Read Ngaju YOSUA 14 Bible Online

YOSUA 14 - Ngaju bible

YOSUA 14

¹Jetoh sarita tahiu kilen ampie lewu Kanaan silan hila barat Sungei Yordan imbagi-bagi akan suku Israel. Je mambagi-bagi petak akan ungkup Israel iete Imam Eleasar, Yosua anak Nun, tuntang kare kapala keluarga huang kare suku bangsa Israel.

² Tumon je jari irentah TUHAN akan Moses, kare tanah silan hila barat Sungei Yordan je inantu akan jalatien satengah suku bangsa Israel, musti imbagi-bagi hapan tenong.[5]

³ Tanah silan hila timor Sungei Yordan jari inenga Moses akan due satengah suku bangsa Israel je beken te. (Perlu incatet intu hetoh iete turonan Yosep tabagi huang due suku: Suku Manase tuntang suku Epraim). Tahiu suku Lewi, dia aton petak je inenga Moses akan ewen. Ewen baya inenga kare lewu akan eka melai, dengan kare padang oru akan sapi tuntang tabirin ewen.

⁵Kalote ungkup Israel mambagi-bagi petak je tumon je jari irentah TUHAN akan Moses.

⁶ Sinde katika kare oloh bara suku Yuda dumah manyondau Yosua intu Gilgal. Ije bara ewen iete Kaleb anak Yepune oloh Kenas, hamauh, “Yosua! Ikau katawan taloh je insanan TUHAN akan Moses, sarohan Hatalla te, intu Kades-Barnea tahiu ikau tuntang aku.

⁷ Umurku epat puluh nyelo metoh Moses, rewar TUHAN te, manyoho aku bara Kades-Barnea kilau oloh kalati uka mangalati lewu toh. Palus aku haluli manalih ie mimbit pansanan je bujur.

⁸Kare oloh je haguet dengangku, mawi ungkup Israel mikeh. Tapi aku tetep baketep manumon auh TUHAN, Hatallangku.

⁹ Tagal te, Moses manjanji iete petak je ingombangku musti inenga akangku tuntang kare anakku manjadi ayun ikei katatahie.

¹⁰Toh jari epat puluh lime nyelo bara TUHAN mansanan taloh te akan Moses. Jete manjadi metoh bangsa Israel kanjerae manamuei intu padang pasir. Tinai kilau je injanji TUHAN, TUHAN kea jari mangalindong aku sampai aku tetep belom sampai toh. Item, umurku toh hanya puluh lime nyelo,

¹¹tapi magon abas kilau metoh Moses manyoho aku. Aku magon bara kaabas akan parang atawa akan malalus gawi en bewei.

¹²Awi te, tenga tanah je habukit je injanji TUHAN akangku katika aku tuntang kare oloh je hayak aku haluli mimbit pansanan te. Metoh te ikau kabuat mahining tahiu intu hete aton bangsa Raksasa je inyewut bangsa Enak. Ewen melai intu kare lewu hai je badinding batu. Tau bewei TUHAN mandohop aku, sampai aku tau maharak ewen, kilau je insanan TUHAN.”

¹³Palus Yosua mamberkat Kaleb anak Yepune, balalu manenga akae lewu Hebron jadi petak ayue.

¹⁴Sampai toh lewu te magon kilau pusaka ain turonan Kaleb anak Yepune, oloh Kenas te awi ie baketep tuntang manumon auh TUHAN, Hatallan Israel.

¹⁵Solake Hebron inyewut lewu Arba. (Arba iete oloh pangkahai bitie bara marak bangsa Enak). Palus lewu te sanang mangat jaton inderoh parang tinai.