Read Ngaju YOSUA 20 Bible Online

YOSUA 20 - Ngaju bible

YOSUA 20

¹ Limbah te TUHAN manyoho Yosua

²hamauh kilau toh akan oloh Israel, “Aku jari marentah Moses mangat ie mansanan akan keton tahiu kare lewu eka kalindong, iete kare lewu eka oloh tau mandari arep uka mandino kalindong. Toh intih kare lewu te.

³Oloh je mampatei oloh beken dia tantai ihat, tau hadari akan lewu te mangat liwus bara oloh je handak mambaleh mawi ie.

⁴Ie tau hadari akan ije bara kare lewu te, tuntang haguet akan eka basara hong lawang lewu te, palus manarang akan kare pamimpin intu hete taloh je jari manjadi. Kare pamimpin te akan manyoho ie tame lewu te, tuntang manenga akae eka melai.

⁵Amon oloh je handak mambaleh te manggoang ie sampai hete, oloh lewu te dia tau manyarah ie akan oloh te. Ewen musti mangalindonge awi ie mampatei oloh dia tantai ihat, tuntang dia awi aton kasingie.

⁶Ie tau melai intu lewu te sampai ie jari imutus intu taharep oloh are, tuntang sampai oloh je mimbing gawi Imam Hai metoh te matei, limbah te haru oloh te tau buli akan lewu humae eka asale ie solake mandari arepe.”

⁷Intu tanah hila barat Sungei Yordan ungkup Israel manukas kare lewu jetoh kilau lewu kalindong: Kedes intu bukit Naptali hong Galilea, Sikhem intu petak habukit Epraim tuntang Hebron intu petak habukit Yuda.

⁸Intu tanah hila timor Sungei Yordan intu petak lampar padang pasir hila timor Yerikho, ewen manukas kare lewu jetoh kilau lewu kalindong: lewu Beser intu tanah Ruben, lewu Ramot intu Gilead, hong tanah Gad, tuntang lewu Golan intu Basan, tanah Manase.

⁹Jete urase kare lewu eka kalindong je inukas akan hapus ungkup Israel tuntang akan genep bitin oloh bangsa beken je melai intu marak ewen. Genep biti je mampatei oloh beken dia tantai ihat, tau mandino kalindong intu kare lewu te bara oloh je manggoang handak mambaleh mawi ie; ie dia tau impatei amon hindai imutus pakarae intu taharep oloh are.