Read Ngaju YOSUA 15 Bible Online

YOSUA 15 - Ngaju bible

YOSUA 15

¹Kare keluarga bara suku Yuda manarima bagi petak je helate kilau toh: Intu hila salatan, tanah te hambirang sampai paling salatan tanah padang pasir Sin intu helat Edom,

²nampara bara tapakan salatan Tasik Matei,

³palus akan salatan mahalau kare biring bukit intu Akrabim sampai Sin. Limbah te mahalau hila salatan Kades-Barnea, palus mahalau Hesron, mandai akan Adar, balalu mambelok manintu Karka.

⁴Bara hete palus kea akan Asmon, palus manyaroroi sampang sungei intu helat dengan Misir, balalu hapus intu Tasik Bentok. Kalote garis helat tanah hila salatan akan suku Yuda. Garis helat te kea kilau garis helat hila salatan akan hapus tanah Israel.

⁵Intu hila timor, helate iete Tasik Matei, palus akan utara sampai akan tumbang Sungei Yordan. Intu hila utara, helate nampara bara tumbang Sungei Yordan te,

⁶mandai akan Bet-Hogla, palus akan helat Janah Yordan. Bara hete helat utara te mandai palus akan utara sampai akan Batu Bohan (Bohan iete anak Ruben),

⁷limbah te palus akan Janah Kasusah sampai Debir, balalu mambelok tinai akan utara manintu Gilgal intu eka je hataharep dengan kare biring bukit intu Adumim hila salatan janah te. Bara hete palus tinai akan tahasak danum En-Semes, balalu akan En-Rogel,

⁸limbah mandai mahalau Janah Hinom, akan hila salatan bukit, je intu hete eka lewu Yerusalem, lewun oloh Yebusi. Bara hete garis helat manintu puncak bukit intu hila barat janah Hinom, intu tapakan hila utara Janah Repaim,

⁹balalu tarus akan tahasak danum Me-Neptoah, sampai akan kare lewu tokep Bukit Epron. Bara hete garis tanah te mambelok manintu Baala (iete Kiryat-Yearim),

¹⁰tuntang mangaliling hila barat Baala manintu petak habukit Edom, palus akan hila utara Bukit Yearim (iete bukit Kesalon), tuntang mohon akan Bet-Semes, limbah te palus akan Timna.

¹¹Bara Timna, garis helat te balalu manintu akan hila utara Bukit Ekron, palus mambelok manintu Sikron, mahalau Bukit Baala, tarus akan Yabneel, tuntang hapus intu Tasik Bentok,

¹²je jadi garis helat hila barat suku Yuda. Intu huang tanah te eka melai kare oloh bara kare keluarga hong suku Yuda.

¹³ Tumon parentah TUHAN akan Yosua, belahe tanah Yuda inenga akan Kaleb anak Yepune bara suku Yuda. Akae inenga Hebron, iete lewu ayun Arba anak Enak.

¹⁴Turonan Enak iete Sesai, Ahiman tuntang Talmai. Kaleb maharak ewen samandiai bara Hebron.

¹⁵Bara hete ie haguet manyarang kare oloh je melai intu Debir. (Lewu te solake basewut kilau Kiryat-Seper).

¹⁶Koan Kaleb, “Eweh bewei olih marampas Kiryat-Seper, ie tau kawin dengan anak bawi aingku Akhsa.”

¹⁷Otniel, anak bara paharin Kaleb je arae Kenas, marabut lewu te; palus Kaleb manenga Akhsa anake, jadi sawan Otniel.

¹⁸Intu andau ewen kawin, Otniel manyoho Akhsa[6] uka balaku ije kalambar petak bara bapae. Palus Akhsa mohon bara kalidaie, balalu Kaleb misek dengae taloh kanahuange.

¹⁹Akhsa tombah, “Aku handak pire-pire tahasak danum, awi petak je inenga bapa akangku te aton intu eka je keang,” Palus Kaleb manenga akae tahasak danum intu hila ngaju tuntang tahasak danum intu hila ngawa.

²⁰Jetoh petak je inenga akan kare keluarga huang suku Yuda je jadi ayun ewen.

²¹Kare lewu je paling kejau intu hila salatan, je ayun Yuda, iete aton intu helat Edom, samandiaie aton due puluh jalatien kalewu, tamput kare lewu korik je hakalilinge. Kare lewu te iete: Kabseel, Eder, Yagur, Kina, Dimona, Adada, Kedes, Hasor, Yitnan, Sip, Telem, Bealot, Hasor-Hadata, Keriot-Hesron (iete Hasor), Amam, Sema, Molada, Hasar-Gada, Hesmon, Bet-Pelet, Hasar-Sual, Berseba, Baala, Iyim, Esem, Eltolad, Khesil, Horma, Siklag, Madmana, Sansana, Lebaot, Silhim, Ain tuntang Rimon.

³³Kare lewu hai, tamput kare lewu korik hakalilinge, je aton intu kare pain bukit, urase aton epat walas lewu, iete: Estaol, Sora, Asna, Sanoah, En-Ganim, Tapuah, Enam, Yarmut, Adulam, Sokho, Aseka, Saaraim, Aditaim, Gedera tuntang Gederotaim.

³⁷Kea jahawen walas lewu hai jetoh hayak dengan kare lewu korik hakalilinge: Senan, Hadasa, Migdal-Gad, Dilean, Mispa, Yokteel, Lakhis, Boskat, Eglon, Khabon, Lahmas, Khitlis, Gederot, Bet-Dagon, Naama tuntang Makeda.

⁴²Kea jalatien lewu hai jetoh hayak kare lewu korik hakalilinge: Libna, Eter, Asan, Yiptah, Asna, Nesib, Kehila, Akhsib, Maresa.

⁴⁵Kea Ekron dengan kare lewu korik tuntang kare dukohe,

⁴⁶hayak uras lewu tuntang lewu korik tokep Asdod, bara Ekron sampai Tasik Bentok.

⁴⁷Kalote kea Asdod tuntang Gasa dengan kare lewu korik tuntang dukohe je kasaburan sampai tokep sampang sungei intu helat watas dengan Misir tuntang saran Tasik Bentok.

⁴⁸Intu tanah je habukit aton sawalas lewu hai hayak kare lewu korik tokepe: Samir, Yatir, Sokho, Dana, Kiryat-Sana (iete Debir), Anab, Estemoa, Anim, Gosen, Holon tuntang Gilo.

⁵²Tuntang jalatien lewu jetoh tamput kea kare lewu korik hakalilinge: Arab, Duma, Esan, Yanum, Bet-Tapuah, Apeka, Humta, Kiryat-Arba (iete Hebron) dan Sior.

⁵⁵Kea sapuluh lewu hai jetoh hayak kare lewu korik hakalilinge: Maon, Karmel, Sip, Yuta, Yisreel, Yokdeam, Sanoah, Kain Gibea tuntang Timna.

⁵⁸Tuntang jahawen lewu hai jetoh kea, hayak kare lewu korik hakalilinge: Halhul, Bet-Sur, Gedor, Maarat, Bet-Anot tuntang Eltekon.

⁶⁰Kea due lewu hai jetoh hayak dengan kare lewu korik hakalilinge: Lewu Kiryat-Baal (iete Kiryat-Yearim) tuntang lewu Raba.

⁶¹Intu tanah padang pasir, aton jahawen lewu hai jetoh hayak kare lewu korik hakalilinge: Bet-Araba, Midin, Sekhakha, Nibsan, Lewu Uyah tuntang En-Gedi.

⁶³ Lewu hai Yerusalem omba tame ayun Yuda, tapi oloh Yuda dia tau maharak oloh Yebusi je melai intu hete. Sampai toh oloh Yebusi magon melai dengan oloh Yuda intu lewu te.