Read Ngaju YOSUA 10 Bible Online

YOSUA 10 - Ngaju bible

YOSUA 10

¹Adoni-Sedek, raja Yerusalem,[2] mahining tahiu Yosua jari marabut tuntang mampalomos samasinde lewu Ai, hayak mampatei rajae kilau je jari iawie dengan Yerikho tuntang rajae. Ie mahining kea je oloh Gibeon jari mawi janji hakabuah dengan kare oloh Israel tuntang melai intu bentok ewen.

²Oloh Yerusalem mikeh toto, awi Gibeon iete lewu je hai; sama kahaie dengan kare lewu je aton rajae, hai haream bara Ai, Kare oloe mahin oloh menteng je apik parang.

³Awi te Adoni-Sedek manyoho oloh manalih Raja Hoham intu Hebron, raja Piream intu Yarmut, Raja Yapia intu Lakhis, tuntang Raja Debir intu Eglon, hayak mimbit peteh toh,

⁴“Keleh mandohop aku manyarang Gibeon, tagal kare oloe jari mawi janji hakabuah dengan Yosua tuntang oloh Israel.”

⁵Palus lime-lime raja Amori te, iete raja Yerusalem, Hebron, Yarmut, Lakhis tuntang Eglon hinje; balalu dengan hapus tantara ewen, ewen mangapong tuntang manyarang Gibeon.

⁶Kare oloh Gibeon mangirim barita toh akan Yosua intu kemah hong Gilgal, “Ela nalua ikei kabuat Tuan! Dumah jeleng mandohop ikei, awi tantara bara hapus raja Amori intu petak habukit jari hinje malawan ikei!”

⁷Palus Yosua tuntang hapus tantarae, tatamput kea kare pasukae je pangkahalape, haguet bara Gilgal mangat parang.

⁸TUHAN hamauh dengan Yosua, “Ela mikeh dengan ewen. Kamanang jari inenga-Ku akam, tagal te ije mahin dia bara ewen olih malawan ikau.”

⁹Ije ale-alem Yosua tuntang pasukae miar bara Gilgal akan Gibeon, palus manyarang kare oloh Amori manyalenga.

¹⁰TUHAN mawi kare oloh Amori tarewen metoh mite tantara Israel. Are oloh Amori impatei intu Gibeon, tuntang je magon belom inggoang mohon biring bukit intu Bet-Horon sampai tikas Aseka tuntang Makeda intu hila salatan.

¹¹Metoh kare oloh Amori kanjeran mohon biring bukit te awi hadari bara tantara Israel, TUHAN manduroh ujan es je hai-hai bara langit akan hunjun ewen hapus jalan sampai Aseka. Je matei buah es te kejau labih are bara je impatei awi oloh Israel.

¹²Hong andau te metoh TUHAN manenga kamanang akan oloh Israel bara oloh Amori, Yosua hakotak dengan TUHAN. Tuntang intu taharep oloh Israel, Yosua hakotak, “O matanandau! Keleh tende intu hunjun Gibeon. Tuntang ikau bulan! Ela bindah bara hunjun janah Ayalon.”

¹³ Palus matanandau tende tuntang bulan dia bindah sampai oloh Israel jari hapus mampakalah kare musohe. Kajadian te tarasurat huang Buku Yasar. Jandau tindas matanandau tende intu bentok langit, tuntang tahi toto haru belep.

¹⁴Dia puji manjadi tuntang kea dia akan manjadi andau kilau andau te, tahiu TUHAN je manumon kanahuang olon. TUHAN omba parang intu hila Israel!

¹⁵Limbah kalahi te, Yosua haya-hayak dengan tantarae haluli akan kemah ewen intu Gilgal.

¹⁶Tapi lime-lime raja Amori te liwus tuntang manyahokan huang ije goha intu Makeda.

¹⁷Oloh mite ewen, tuntang mansuman eka ewen manyahokan akan Yosua.

¹⁸“Galing kare batu hai akan tombang goha te, tuntang ina oloh je manjaga intu hete,” koan Yosua,

¹⁹“tapi keton ela tende intu hete. Palus goang tuntang nyarang ewen bara likut; ela manalua ewen tame akan kare lewun ewen! TUHAN, Hatallan keton jari manenga kamanang akan keton bara ewen.”

²⁰Yosua tuntang kare oloh Israel mampatei kare oloh Amori te, tapi aton kea bara marak ewen je hadari akan lewun ewen manggau kalindong, sampai dia buah patei.

²¹Limbah te uras tantara ain Yosua haluli dengan salamat akan Yosua hong kemahe intu Makeda. Ije mahin dia intu lewu te je bahanyi manyewut nara-narai malawan oloh Israel.

²²Limbah te Yosua hamauh, “Toh uap atep goha te tuntang imbit akan hetoh kalime-lime biti raja te.”

²³Palus goha te iuap, balalu kare raja Yerusalem, Hebron, Yarmut, Lakhis tuntang Eglon iimbit balua,

²⁴tuntang iagah talih Yosua. Palus Yosua mantehau uras oloh uka Israel hapumpong, limbah te marentah uka kare perwira je omba parang dengae dumah mahunje uyat kare raja te. Palus kare perwira te dumah tuntang mahunje uyat kare raja te.

²⁵Limbah te Yosua hamauh dengan kare perwirae, “Ela gogop tuntang ela mikeh. Keleh keton parcaya tuntang bahanyi, awi kilau toh ampin TUHAN akan mawi uras musoh keton.”

²⁶Palus Yosua mampatei kare raja te tuntang mangkoak ewen intu lime tihang. Hantun ewen inalua intu hete sampai halemei.

²⁷Metoh matanandau belep, hapan parentah Yosua, kare hantu te impamohon balalu intarik akan huang goha je solake ihapan awi kare raja te eka manyahokan. Limbah te batu hai-hai ina baun rombak goha te. Sampai toh kare batu te magon intu hete.

²⁸Andau te Yosua manyarang Makeda, tuntang mampakalah lewu te dengan rajae. Salepah oloh lewu te impateie; ije mahin dia oloh je inaluae belom. Yosua mawi raja Makeda sama kilau ie mawi raja Yerikho.

²⁹Limbah te, Yosua dengan tantarae miar tarus bara Makeda akan Libna.

³⁰TUHAN manenga kea kamanang akan oloh Israel malawan lewu toh tuntang rajae. Ije biti mahin dia inalua belom; uras oloh huang lewu te impateie. Yosua mawi raja lewu te kilau ie mawi raja Yerikho.

³¹Limbah te Yosua tuntang tantarae miar bara Libna akan Lakhis. Ewen mangapong lewu te palus manyarange.

³²TUHAN manenga akan oloh Israel kamanang malawan Lakhis huang parang intu andau kadue. Taloh je ilalus ewen intu Libna, ilalus ewen kea intu Lakhis. Ije mahin dia je inalua belom, urase impatei.

³³Horam, raja Geser dumah mandohop Lakhis, tapi Yosua mampakalah ie tuntang tantarae; ije mahin jaton je belom, urase matei.

³⁴Limbah te, Yosua dengan tantarae miar bara Lakhis akan Eglon palus mangapong tuntang manyarang lewu te.

³⁵Andau te kea ewen marabut Eglon, tuntang mampatei uras kare oloh intu hete kilau je ilalus ewen intu Lakhis.

³⁶Bara Eglon, Yosua tuntang tantarae mandai bukit tuntang haguet akan lewu Hebron, palus manyarang

³⁷tuntang marabut lewu te. Rajae tuntang genep bitin oloh intu lewu te tuntang kare lewu beken lakau hete, urase impatei. Yosua mampalomos samasinde lewu te sama kilau je ilaluse intu lewu Eglon. Ije biti mahin jaton je inalua belom intu hete.

³⁸Limbah te, Yosua dengan tantarae haluli tuntang manyarang Debir.

³⁹Lewu te tuntang rajae hayak uras lewu beken lakau hete irabut awi Yosua. Uras kare oloh intu hete impatei. Yosua mawi Debir tuntang rajae sama kilau ie mawi Hebron tuntang Libna dengan rajae.

⁴⁰Uras kare lewu te impakalah awi Yosua. Ie mampakalah kare raja intu tanah je habukit, intu kare biring bukit hila timor, intu kare pain bukit hila barat, tuntang intu kare janah hila salatan. Jaton ije je inalua belom; urase impatei. Jete tumon parentah bara TUHAN, Hatallan Israel.

⁴¹Yosua mampakalah kare tanah bara Kades-Barnea intu hila salatan sampai akan Gasa tokep tanah saran tasik, tamput hapus tanah Gosen, palus sampai akan Gibeon intu utara.

⁴²Baya hong sinde parang, Yosua mampakalah uras kare raja te tuntang marabut kare tanah je inguasa ewen, awi TUHAN, Hatallan Israel, parang akan Israel.

⁴³Limbah te, Yosua haluli dengan tantarae akan kemah intu Gilgal.