Read Ngaju YOSUA 18 Bible Online

YOSUA 18 - Ngaju bible

YOSUA 18

¹Limbah mamparundok kare lewu je injanji TUHAN, hapus ungkup Israel hapumpong intu Silo, palus ewen mampendeng Kemah TUHAN.

²Magon aton uju suku bangsa Israel je hindai manarima bagin petak.

³Palus Yosua hamauh dengan ungkup Israel, “Sampai hamparea keton handak mentai tinai, harue keton haguet manguasa derah je inenga TUHAN, Hatallan tato hiang keton akan keton?

⁴Intih telo biti bara genep suku. Aku akan manyoho ewen mangumbang hapus lewu toh uka mancatet kare helat tanah je nahuang induan ewen. Limbah te ewen haluli talih aku.

⁵Petak te musti imbagi jadi uju kabagi: Yuda akan tetep melai intu tanahe intu hila salatan, tuntang Yosep huang tanahe intu utara.

⁶Gambar kare helat akan uju kabagi petak te inampa, tuntang injulok akangku. Kareh aku manenong[7] uka mangatawan taloh je inantu awi Hatalla akan keton.

⁷Baya suku Lewi je dia manarima bagin petak haya-hayak dengan keton, awi bagin ewen iete manjadi kare imam akan malalus gawi akan TUHAN. Tuntang tahiu suku Gad, Ruben tuntang belahe suku Manase, puna ewen jari manarima bagie intu silan hila timor Sungei Yordan. Moses, rewar TUHAN jari manenga petak te akan ewen.”

⁸Yosua manenga atoh jetoh akan kare oloh te, “Keleh lius mangumbang hapus tanah toh tuntang tampa gambar helate; limbah te haluli talih aku. Kareh aku manenong intu hetoh intu Silo uka mangatawan taloh je inantu TUHAN akan keton.” Limbah manarima kare atoh te bara Yosua, ewen palus haguet mangumbang tanah te.

⁹Hapus lewu te ingumbang ewen, balalu mancatet kare helat uju kabagi petak te hayak mancatet kea kare lewu je aton intu huange. Limbah te ewen haluli talih Yosua intu kemah hong Silo.

¹⁰Palus Yosua manenong uka mangatawan taloh je inantu TUHAN akan ewen. Limbah te Yosua manenga bagin petak akan genep suku bangsa Israel je hindai dinon bagin petak.

¹¹Bagi je solake iete petak akan kare keluarga huang suku Benyamin. Bagin ewen te aton intu helang tanah suku Yuda tuntang petak suku turonan Yosep.

¹²Intu hila utara kare petak ewen nampara bara Sungei Yordan, palus mandai akan biring hila utara Yerikho, balalu akan barat mahalau tanah je habukit sampai tikas tanah padang pasir Bet-Awen.

¹³Garis helat te tarus kea akan biring intu hila utara Lus (je basewut kilau Betel), palus mohon akan Atarot-Adar intu bukit hila salatan Bet-Horon-Ngawa.

¹⁴Bara hila barat bukit te, garis helat petak te mambelok akan salatan manintu Kiryat-Baal (iete Kiryat-Yearim). Kiryat-Baal iete ayun suku Yuda. Jete garis helat petak te intu hila barat.

¹⁵Kare helat intu hila salatan nampara bara saran Kiryat-Yearim palus akan kare tahasak danum intu Me-Neptoah,

¹⁶balalu mohon akan pain bukit je hataharep dengan Janah-Hinom intu tapakan hila utara Janah-Repaim. Limbah te garis helat te akan salatan mahalau Janah-Hinom hila salatan kare biring bukit intu lewu Yebus, palus manintu akan En-Rogel,

¹⁷mambelok akan utara akan En-Semes, palus akan Gelilot intu dipah Lungkoh Adumim. Limbah te garis helat te mohon akan Batu Bohan (Bohan iete anak Ruben),

¹⁸palus mahalau hila utara kare biring bukit je hataharep dengan Janah Yordan limbah te mohon akan Janah te,

¹⁹mahalau utara kare biring bukit Bet-Hogla, tuntang hapus intu silan hila utara Tasik Matei intu tumbang Sungei Yordan. Jete helat hila salatan.

²⁰Sungei Yordan iete helat hila timor. Kalote kare helat petak je inenga akan kare keluarga huang suku Benyamin akan manjadi ayun ewen.

²¹Kare lewu ayun kare keluarga huang suku Benyamin, urase aton due walas lewu hai dengan kare lewu korik hakalilinge, iete: Yerikho, Bet-Hogla, Emek-Kesis, Bet-Araba, Semaraim, Betel, Haawim, Para, Opra, Kepar-Haamonai, Opni tuntang Geba.

²⁵Tuntang kea epat walas lewu hai jetoh dengan kare lewu korik hakalilinge: Gibeon, Rama, Beerot, Mispa, Kepira, Mosa, Rekem, Yirpeel, Tarala, Sela, Elep, Yebusi (iete Yerusalem), Gibea tuntang Kiryat-Yearim. Jete kare petak je inenga akan kare keluarga huang suku Benyamin manjadi ayun ewen.