Read Ngaju YOSUA 11 Bible Online

YOSUA 11 - Ngaju bible

YOSUA 11

¹Metoh raja Yabin bara Hasor mahining tahiu kare kamanang Israel, ie manyoho oloh manalih raja Yobab bara lewu Madon, kare raja lewu Simron tuntang Akhsap,

²manalih kare raja intu petak habukit hila utara, intu janah Yordan hila salatan Galilea, intu pain petak habukit, tuntang intu tanah saran tasik tokep Dor.

³Ie kea manyoho oloh manalih oloh Kanaan intu hila barat tuntang intu hila timor Yordan, oloh Amori, Het, Feris tuntang oloh Yebus intu petak je habukit, dengan oloh Hewi intu pain bukit Hermon intu tanah Mispa.

⁴Palus kare raja te dumah dengan hapus tantara ain ewen je are toto kilau baras intu saran tasik. Kuda tuntang kereta parang mahin are toto.

⁵Uras kare raja te hinje tuntang haya-hayak manyadia arep ewen tokep sampang Sungei Merom uka manyarang Israel.

⁶TUHAN hamauh dengan Yosua, “Ela mikeh dengan ewen. Metoh katika sama kilau toh jewu, ewen urase jari impatei-Ku tagal Israel. Kuda ain ewen inimpangm, tuntang kare kareta parang ewen inusulm.”

⁷Maka Yosua dengan hapus tantarae manyarang musoh te nantekas tokep sampang Sungei Merom.

⁸Tinai TUHAN mawi ungkup Israel manang malawan ewen. Oloh Israel manyarang tuntang manggoang ewen sampai tikas Misrepot-Maim tuntang Sidon intu hila utara, tuntang tikas Janah Mispa intu hila timor. Parang te paham toto sampai jaton ije bara musoh je batisa — urase matei.

⁹Yosua mawi ewen tumon taloh je irentah TUHAN: ie manimpang kudan ewen, tuntang manusul kare kareta parang ewen.

¹⁰Limbah te Yosua haluli, palus marabut Hasor je metoh te pangkaabase marak hapus karajaan intu hete. Lewu te inusul, hayak raja tuntang hapus oloh lewue impatei; ije mahin jaton inalua belom.

¹²Uras kare lewu te irabut awi Yosua, tuntang kare rajae inyingkap hayak impatei tumon parentah Moses, rewar TUHAN te.

¹³Tapi kare lewu je impendeng intu hunjun kare bukit jaton ije je inusul awi oloh Israel, baya Hesor je inusul awi Yosua kabuat.

¹⁴Uras oloh je melai kare lewu te impatei; jaton ije je inalua belom. Tapi uras kare ramoe je barega tuntang metoe induan awi oloh Israel akan ewen kabuat.

¹⁵Uras je irentah TUHAN akan Moses, reware, jari inyampai Moses akan Yosua; jaton ije je dia ilaluse.

¹⁶Yosua marabut uras lewu te, tanah je habukit, tanah pain bukit, aloh je intu utara atawa je intu salatan; tuntang hapus tanah Gosen tuntang tanah janah keang intu hila salatan Gosen, tuntang janah Yordan.

¹⁷Kalombah tanah te nampara bara kare Bukit Halangai intu hila salatan tokep Edom, sampai akan utara tikas Baal-Gad intu Janah Libanon hila salatan Bukit Hermon. Tahi toto Yosua parang dengan kare raja tanah te, tapi kajariae ie manyingkap tuntang mampatei ewen uras.

¹⁹Bara kakare lewu te intu hapus tanah te, jaton ije lewu je mawi janji hasobat dengan Israel, baya Gibeon, lewu bangsa Hewi. Uras lewu je beken impakalah huang parang.

²⁰ TUHAN mawi ewen jua-juan handak parang dengan oloh Israel, mangat ewen impalomos, tuntang uras impatei jaton iasi tumon parentah TUHAN dengan Moses.

²¹Katika te kea Yosua haguet mampalomos bangsa Enak, iete bangsa raksasa je melai intu tanah je habukit — intu Hebron, Debir, Arab, tuntang intu hapus tanah habukit Yuda tuntang Israel. Ewen urase impatei awi Yosua tuntang kare lewun ewen impalomos.

²²Jaton ije bara bangsa Enak je batisa intu tanah Israel, baya intu Gasa, Gad, tuntang Asdod magon aton.

²³Sahapus tanah te irampas awi Yosua tumon parentah TUHAN akan Moses, palus inenga akan bangsa Israel jadi ayun ewen. Tanah te imbagi-bagi, tuntang genep suku mandino ije kabagi. Palus bangsa Israel tende parang tuntang hong tanah ewen dia aton parang tuntang ewen belom jaton bara katapas.