton oloh je mangkeme ie aton alasan uka bahapang dengan upacara je gitan bara hila luar, mahin tinai aku.

⁵ Aku inyunat katika umurku hanya andau. Aku inakan kilau ije biti oloh Israel, bara suku Benyamin; aku oloh Ibrani tulen. Huang hal mamenda kare hukum agama Yehudi, aku toh oloh golongan Parisi.

⁶ Aku malah paham karajingku sampai aku mangapehe ungkup. Amon inilai manumon hukum agama Yehudi, aku toh oloh bahalap je jaton bara kapapa.

⁷Tapi tagal Kristus, maka taloh handiai je bihin ianggapku kilau taloh je manenga kaontong, toh menjadi taloh je mamparugi.

⁸Dia baya kare hal jete; tapi kare taloh handiai mahin ianggapku uras mamparugi ih. Taloh je aton huang aku wayah toh je labih barega: iete mangasene Kristus Yesus, Tuhan ayungku. Tagal Kristus, maka aku jari malekak taloh handiai. Aku maanggap taloh handiai te uras kilau rutik ih, mangat aku tau mandino Kristus,

⁹tuntang toto-toto hinje dengae. Hubungan je bahalap dengan Hatalla dia hindai aku manggaue kabuat mahalau jalan mamenda kare hukum agama. Toh aku aton hubungan je bahalap dengan Hatalla te, awi aku percaya dengan Kristus. Jadi, hubungan je bahalap te panumahe bara Hatalla, tuntang hagalang kapercaya dengan Kristus.

¹⁰Ije ih taloh je ingahandakku iete uka aku mangasene Kristus, tuntang mangkeme kuasa je mambelom Ie bara pampatei. Aku mipen omba buah kapehe Dengae tuntang manjadi sama kilau Ie huang hal pampateie.

¹¹Tuntang aku harap aku kabuat kareh imbelom haluli bara pampatei.

¹²Aku dia manyewut aku jari bahasil, atawa jari manjadi tinduh-barasih. Tapi aku harajur manggoang panenga je inatap awi Kristus Yesus. Akan te kea Ie jari manduan aku tuntang manjadian aku oloh Ayue.

¹³Puna batantu kea, pahari handiai, sapunae aku dia[5] mangkeme aku jari bahasil manduan hadiah te. Tapi aton ije hal je handak iawiku, iete aku mangalapean taloh je hila likutku tuntang manggau jalan toto-toto mangoang taloh je hila baungku.

¹⁴Jete sababe aku harajur hadari manintu taloh je eka kahapuse uka mandino kamanang, iete belom hong sorga; akan jete Hatalla mantehau itah mahalau Kristus Yesus.

¹⁵Itah handiai je jari bakas secara roh, keleh manjadi kalote. Tapi amon aton oloh hong marak keton je manirok beken bara te, maka Hatalla kareh manarang jete akan keton.

¹⁶Aloh kalote keleh keton manantuani hal jetoh: Itah musti tetep belom manumon atoran je jari inumon itah sampai katika toh.

¹⁷ Pahari handiai keleh manumon sonto bara aku. Ikei jari manenga sonto je bujur, tagal te tampayah bua-buah kare oloh je manumon sonto bara ikei te.

¹⁸Aku jari kinjap mansanan akan keton, tuntang toh aku manangkalulie tinai hayak manangis, iete are toto oloh je belom marusak riman pampatei Kristus intu kayu sampalaki.

¹⁹Lawin pambelom kare oloh je kilau te kareh iete kahancor, awi dewa ain ewen iete kipen isin ewen kabuat. Kare hal je mampahawen, ewen malah mampatamame; awi ewen baya manirok kare taloh je eka karajin kalunen jetoh bewei.

²⁰Tapi itah toh oloh ain karajaan sorga. Bara hete kea Raja Panyalamat itah, Tuhan Yesus Kristus akan dumah. Ie te je ientai itah hayak angat kataharu.

²¹Bitin itah je belemo tuntang tau lenyoh toh, kareh iobah awi Kristus manjadi sama kilau bitin Ayue kabuat je paham kahalape. Ie tau malalus jete awi Ayue aton kuasa hapan mamparundok kare taloh handiai.