Read Ngaju YOSUA 17 Bible Online

YOSUA 17 - Ngaju bible

YOSUA 17

¹Belahe daerah intu silan hila Barat Sungei Yordan inenga akan belahe keluarga turonan Manase, anak tambakas ain Yosep. Makhir bapa Gilead, iete anak tambakas ain Manase. Awi ie oloh menteng, maka tanah Gilead tuntang Basan je aton intu silan hila timor Sungei Yordan inenga akae.

²Tanah silan hila barat Sungei Yordan inenga akan kare keluarga turonan Manase je beken, iete keluarga: Abieser, Helek, Asriel, Sekhem, Heper tuntang Semida; Urase te turonan hatue bara Manase anak Yosep. Ewen te kare kapala keluarga,

³Selapehad, anak Heper, eson Gilead (Gilead iete anak Makhir, eson Manase), jaton bara anak hatue, baya anak bawi, iete: Makhla, Noa, Hogla, Milka, Tirsa.

⁴ Ewen manalih Imam Eleasar, Yosua anak Nun dengan kare pamimpin, tuntang hamauh, “TUHAN hakotak dengan Moses, tahiu ikei kea musti sama-sama mandino petak kilau kare paharin ikei je hatue.” Tagal te tumon parentah TUHAN, kare anak bawi Selapehad te inenga petak sama-sama dengan paharin ewen je hatue.

⁵Jadi, dia baya turonan hatue bara Manase je manindo bagin petak, tapi turunae je bawi kea. Jete bukue suku Manase inenga sapuluh kabagi, beken bara petak Gilead tuntang Basan intu silan hila timor Sungei Yordan. Tanah Gilead inenga akan turonan Manase je beken.

⁷Kare garis helat tanah suku Manase nampara bara Aser akan Mikhmetat intu hila timor Sikhem. Bara hete garis te mohon akan salatan sampai akan tanah oloh En-Tapuah.

⁸Daerah Tapuah iete ayun suku Manase, tapi lewu Tapuah, intu helat, iete ayun turonan Epraim.

⁹Maka garis helat Manase te mohon sampai akan sampang Sungei Kana. Kare lewu hai intu hila salatan sampang sungei te ayun Epraim, aloh lewu te ekae intu huang tanah suku Manase. Garis helat tanah Manase te palus manyoroi jalan hila utara sampang sungei te, balalu hapus intu Tasik Bentok.

¹⁰Kalote Epraim aton intu hila salatan, tuntang Manase intu hila utara, tuntang Tasik Bentok helat ewen hila barat. Intu barat tasik, tanah suku Manase te bahelat dengan tanah suku Aser, tuntang intu hila timor tasik, bahelat dengan tanah suku Isaskhar.

¹¹Intu huang tanah Isaskhar tuntang Aser te aton kare petak ayun Manase, iete: Beth-Sean tuntang Yibleam dengan kare lewu korik hakalilinge. Tuntang kea: Dor (lewu je aton intu saran tasik), En-Dor, Taanakh, Megido tuntang kare lewu korik hakalilinge.

¹² Tapi suku Manase dia tau maharak panduduk lewu te; jete bukue oloh Kanaan magon tetep melai intu hete.

¹³Tinai intu harian andau limbah oloh Israel jari labih abas, ewen dia kea maharak kare oloh Kanaan; ewen baya mamaksa kare oloh te bagawi akan ewen.

¹⁴Turonan Yosep hamauh dengan Yosua, “Mbuhen ikei baya inenga ije kabagi petak bewei, padahal ikei are toto, awi TUHAN jari mamberkat ikei?”

¹⁵Yosua tombah, “Awi keton lalau are, tuntang tanah habukit Epraim lalau seke akan keton, keleh haguet akan tanah oloh Feris tuntang Repaim. Keleh nguan kare eka taheta intu kare parak kayu ain ewen te.”

¹⁶Turonan Yosep te tombah, “Tanah je habukit te dia sukup kalombahe akan ikei, tuntang tinai bangsa Kanaan je melai intu kare janah tempon kare kareta parang bara sanaman — aloh ewen je melai intu Bet-Sean tuntang kare lewu korik hakalilinge, aloh ewen je melai intu Janah Yisreel.”

¹⁷Palus Yosua tombah auh suku Epraim tuntang Manase barat te, “Toto keton lalau are tuntang abas, hayak patut inenga labih bara ije kabagi petak.

¹⁸Duan tanah je habukit, awi aloh tanah te magon padang himba keton tau marasih tanah te tuntang manduan urase. Tinai tahiu kare oloh Kanaan te, keton tau maharak ewen, aloh ewen abas tuntang tempon kare kareta parang bara sanaman.”