Read Ngaju KOLOSE 3 Bible Online

KOLOSE 3 - Ngaju bible

KOLOSE 3

¹ Keton jari imbelom haluli haya-hayak dengan Kristus. Awi te keton musti manggau jalan uka mandino kare taloh je huang sorga, eka Kristus marentah haya-hayak dengan Hatalla.

²Keleh mansahan kare tirok keton akan kare taloh intu kanih, ela intu kare taloh je hong kalunen toh.

³Awi keton jari matei, tuntang pambelom keton basahokan dengan Kristus huang Hatalla.

⁴Nah, batang pambelom keton je bujur iete Kristus tuntang amon Ie kareh gitan, keton kea tau maju akan baun haya-hayak Dengae huang kahain Aie!

⁵Tagal te, keleh mampatei kare kipen kalunen je mamparise keton, kilau karayap, kare hal je dia sanonoh, kalasot kipen, kipen je papa, tuntang kabungo (basa kabungo jete sama kilau manyembah dewa).

⁶Kare taloh je kilau te uras mampalembut kalait Hatalla akan kare oloh je dia mamenda Ie.[6]

⁷Bihin keton kabuat mahin manumon kare kipen te, metoh keton inguasa Awie.

⁸Tapi toh keleh keton manganan kare taloh je papa bara arep keton: ela hindai balait atawa mamok atawa mingkes angat kasingi dengan oloh beken. Ela samasinde balua bara nyaman keton kare auh sapa atawa kotak je papa.

⁹ Ela hatanjaro sama arep keton, basa pambelom je usang dengan kare sipate jari ilekak keton.

¹⁰ Keton wayah toh jari mandino pambelom je taheta. Keton toh oloh je taheta, je kanjerae inaheta raju-rajur awi je manjapae, iete Hatalla, manumon tamunan Ayue kabuat. Kahandak Ayue iete mangat keton mangasene Hatalla dengan tinduh-barasih.

¹¹Kajariae maka palus nihau kapisah je aton marak oloh Yehudi dengan oloh je dia Yehudi, oloh je basunat, dengan oloh je dia basunat; jaton hindai kabekee akan oloh tamuei dengan akan oloh je dia bahadat, atawa jipen dengan oloh je mardeka, basa Kristus iete kare taloh handiai tuntang Ie hinje dengan kakare taloh te!

¹² Pahari handiai, keton toh ungkup ain Hatalla. Hatalla masi keton tuntang mintih keton uka manjadi oloh jalahan Ayue. Jete bukue keton musti mamparahan sinta tuntang asi, keton musti bahalap atei, randah atei, balemo-lowah, tuntang tahan manyarenan kapehe.

¹³ Keton musti sabar dengan sama arep keton, tuntang tau mampun amon aton oloh je mingkes kasingi dengan kolae. Dengan sanang atei Tuhan handak mampun keton, jadi keton kea musti handak mampun sama arep keton.

¹⁴Tuntang je paling mambatang iete: keton musti hasinta sama arep keton basa sinta te je mampahinje-mambulat kare pahari samandiai sampai keton manjadi tinduh-barasih.

¹⁵Keleh kare taloh je imutus keton imutus hapan kadamai je inenga Kristus huang atei keton. Basa Hatalla mantehau keton uka manjadi anggota bara biti ije, mangat keton belom huang kadamai ain Kristus te. Keleh keton manyewut auh tarimakasih.

¹⁶ Kare auh ajar Kristus je kontep berkat te keleh jete misap huang atei keton. Keleh keton hajar tuntang hatenga nasehat hapan salepah kapintar-kaharatin keton. Keleh manyanyi masmur tuntang nyanyi tara tuntang kare nyanyin ungkup; keleh manyanyi akan Hatalla hapan angat tarimakasih huang atei keton.

¹⁷Kare taloh handiai je ilalus tuntang ingotak keton, keleh jete ilalus tuntang ingotak tagal aran Tuhan Yesus. Keleh manarimakasih intu Hatalla Bapa tagal taloh je ilalus Yesus akan keton.

¹⁸ Pahari handiai je manjadi sawan oloh hatue! Keleh keton manumon auh banan keton, basa jete kapatut hadat keton kilau oloh Kristen.

¹⁹ Pahari handiai je manjadi banan oloh bawi! Keleh keton sinta sawan keton. Ela kasar dengan ewen.

²⁰ O kare anak oloh! Kilau oloh Kristen maka kapatut keton iete harajur manumon kare auh indu-bapa keton, karana jete je manyanang atei Hatalla.

²¹ Pahari handiai je manjadi bapa! Ela mangapehe atei anak keton sampai ewen manjadi nihau kaharape.

²² Pahari handiai je manjadi jipen! Huang taloh handiai, keleh keton manumon kare auh tempon keton hong kalunen toh. Ela keton manumon baya metoh ewen manantuani keton awi keton handak balaku tara. Keleh manumon auh ewen hapan atei je barasih, awi keton mahormat Tuhan.

²³Gawi en bewei je inenga akan keton, keleh keton malaluse hapan salepah atei keton, ampin keton kila-kilau handak manyang Tuhan, tuntang dia manyang olon.

²⁴Keleh mingat keton kareh manarima upah bara Tuhan. Taloh je inatap Tuhan akan ungkup Ayue, jete kea je handak inenga Awie akan keton. Basa tempon keton je sapunae iayang keton iete Kristus kabuat.

²⁵ Tuntang eweh bewei je mawi kasalan, kareh mananggong kare kasalan te; basa Tuhan dia mintih ampin oloh.