Read Ngaju KOLOSE 2 Bible Online

KOLOSE 2 - Ngaju bible

KOLOSE 2

¹Aku handak uka keton mangatawan kilen ampie kapahame aku bagawi akan keton tuntang akan ewen je intu Laodikea tuntang ewen handiai je dia mangasene aku secara pribadi.

²Taloh handiai toh ilalusku mangat atei ewen manjadi abas tuntang ewen hasinta sama arepe sampai ewen bulat hinje. Awi kalote ewen toto-toto harati tuntang percaya hayak mangasene rahasian Hatalla, iete Kristus kabuat.[3]

³Kristus te mambuka kare kapintar-kaharati tuntang pangatawan Hatalla je horan basilim.

⁴Aku mansanan hal toh mangat keton ela inanjaro awi eweh bewei je auhe manis-menyak dengan keton.

⁵Basa aloh aku kejau bara keton, anggap ih aku toh aton hong marak keton. Tuntang aku hanjak mite keton bulat atei tuntang kapercayan keton dehen dengan Kristus.

⁶Pahari handiai jari manarima Kristus Yesus kilau Tuhan. Tagal te keleh keton belom hinje Dengae,

⁷tuntang muhat huang Ie. Keleh keton mampendeng pambelom keton mahapan Kristus kilau galange. Keleh keton sasar percaya dengan Kristus, manumon taloh je jari iajarku akan keton. Tuntang keleh atei keton ingalasot hapan auh tarimakasih.

⁸Keleh keton mahaga arep keton bua-buah, ela sampai aton oloh je maningkes keton hapan kare kaji-patua ain oloh je dia baguna, tapi baya mampalayang. Kare kaji-patua te dia bara Kristus, malengkan bara tirok olon bewei tuntang bara kare roh panguasa ain kalunen.

⁹Basa salepah tampan bitin Hatalla melai huang Kristus, iete huang kaoloe.

¹⁰Tuntang awi keton belom hinje dengan Kristus, akan keton kea inenga pambelom je sukup-simpan. Basa Kristus te manjadi Kapala mahunjun kare roh je mimbing kuasa tuntang je marentah.

¹¹Awi hinje dengan Kristus, keton jari inyunat, dia mahapan sunat je inampa awi olon, malengkan awi sunat je inampa awi Kristus, je maliwus keton bara kuasan sipat je badosa.

¹² Basa hong katika keton impandoi, keton ingubur haya-hayak dengan Kristus; tuntang hapan pampandoi jete kea, keton omba imbelom haluli haya-hayak dengan Kristus awi keton percaya dengan kuasan Hatalla je jari mambelom Kristus bara pampatei.

¹³ Bihin, keton jari matei secara roh awi keton badosa, tuntang awi keton dia inyunat secara kaolon. Tapi toh Hatalla mambelom keton haya-hayak dengan Kristus. Hatalla jari mampun kare dosan itah,

¹⁴ tuntang mambalang surat utang itah, je mampikeh itah mahapan kare syarat je babehat. Awie manyampalaki surat te intu kayu sampalaki, Hatalla mangabus kakare auh dawa je mawi itah.

¹⁵Intu kayu sampalaki te Kristus mawi kare roh je marentah tuntang je mimbing kuasa, manjadi nihau kaabase.[4] Ewen manjadi akan indu tampayah oloh are hong katika Kristus mihir ewen kilau oloh tawanan huang barisan kamanang Ayue.

¹⁶ Tagal te ela manalua oloh manyalan keton tahiu taloh kinan atawa taloh ihop, atawa tahiu kare andau hai agama, atawa kare andau hai hong bulan taheta, atawa tahiu andau Sabat.

¹⁷Kakare taloh te baya kangkalingen kare taloh je kareh dumah, tapi huang ampie je gitan kare taloh te iete Kristus!

¹⁸Ela keton manalua arep keton imparugi awi oloh je pura-pura mamparandah arepe tuntang je manyembah kare malekat. Oloh te balecak awi kare tirok je mangalunen tuntang mampatamam kare taloh tampayahe je basilim,

¹⁹ sampai oloh te dia hindai bahimbing dengan Kristus je manjadi kapala. Hong penda pimpinan Kristus, salepah biti ihaga tuntang impahinje hapan kare sahepan tulange, hayak belom manumon kahandak Hatalla.

²⁰Keton jari matei haya-hayak dengan Kristus, tuntang jari iliwus bara kare roh je mimbing kuasa hong hapus kalunen toh. Nah mbuhen keton belom kilau oloh je magon inguasa awi kalunen toh? Mbuhen keton tundok dengan kare atoran kilau toh,

²¹“Ela mimbing jetoh”, “Ela mangkeme jete”, “Ela manigong jetoh”?

²²Kakare atoran te uras manahiu kare hal je limbah ihapan palus dia ingguna tinai. Kare atoran tuntang kare ajar jete baya inampa awi olon.

²³Taloh te, ampie puna kilau kapintar-kaharati, awi koae mangat oloh manyembah malekat, mamparandah arep tuntang mangapehe arep; tapi taloh handiai te dia baguna hapa mangamburi kipen olon.[5]