Read Ngaju 1 TESALONIKA 3 Bible Online

1 TESALONIKA 3 - Ngaju bible

1 TESALONIKA 3

¹ Kajariae kataharon ikei dia tarasarenan tinai. Awi te ikei manirok labih bahalap ikei ilihi kabuat ikei ih hong Atena,

²pandehan ikei mangirim paharin itah Timoteus. Ie ije biti pelayan Hatalla je bagawi dengan ikei uka mambarita Barita Bahalap tahiu Kristus. Ikei mangirim Timoteus akan keton mangat ie mampaabas keton tuntang manantiring keton uka labih percaya tinai dengan Kristus.

³Awi kalote ije biti mahin jaton bara keton je undur tagal kare kapehen itah toh. Keton kabuat katawan kare kapehe te jari inamean huang rencana Hatalla akan itah.

⁴Katika ikei magon hinje keton, helo-helo ikei jari mansanan akan keton, itah kareh buah kapehe. Tuntang jete puna toto-toto jari manjadi; keton kabuat mangatawan jete.

⁵Jete bukue aku mangirim Timoteus, awi aku mipen toto mangatawan kilen ampie kamiar keton huang hal kapercaya dengan Kristus. Aku meles mikeh setan bahasil manggoda keton sampai kakare kaheka ikei manjadi hayang.

⁶ Toh Timoteus jari haluli tuntang jari manyampai akan ikei barita je mampahanjak tahiu ampin kapercayan keton dengan Kristus tuntang keton hasinta sama arep keton. Ie mansanan akan ikei keton harajur mangenang taloh je bahalap tahiu ikei hong atei keton. Tuntang keton mipen hasondau dengan ikei, sama kilau ikei kea mahin mipen hasondau dengan keton.

⁷Jete sababe pahari handiai, hong kare kasusah tuntang kapehen ikei, ikei iampong tagal barita tahiu keton. Kapercayan keton dengan Kristus mampahai atei ikei,

⁸sampai toh ikei mangkeme toto-toto belom, asal keton tetep mendeng segah, ije dengan Tuhan.

⁹Hai toto angat tarimakasih ikei dengan Hatalla tagal kakare kahanjak je ingkeme ikei intu taharep Ie tagal keton.

¹⁰Handau hamalem ikei balaku Dengae hapan katoton atei, mangat ikei tau hasondau kabuat dengan keton uka sukup-simpan taloh je imerlu keton mangat percaya dengan Kristus tumon kapatute.

¹¹Keleh Hatalla Bapa itah kabuat, tuntang Tuhan itah Yesus mamparata jalan akan ikei mangat hasondau dengan keton!

¹²Keleh Tuhan manun keton uka sasar hasinta sama arep keton tuntang sasar sinta oloh handiai, sampai sintan keton te dahang-dahanga, sama kilau sintan ikei dengan keton.

¹³Awi kalote Tuhan kareh mampaabas atei keton, sampai keton barasih tuntang jaton kasalae intu taharep Hatalla Bapa itah, katika Tuhan itah Yesus dumah hayak dengan kakare oloh Ayue.[2]