Read Ngaju 1 TESALONIKA 4 Bible Online

1 TESALONIKA 4 - Ngaju bible

1 TESALONIKA 4

¹Kajariae pahari handiai, ikei jari manenga sonto akan keton tahiu ampin kapatut keton belom uka manyanang atei Hatalla. Puna keton jari belom kilau te. Tapi toh, tagal kuasan Tuhan Yesus, ikei balaku toto dengan keton tuntang hajajuan keton uka keton labih rajin hindai huang hal te!

²Basa keton jari mangatawan kare nasehat je jari inenga ikei akan keton tagal kuasan Tuhan Yesus.

³Kahandak Hatalla te kalotoh: Uka keton belom tantai Akae bewei, barasih, mangejau kakare gawi je harayap.

⁴Gagenep oloh hatue hong marak keton patut katawan kilen ampie belom dengan sawae[3] hapan cara manyanang atei Hatalla tuntang olon.

⁵Ela manumon angat kipen belai dengan sawam, kilau je ilalus awi kare oloh je dia mangasene Hatalla.

⁶Huang hal je kilau te, ije biti mahin ela aton oloh mawi kasalan dengan paharie, atawa manipu ie. Bihin ikei jari paham mampingat keton, Tuhan kareh mahukum kare oloh je malalus kare kasalan je kilau te.

⁷Hatalla mantehau itah, dia uka itah belom harayap, tapi uka itah belom hapan cara je manyanang atei Ayue.

⁸Oloh je manolak auh ajar toh, dia ie manolak olon, tapi manolak Hatalla je manenga Roh Ayue je barasih akan keton.

⁹Dia usah hindai ikei manyurat akan keton tahiu ampin kapatut keton sinta kare pahari je sama kapercayae. Keton kabuat jari iajar awi Hatalla uka sinta sama arep keton.

¹⁰Tuntang hal toh jari imparahan keton akan kare pahari je sama kapercayae dengan keton hong hapus Makedonia. Tapi, pahari handiai, ikei balaku toto, uka pambelom keton labih bahalap hindai.

¹¹Keleh manggau jalan uka keton belom huang kadamai tuntang dia omba campur dengan soal oloh beken. Keleh keton bagawi manggau rajakin keton kabuat, kilau je bihin ikei puji mansanae akan keton.

¹²Amon keton belom kalote, keton dia bahapang dengan eweh bewei, tuntang kare oloh je dia percaya dengan Kristus, kareh mahormat keton.

¹³Pahari handiai, ikei handak uka keton mangatawan taloh je katotoe tahiu kare oloh je jari matei; mangat keton dia kapehe atei kilau kare oloh beken je jaton mingkes kaharap.

¹⁴Itah percaya Yesus jari matei tuntang belom haluli, jete sababe itah percaya kea Hatalla kareh mambelom haluli oloh handiai je percaya dengan Yesus tuntang jari matei, uka ewen belom hinje Dengae.

¹⁵ Tahiu hal te, jete auh ajar ain Tuhan je handak inyampai ikei akan keton: Hong katika Tuhan Yesus dumah, itah je magon belom dia akan mananselo kare oloh je jari matei labih helo.

¹⁶Kare malekat hai te kareh mantehau hai auhe tuntang tarompet ain Hatalla impahiau kilau tanda parentah. Palus Tuhan Yesus kabuat kareh mohon bara sorga, tuntang kakare oloh Kristen je jari matei kareh imbelom labih helo.

¹⁷Limbah te, itah je magon belom katika te kareh inggatang haya-hayak dengan ewen akan kare baun andau mangat hasondau dengan Tuhan hong langit. Palus itah melai dengan Tuhan sampai katatahie.

¹⁸Tagal te, keleh keton mampaabas atei sama arep keton mahapan kare auh kotak toh.