Read Ngaju YOSUA 1 Bible Online

YOSUA 1 - Ngaju bible

YOSUA 1

¹Limbah pampatei Moses, rewar TUHAN te, TUHAN hamauh dengan wakil Moses, iete Yosua anak Nun.

²TUHAN hamauh, “Rewar-Ku Moses jari matei. Toh keleh ikau tuntang hapus ungkup Israel manatap arep uka dimpah Sungei Yordan, tuntang tame lewu je inenga-Ku akan ewen.

³ Aku jari mansanan akan Moses iete genep tanah je ihunje keton jari inenga-Ku akam, Yosua, tuntang akan hapus ungkup ayung-Ku.

⁴Watas tanah keton akan manampara bara padang pasir intu hila salatan sampai akan petak habukit Libanon intu hila utara tuntang bara Sungei Euprat je hai intu hila timor palus buah lewun bangsa Het sampai akan Tasik Bentok intu hila barat.

⁵ Ije mahin jaton je olih mampakalah ikau, Yosua, sampai hapus umurm. Awi Aku akan harajur mampahayak ikau sama kilau bihin Aku mampahayak Moses. Aku dia akan malihi ikau.

⁶ Keleh ikau percaya tuntang bahanyi, awi ikau je mamimpin bangsa toh metoh ewen manguasa lewu je injanji-Ku akan tato hiang ewen.

⁷Baya, keleh ikau toto yakin tuntang bahanyi. Ikau musti manjaga uka ikau manumon hapus parentah je inenga Moses rewar-Ku te akam, isut mahin ela ikau malihie, maka ikau akan mandino hasil.

⁸Buku parentah te harajur imbasam akan ungkup-Ku. Bajar bara buku te handau hamalem, mangat harajur ilalusm uras taloh je tarasurat intu huange. Amon ikau malalus uras taloh te, pambelom ayum akan mangat tuntang mandino hasil.

⁹Keleh mingat Aku jari marentah ikau uka ikau toto-toto percaya tuntang bahanyi! Ela ikau mikeh atawa tapas kamentengm, awi Aku TUHAN Hatallam mampahayak ikau akan kueh bewei ikau haguet.”

¹⁰Palus Yosua marentah kare pamimpin ungkup Israel

¹¹uka lius haguet manalih hapus kare kemah ungkup Israel tuntang manenga parentah toh, “Keleh natap bahata, awi telo andau tinai keton dimpah Sungei Yordan uka manguasa lewu je inenga TUHAN, Hatallan keton akan keton.”

¹² Akan suku Ruben, suku Gad tuntang suku Manase, Yosua hamauh,

¹³“Ingat! Moses rewar TUHAN te jari mansanan akan keton iete petak intu silan hila timor Sungei Yordan toh inenga TUHAN, Hatallan keton akan keton mangat jadi lewun keton.

¹⁴Uras kare anak sawan keton tuntang meto ain keton tau melai intu hetoh, tapi kare tantara ain keton tatap omba parang tuntang mananselo kare oloh Israel je beken dimpah Sungei Yordan. Keton musti mandohop ewen,

¹⁵sampai ewen manguasa petak intu silan hila barat Sungei Yordan toh je inenga TUHAN, Hatallan keton akan ewen. Limbah TUHAN manenga kalindong akan hapus bangsa Israel, harue keton tau haluli akan petak keton kabuat intu silan hila timor Yordan toh, je inenga Moses rewar TUHAN te akan keton.”

¹⁶Palus suku Ruben, Gad tuntang saparo suku Manase te tombah, “En bewei je irentahm akan ikei, ikei akan malaluse, tuntang akan kueh bewei ikau manyoho ikei haguet, ikei akan haguet.

¹⁷Ikei akan manumon auhm, sama kilau ikei kea harajur manumon auh Moses. Keleh TUHAN, Hatallam mampahayak ikau kilau ie mampahayak Moses!

¹⁸Genep biti je dia maku manumon kuasam, atawa dia manumon parentahm, akan ihukum matei. Keleh ikau yakin tuntang bahanyi!”