Read Ngaju 1 TESALONIKA 5 Bible Online

1 TESALONIKA 5 - Ngaju bible

1 TESALONIKA 5

¹Pahari handiai, dia usah ikei manyurat akan keton hamparea katikae je pas kare hal te akan manjadi.

² Basa keton kabuat katawan batantu Andau panumah Tuhan te akan sampai kilau maling dumah hong hamalem.

³Amon oloh hamauh, “Taloh handiai aman tuntang damai,” maka hong katika jete ewen kareh salenga buah karusak, tuntang ije biti mahin jaton je tau liwus. Hal te akan manjadi manantekas, sama kilau kapehen oloh manak je buah oloh bawi je handak luas.

⁴Tapi keton dia ie oloh je belom huang kakaput, sampai andau jete manarewen keton sama kilau panumah maling.

⁵Pahari samandiai, keton toh oloh je belom huang kalawa; keton toh oloh ain kalawa je balawa. Itah toh dia ie oloh je belom huang kakaput, atawa oloh je melai huang kakaput alem.

⁶Awi te itah dia tau mado tiro-tiroh bewei sama kilau oloh beken. Itah musti batawat tuntang tirok itah musti balawa.

⁷Hong hamalem oloh batiroh, tuntang hong hamalem kea oloh manjadi babusau.

⁸ Tapi itah toh oloh je belom huang andau je balawa; awi te tirok itah musti balawa. Itah musti tetep percaya dengan Tuhan tuntang sinta kare oloh beken hayak harap huang kapercaya je Hatalla kareh manyalamat itah. Jete senjata je mangalindong itah huang kalahin itah malawan kakaput.

⁹Hatalla mintih itah dia uka ihukum, tapi uka inyalamat mahalau Tuhan itah Yesus Kristus.

¹⁰Ie matei akan itah uka hong katika Ie dumah kareh — en itah belom atawa matei itah tau belom hinje Dengae.

¹¹Tagal te keleh keton tetep hatantiring tuntang mampaabas sama arep keton, sama kilau je ilalus keton wayah toh.

¹²Pahari handiai, ikei balaku toto-toto uka keton mahormat kare oloh je bagawi hong marak keton; iete ewen je jari iintih awi Tuhan mangat mamimpin tuntang manasehat keton.

¹³Keleh keton manun ewen hapan salepah hormat tuntang hapan sinta asi awi mingat taloh je ilalus ewen. Keleh harajur belom huang kadamai.

¹⁴Ikei balaku kea, pahari handiai, tingak bua-buah oloh je dia maku bagawi; keleh mandehen atei oloh je mikeh; dohop oloh je perlu indohop tuntang keleh sabar taharep oloh samandiai.

¹⁵Keleh manjaga uka ela aton oloh je mambaleh kapapa hapan kapapa. Keleh harajur mawi gawi bahalap, dengan sama arep keton tuntang akan oloh handiai.

¹⁶Keleh keton harajur hanjak,

¹⁷tuntang keleh balakudoa harajur.

¹⁸Huang kare taloh samandiai keleh keton manarimakasih, basa jete je ingahandak Hatalla bara keton, kilau oloh je belom hinje dengan Kristus Yesus.

¹⁹Ela keton manahan Roh Hatalla.

²⁰Ela manaha gampang kare barita je inenga awi Roh Hatalla.

²¹Kakare taloh handiai keleh incoba, tuntang je bahalap musti inumon.

²²Keleh mangejau arep keton bara sepsimpan ampin kapapa.

²³Keleh Hatalla kabuat je manenga kasanang akan itah, manun keton manjadi oloh je toto-toto belom tantai akan Hatalla. Keleh Hatalla manjaga arep keton lepa-lepah, aloh roh, hambaruan tuntang bitin keton, sampai jaton aton kasalae hong katika Tuhan itah Yesus Kristus dumah haluli.

²⁴Hatalla, je jari mantehau keton, keleh Ie malalus hal te basa Ie baketep.

²⁵Keleh balakudoa akan ikei, Pahari handiai!

²⁶Keleh keton handiai hatabe sama arep keton huang kaheret atei kilau oloh hampahari je sama Kristen.

²⁷Tagal kuasa bara Tuhan, aku balaku toto-toto uka keton mambasa surat toh akan kare pahari handiai je sama kapercayae.

²⁸Keleh Tuhan itah Yesus Kristus memberkat keton. Hormat ikei, Paulus