Read Ngaju YOSUA 16 Bible Online

YOSUA 16 - Ngaju bible

YOSUA 16

¹Kare garis helat petak je inunjok akan turonan Yosep, nampara bara Sungei Yordan tokep Yerikho, hila timor kare tahasak danum Yerikho sampai akan padang pasir. Bara Yerikho, garis te mandai sampai akan Betel intu tanah je habukit.

²Bara Betel, garis te manintu Lus, mahalau Atarot, iete eka melai oloh Arki.

³Bara hete garis te manintu akan hila barat akan tanah Yaplet, sampai akan Bet-Horon-Ngawa, tarus akan Geser, balalu lepah intu Tasik Bentok.

⁴Jete ie daerah je inenga akan oloh Manase tuntang Epraim, turonan Yosep, manjadi petak ayun ewen.

⁵Jetoh kare helat petak je inenga akan kare keluarga huang suku Epraim. Intu hila timor, garis helat petak ewen nampara bara Atarot-Adar sampai akan Bet-Horon-Ngaju,

⁶palus manintu akan Tasik Bentok. Mikmetat aton intu hila utarae. Intu hila timore, garis helat te mambelok manintu Taanat-Silo, palus mahalau jete bara hila timor manintu Yanoah.

⁷Bara hete garis te mohon akan Atarot tuntang Naharat, palus manyaroroi Yerikho tuntang hapus intu Sungei Yordan.

⁸Intu hila barat, garis helat Epraim te nampara bara Tapuah sampai akan sampang Sungei Kana, palus lepah intu Tasik Bentok. Jete petak je inenga akan kare keluarga bara suku Epraim, akan jadi ayun ewen,

⁹tamput pire-pire lewu korik tuntang lewu korik je aton intu huang tanah ain Manase.

¹⁰ Tapi suku Epraim dia maharak oloh Kanaan bara tanah Geser. Jete bukue sampai toh oloh Kanaan magon melai intu Geser sama-sama dengan oloh Epraim, tapi ewen imaksa bagawi kilau rewar akan oloh Epraim.