Read Ngaju KOLOSE 4 Bible Online

KOLOSE 4 - Ngaju bible

KOLOSE 4

¹ Pahari handiai je manjadi tuan! Keleh keton manaharep kare jipen keton dengan bujur tuntang buah. Keleh mingat, ain keton mahin aton ije biti Tuan huang sorga.

²Keleh keton balakudoa harajur tuntang batawat, sambil manarimakasih akan Hatalla.

³Keleh balakudoa akan ikei mangat Hatalla manenga akan ikei katika je bahalap uka manawor barita tahiu rahasia ain Kristus. Tagal hal te kea maka aku metoh toh aton huang penjara.

⁴Keleh balakudoa mangat aku tau manarang rahasia te lepa-lepah manumon kapunae.

⁵ Tahiu hubungan keton dengan kare oloh je dia percaya, keleh keton belom pintar-harati tuntang mangguna kare katika je aton dengan bahalap.

⁶Keleh kare taloh je inyewut keton harajur mampamangat tuntang mampahanjak oloh. Keleh keton katawan kilen ampie kapatut keton tombah kare auh paisek oloh dengan keton.

⁷ Tikhikus, paharin itah je inyinta, kareh mansanan akan keton taloh handiai tahiu aku. Ie baketep bagawi akan Tuhan haya-hayak dengan ikei.

⁸Aku mangirim ie akan keton awiku handak uka keton mangatawan keadaan ikei tuntang keton iampong.

⁹ Onesimus akan haguet haya-hayak dengan Tikhikus; ie te ije biti oloh bara marak keton. Ie oloh je baketep tuntang ikei sinta ie. Ewen due Tikhikus kareh mansanan akan keton taloh handiai je manjadi intu ekaku toh.

¹⁰ Aristarkhus, je aton hong penjara haya-hayak dengangku, mangirim tabe akan keton. Kalote kea Markus, paharin Barnabas ije tato. (Akan keton jari ingirim barita uka manambang ie amon ie dumah manalih keton.)

¹¹Tinai tabe bara Yesus je bagare Yustus kea. Bara kare oloh Yehudi je jari percaya dengan Tuhan Yesus, baya ewen telo ih metoh toh je bagawi dengangku uka malalus gawi bara Hatalla. Ewen puna toto-toto mandohop aku.

¹² Tabe bara Epapras. Ie te kea asale oloh bara baris keton. Ie rewar Kristus Yesus, je harajur balakudoa kete-ketep akan keton. Ie balaku nyame-nyame dengan Hatalla mangat kapercayan keton impaabas tuntang keton toto-toto dehen, mangat hapan katinduh-karasih keton toto-toto mamenda kahandak Hatalla.

¹³Aku manyaksi kabuat ie jari bagawi paham akan keton tuntang akan kare oloh je hong Laodikea tuntang Hierapolis.

¹⁴ Dokter Lukas je inyinta itah, tuntang Demas mangirim tabe akan keton.

¹⁵Keleh manyampai taben ikei akan kare paharin itah oloh Kristen hong Laodikea; akan Nimpa kea, tuntang akan ungkup je pumpong sombayang intu humae.

¹⁶Limbah surat toh imbasa akan keton, keleh manggau jalan uka jete imbasa kea akan ungkup je huang Laodikea, kalote kea keton kabuat musti mambasa surat je kareh ingirim bara Laodikea akan keton.

¹⁷ Tuntang keleh mansanan akan Arkhipus, “Keleh mahapus gawi je inenga akan keton hapan manyang Tuhan.”

¹⁸Tabe bara aku Paulus. Ela kalapean je aku magon aton hong penjara! Aku kabuat je manyurat bagian toh. Keleh Tuhan mamberkat keton. Hormat ikei, Paulus