Read Ngaju YOSUA 21 Bible Online

YOSUA 21 - Ngaju bible

YOSUA 21

¹ Sinde katika kare kapala keluarga huang suku Lewi haguet akan Silo hong lewu Kanaan, tuntang manaharep Imam Eleasar, Yosua anak Nun tuntang kare kapala keluarga hapus kare suku bangsa Israel. Ewen hamauh, “Hajamban Moses, TUHAN jari marentah uka akan ikei, kare oloh Lewi, inenga kare lewu hai akan eka ikei melai tuntang kare petak janah hakaliling kare lewu hai te akan meto ain ikei.”

³Palus oloh Israel manumon parentah TUHAN. Bara tanah ayun ewen kabuat, ewen manenga akan oloh Lewi kare lewu hai je inukas dengan kare petak janah hakalilinge.

⁴Je sola-solake je manarima kare lewue, iete kare keluarga bara jalahan Kehat bara suku Lewi. Kare keluarga turonan Imam Aron inenga telo walas lewu bara tanah suku Yuda, Simeon tuntang Benyamin.

⁵Kare keluarga je beken bara jalahan Kehat inenga sapuluh lewu hai bara tanah suku Epraim suku Dan tuntang suku Manase je intu silan hila barat Sungei Yordan.

⁶Jalahan Gerson mandino telo walas lewu hai intu tanah suku Isaskhar, Aser, Naptali, tuntang suku Manase je intu silan hila timor Sungei Yordan.

⁷Kare keluarga bara jalahan Merari mandino due walas lewu hai intu tanah suku Ruben, Gad tuntang Sebulon.

⁸Kalote oloh Israel mambagi-bagi kare lewu hai te dengan kare petak janahe hapan tenong[9] akan oloh Lewi, kilau je irentah TUHAN mahalau Moses.

⁹Bara jalahan Kehat huang suku Lewi, maka kare Imam turonan Aron te je sola-solake manarima kare lewue; ewen inenga telo walas lewu dengan kare petak janahe. Bara suku Yuda tuntang suku Simeon, ewen manarima jalatien lewu, iete: Libna, Yatir, Estemoa, Holon, Debir, Ain, Yuta, Bet-Semes tuntang Arba, je inyewut manumon aran bapa Enak. Lewu te metoh toh arae Hebron, iete ije lewu eka kalindong intu petak habukit Yuda. Kare tana tuntang kare lewu korik ain lewu hai toh jari inenga akan Kaleb anak Yepune akan jadi petak ayue. Bara suku Benyamin ewen manarima epat lewu, iete: Gibeon, Geba, Anatot tuntang Almon.

²⁰Kare keluarga beken bara jalahan Kehat inenga sapuluh lewu dengan kare petak janahe. Bara suku Epraim ewen manarima epat lewu, iete: Bet-Horon, Kibsaim, Geser tuntang Sikhem, ije lewu eka kalindong intu petak habukit Epraim. Bara suku Dan ewen manarima epat lewu, iete: Elteke, Gibeton, Ayalon tuntang Gat-Rimon. Bara suku Manase je intu hila barat ewen manarima due lewu, iete: Taanakh tuntang Gat-Rimon.

²⁷Kare jalahan beken bara suku Lewi iete jalahan Gerson. Kare keluarga huang jalahan Gerson te inenga telo walas lewu hai dengan kare petak janahe. Bara suku Manase je intu hila timor ewen manarima due lewu hai, iete: Beestera tuntang Golan, ije lewu hai kalindong intu daerah Basan. Bara suku Isaskhar ewen manarima epat lewu hai, iete: Kison, Dobrat, Yarmut tuntang En-Ganim. Bara suku Aser ewen manarima epat lewu hai, iete: Misal, Abdon, Helkat tuntang Rehob. Bara suku Naptali ewen manarima telo lewu hai, iete: Hamat-Dor, Kartan, tuntang Kedes, ije lewu eka kalindong intu Galilea.

³⁴Jalahan je tisae huang suku Lewi, iete jalahan Merari inenga due walas lewu hai dengan kare petak janahe. Bara suku Sebulon ewen manarima epat lewu hai, iete: Yokneam, Karta, Dimna tuntang Nahalal. Bara suku Ruben ewen manarima epat lewu hai, iete: Beser, Yahas, Kedemot tuntang Mepaat. Bara suku Gad ewen manarima epat lewu hai, iete: Mahanaim, Hesbon, Yaeser tuntang Ramot, ije lewu eka kalindong intu Gilead.

⁴¹Bara kare petak je ayun bangsa Israel, aton epat puluh hanya lewu hai karee dengan kare petak janah hakalilinge je inenga akan kare oloh Lewi.

⁴³Kalote TUHAN manenga akan ungkup Israel hapus tanah je jari injanji Awie dengan tato hiang ewen hapan sumpah. Limbah manguasa lewu te, ungkup Israel manetep intu hete.

⁴⁴Tumon je injanji TUHAN akan tato hiang ewen, lewu te sanang mangat awi ingalindong TUHAN. Kare musoh ewen ije mahin jaton je olih malawan ewen, awi TUHAN manenga kamanang akan oloh Israel bara kakare musoh ewen.

⁴⁵TUHAN malalus gagenep janjin Aie akan ungkup Israel; jaton ije je dia Ie malaluse.