Read Ngaju YOSUA 13 Bible Online

YOSUA 13 - Ngaju bible

YOSUA 13

¹Yosua jari bakas toto. TUHAN hamauh dengan Yosua, “Ikau jari bakas, Yosua! Tapi magon are tanah je musti inguasa:

²hapus tanah Pilistin tuntang Gesur,

³tuntang hapus tanah Awi balalu akan hila salatan. (Tanah bara Sungei Sikhor intu helat dengan Misir sampai akan helat dengan Ekron hila utara, urase te tame tanah bangsa Kanaan; tuntang kare raja Pilistin melai intu Gasa, Asdod, Askelon, Gat tuntang Ekron).

⁴Limbah te je magon musti inguasa: hapus tanah Kanaan tuntang Meara (Ayun bangsa Sidon), sampai akan Apek intu helat tanah bangsa Amori;

⁵limbah te tanah bangsa Gebal, tuntang hapus tanah Libanon akan hila timor, bara Baal-Gad intu hila salatan Bukit Hermon, palus sampai jalan je manintu Hamat.

⁶ Tamput kea hapus tanah oloh Sidon, je melai intu tanah je habukit helat kare bukit Libanon tuntang Misrepot-Maim.” “Uras kare bangsa te akan iharakku, hong katika ungkup Israel mamarang ewen,” koan TUHAN tinai dengan Yosua, “Tanah te imbagi-bagim akan ungkup Israel jadi petak ayun ewen, kilau je jari irentah-Ku akam.

⁷Toh keleh mambagi petak te akan jalatien suku huang bangsa Israel, tuntang akan saparo bara suku Manase, uka jete jadi petak ayun ewen.”

⁸ Suku Ruben tuntang Gad dengan saparo suku Manase jari manarima bagin petak bara Moses, rewar TUHAN te; iete petak intu hila timor Sungei Yordan.

⁹Tanah ewen iete Aroër (intu saran Janah Sungei Arnon), tuntang lewu je intu bentok janah te. Tuntang kea hapus tanah rampar bara Medeba sampai akan Dibon

¹⁰tuntang sampai akan helat tanah Amon, tamput uras kare lewu je puji inguasa awi Sihon, raja Amori, je melai intu Hesbon.

¹¹Tuntang tamput kea tanah Gilead, tanah tokep Gesur tuntang Maakha, sahapus Bukit Hermon, tuntang salepah daerah Basan sampai akan Salkha.

¹²Tanah ewen kea manamput tanah je inguasa raja Og, oloh Repaim[4] je pangkarahiae je marentah intu Astarot tuntang Edrei. Moses jari mampakalah bangsa te tuntang maharak ewen balua bara tanah ewen.

¹³Tapi oloh intu Gesur tuntang Maakha dia iharak awi oloh Israel; ewen magon melai intu Israel.

¹⁴ Suku Lewi dia manarima bagin petak bara Moses, awi TUHAN jari mansanan akan Moses je bagin suku Lewi iete bara kare parapah je imapui intu mesbeh akan TUHAN, Hatallan Israel.

¹⁵Belahe bara petak je injanji TUHAN akan ungkup Israel te jari inenga Moses akan kare keluarga huang suku Ruben, manjadi ayun ewen.

¹⁶Tanah ewen te manamput Aroër (intu saran janah Sungei Arnon) tuntang lewu je intu bentok janah te sampai akan hapus tanah rampar tokep Medeba;

¹⁷Kea Hesbon tuntang hapus lewu intu petak rampar te, iete: Dibon, Bamot-Baal, Bet-Baal-Meon,

¹⁸Yahas, Kedemot, Mepaat,

¹⁹Kiryataim, Sibma, Seret-Hasahar je intu hunjun bukit hong janah te,

²⁰Bet-Peor, kare biring bukit Pisga, tuntang Bet-Yesimot.

²¹Limbah te tamput kea uras lewu intu petak rampar te, tuntang salepah tanah je inguasa Sihon, raja bangsa Amori, je solake melai intu Hesbon. Ie tuntang kare je kuasa intu Midian kea, iete: Ewi, Rekem, Sur, Hur tuntang Reba, jari impakalah awi Moses. Uras oloh kuasa te puji marentah lewu te akan Raja Sihon.

²²Marak kare oloh je impatei awi bangsa Israel aton kea Bileam anak Beor, tukang tujum.

²³Sungei Yordan jadi helat silan hila barat wilayah suku Ruben. Jete kare lewu hai tuntang korik je inenga akan kare keluarga huang suku Ruben manjadi petak ayun ewen.

²⁴Belahe bara petak je injanji TUHAN akan ungkup Israel te kea jari inenga Moses akan kare keluarga huang suku Gad, jadi ayun ewen.

²⁵Tanah ewen manamput Yaeser tuntang uras lewu intu Gilead dengan saparo bara daerah bangsa Amon sampai tikas Aroër intu hila timor Raba;

²⁶daerah bara Hesbon sampai akan Ramat-Mispa tuntang Batonim, tuntang tanah bara Mahanaim sampai akan helat Lodebar, urase te kea tanah akan suku Gad.

²⁷Intu Janah Yordan, tanah suku Gad te tamput Bet-Haram, Bet Nimra, Sukot tuntang Sapon, iete tisan petak je inguasa raja Sihon intu Hesbon. Helat hila barat tanah suku Gad te iete Sungei Yordan sampai tikas danau Galilea intu hila utara.

²⁸Jete ie kare lewu hai tuntang kare lewu korik je inenga akan kare keluarga huang suku Gad jadi petak ayun ewen.

²⁹Belahe bara petak je injanji TUHAN akan ungkup Israel te kea jari inenga Moses akan kare keluarga huang saparo bara suku Manase jadi petak ayun ewen.

³⁰Kare helat tanah ewen sampai Mahanaim, tamput hapus Basan iete hapus tanah je inguasa awi Og, raja Basan, tuntang kea jahawen puluh lewu korik Yair intu Basan.

³¹Limbah te tamput kea saparo tanah Gilead, hayak Astarot tuntang Edrei, iete due lewu hai eka raja marentah je tame tanah je inguasa raja Og intu Basan. Hapus tanah te inenga akan saparo bara kare keluarga turonan Makhir anak Manase.

³²Kalote Moses mambagi petak silan hila timor Yerikho, intu dipah Sungei Yordan, metoh ie aton intu janah Moab.

³³ Tapi suku Lewi dia mandino samasinde petak bara Moses. Moses mansanan akan ewen iete bagi je inenga akan ewen aton bara kare parapah je iluput akan TUHAN, Hatallan Israel.