Read Ngaju PILIPPI 4 Bible Online

PILIPPI 4 - Ngaju bible

PILIPPI 4

¹Tagal te Pahari handiai je inyinta, keleh keton belom kilau te hayak toto-toto percaya dengan Tuhan. Ateiku taharu dengan keton! Keton ih je eka kaandal ateiku je tau mawi aku hanjak.

²Pahari Ewudia tuntang pahari Sintike! Aku balaku nyame-nyame uka pahari hinje bulat atei kilau oloh je sama kapercayae.

³Akan kare kawalku je baketep dengangku, aku balaku kea mangat pahari mandohop kadadue oloh bawi te. Ewen jari bagawi paham omba aku mangat mangabar Barita Bahalap bara Hatalla; sama kilau Klemen tuntang kakare oloh beken te je bagawi omba aku. Kare aran ewen te aton huang Surat ain Oloh Belom.

⁴Keleh keton harajur hanjak awi keton jari belom hinje dengan Tuhan. Sinde tinai aku hamauh: keleh keton hanjak!

⁵Keleh oloh handiai tau mite ampin lagon keton je bahalap atei. Basa dia tahi hindai Tuhan akan dumah.

⁶Ela keton mikeh tahiu taloh en bewei. Huang kare taloh handiai, keleh balakudoa tuntang nyampai palakun keton akan Hatalla. Keleh sanan harajur akan Hatalla taloh je imerlu keton hayak manyewut tarimakasih.

⁷Maka kasanang bara Hatalla je manangkalau batas kaharatin itah, akan manjaga atei tuntang tirok keton je jari hinje dengan Kristus Yesus.

⁸Kajariae, pahari handiai, suang kare tirok keton hapan kare taloh je barega, je patut inara, iete kare taloh je bujur, je ihormat, je adil, barasih, manis tuntang bahalap.

⁹Lalus taloh je iajar akan keton tuntang je inarima keton bara aku; aloh bara kare auhku atawa bara kare gawingku. Hatalla te upon kasanang, kareh mampahayak keton.

¹⁰Huang pambelomku je hinje dengan Tuhan, aku mangkeme sanang toto, awi limbah kalote katahie, toh keton olih tinai manirok keadaan ayungku. Maksudku dia ie awi keton jari kalapean aku, keton puna manantuani aku, tapi keton jaton sampet mamparahan jete.

¹¹Aku mansanan hal toh dia ie awiku tapas, basa aku jari bajar mangkeme sukup dengan taloh je aton.

¹²Aku jari harajur mangkeme belom saraba tapas, tuntang kea belom huang kalabien. Aku jari mangasene rahasiae uka manaharep taloh je kilen ampie kea; aloh huang keadaan tatau atawa keadaan susah, aloh huang keadaan aton atawa huang keadaan tapas.

¹³Hapan kuasa je inega Kristus akangku, aku aton kaabas uka manaharep kare macam ampin taloh je aton.

¹⁴Tapi keton jari mandohop aku huang kasusahku; tuntang taloh je ilalus keton te puna bahalap.

¹⁵ Pahari handiai oloh Pilippi! Keton kabuat katawan toto katika aku malihi Makedonia bihin, metoh pangkasolake haliai aku mangabar Barita Bahalap te, tikas keton ih ungkup je mandohop aku; tikas keton ih je omba mangkeme ontong rugi haya-hayak dengangku.

¹⁶ Katika aku huang Tesalonika tuntang perlu pandohop, jari labih bara sinde keton mangirim pandohop akangku.

¹⁷Jete dia baarti aku baya handak manarima panenga. Taloh je ingahandakku iete uka aku tau mite kare hasil je mandahang kaontong akan keton.

¹⁸ Aku jari manarima taloh samandiai te — malah labih bara sukup! Kakare panenga je ingirim keton akangku, jari inarimaku bara Epaproditus. Toh kare taloh je imerluku jari aton intu aku. Kare panengan keton te sama kilau parapah je mangat ewaue je inyarah akan Hatalla tuntang inarima awi Hatalla dengan sanang atei.

¹⁹Hatalla je inyembahku, je hakotoh dengan katatau huang Kristus Yesus, kareh manyukup kare taloh je imerlu keton.

²⁰Tara akan Hatalla Bapa itah sampai katatahie! Amen.

²¹Keleh manyampai tabengku akan hapus ungkup Hatalla je hinje dengan Kristus Yesus. Tuntang tarima kea tabe bara kare pahari je aton omba aku intu hetoh.

²²Hapus ungkup Hatalla hong lewu toh, je mambatang ewen je bara istana Kaisar, mangirim tabe akan keton.

²³Keleh Tuhan Yesus Kristus mamberkat pahari samandiai. Hormat ikei, Paulus tuntang Timoteus