Read Ngaju YOSUA 22 Bible Online

YOSUA 22 - Ngaju bible

YOSUA 22

¹Limbah te Yosua mantehau kare oloh bara suku Ruben, Gad tuntang belahe bara suku Manase je melai intu silan hila timor Sungei Yordan.

² Ie hamauh dengan ewen, “Keton jari malalus kakare taloh je irentah Moses rewar TUHAN te, akan keton. Tuntang keton kea jari manumon uras kare parentahku.

³Katahin toh, dia puji keton manalua kare paharin keton, oloh Israel je beken, bajuang kabuat. Keton jari manumon kare parentah TUHAN, Hatallan keton toto-toto.

⁴Maka tumon janjin Aie, TUHAN, Hatallan keton jari manenga kamangat akan kare paharin keton, oloh Israel je beken. Jadi, keleh haluli akan tanah keton kabuat intu silan hila timor Sungei Yordan te je inenga Moses akan keton bihin.

⁵Tinai haga mangat keton manumon kare parentah je irentah Moses akan keton, iete: Sinta TUHAN Hatallan keton, keleh manumon kanahuang Aie, keleh manumon kare parentah Aie, keleh baketep Dengae, tuntang keleh manempo Ie dengan salepah atei tuntang dengan salepah hambaruam.”

⁶Limbah te Yosua manenga berkate tuntang malapas ewen haluli akan tanah ewen hayak manenga peteh toh, “Toh keton tatau tuntang keton haluli hayak mimbit are meto, perak, amas, tambaga, sanaman tuntang pakaian. Keleh mambagi-bagi kea taloh rampas keton te akan kare oloh sama suku keton je beken.” Palus suku Ruben, Gad tuntang suku Manase je intu hila timor Yordan te malihi oloh Israel je beken, palus haguet bara Silo intu Kanaan manintu tanah ewen kabuat intu daerah Gilead. Ewen melai tanah te awi parentah TUHAN mahalau Moses. (Saparo suku Manase jari manarima bara Moses, tanah je intu silan hila timor Sungei Yordan, tuntang saparo suku Manase je beken manarima bara Yosua tanah intu silan hila barat Sungei Yordan haya-hayak dengan kare suku je beken.)

¹⁰Katika suku Ruben, Gad, tuntang Manase intu hila timor Yordan te sampai intu Gelilot — magon intu silan hila barat Sungei Yordan — ewen mampendeng ije Mesbeh je hai tuntang bahalap tokep sungei.

¹¹Kare oloh Israel beken mahining sama-sama bangsa ewen hamauh, “Kare oloh suku Ruben, Gad, tuntang Manase intu hila timor Yordan jari mampendeng ije mesbeh intu Gelilot tokep Sungei Yordan intu hila tanah itah!” Maka ewen uras hapumpong intu Silo handak mamarang kare suku Israel je intu silan hila timor Sungei Yordan te.

¹³Palus Pinehas, anak Imam Eleasar, inyoho awi ungkup Israel manalih suku Ruben, Gad, tuntang Manase je intu daerah Gilead hong timor Yordan.

¹⁴Haya-hayak dengan Pinehas haguet kea sapuluh kapala bangsa Israel, — ije biti bara genep suku intu silan hila barat Sungei Yordan, tuntang gagenep ewen te iete kapala keluarga huang jalahan ewen.

¹⁵Maka ewen sampai intu eka suku Ruben, Gad tuntang Manase intu tanah Gilead.

¹⁶ Palus huang aran ungkup TUHAN, ewen hamauh dengan kare oloh bara suku Ruben, Gad tuntang suku Manase te, “Mbuhen keton malalus taloh je papa toh taharep Hatallan Israel? Dengan mamangun mesbeh kabuat, keton malawan TUHAN! Keton dia tinai manumon kare parentah Aie!

¹⁷ En keton dia mingat dosan itah intu Peor? Metoh te itah ihukum TUHAN hapan ije panyakit, aloh itah toh ungkup Ayue kabuat! Sampai toh itah magon mangkeme angate ganan gawi te. En jete hindai sukup kea?

¹⁸Tinai toh, en keton handak manalikut TUHAN tinai? Amon andau toh keton malawan TUHAN, jewu Ie akan sangit dengan hapus ungkup Israel.

¹⁹Amon tanah keton te papa tuntang dia patut indu eka sombayang akan TUHAN, bindah ih akan hetoh akan tanah TUHAN, eka aton Kemah TUHAN. Laku belahe daerah ikei, tapi ela malawan TUHAN atawa malawan ikei hayak mandahang ije mesbeh beken, padahal jari aton mesbeh TUHAN, Hatallan itah.

²⁰ Ingat, Akhan anak Serah dia maku manumon parentah TUHAN tahiu kare ramo je musti impalomos, tuntang narai kajariae? Hapus ungkup Israel ihukum! Je badosa baya Akhan, tapi je matei dia ie kabuat!”

²¹Palus kare oloh suku Ruben, Gad, tuntang Manase intu silan hila timor te tombah,

²²“Je Pangkahain Kuasae iete TUHAN! Ie katawan mbuhen ikei malalus taloh toh, tuntang ikei handak mangat keton kea katawae! Amon ikei malalus toh dengan maksud malawan TUHAN atawa ikei dia parcaya tinai Dengae, nauhe ikei matei metoh toh kea!

²³TUHAN kabuat je mahukum ikei, amon ikei bara kanahuang malawan TUHAN tuntang mampendeng mesbeh ikei kabuat eka maluput parapah je ingehu atawa parapah gandom atawa parapah tarimakasih hunjue.

²⁴Jete dia maksud ikei, kare pahari! Ikei mampendeng mesbeh toh, awi ikei mikeh akan hong harian andau turonan keton hamauh dengan turonan ikei, “Keton jaton hubungan en-en dengan TUHAN Hatallan Israel!

²⁵Item, ie mina Sungei Yordan toh intu bentok itah iete mangat mamisah ikei dengan keton kare oloh Ruben tuntang Gad. Toto turonan keton jaton hubungan en-en dengan TUHAN.

²⁶Jadi, ikei mampendeng Mesbeh toh, dia akan parapah je ingehu atawa akan kare parapah ikei,

²⁷tapi akan jadi tanda akan itah hasansila, tuntang akan turonan itah hong harian andau, iete toto ikei toh sombayang intu TUHAN hong Kemah TUHAN hayak mimbit parapah je ingehu, kare parapah je beken tuntang parapah tarimakasih. Tagal te turonan keton dia akan manyewut turonan ikei kareh dia manempo TUHAN.

²⁸Jadi, kahandak ikei iete: Amon turonan keton hamauh kalote, maka turonan ikei tau hamauh, ‘Item mesbeh te! Tato hiang ikei mampandeng ije mesbeh je kilau mesbeh TUHAN, dia akan eka maluput parapah je ingehu atawa parapah je beken, tapi manjadi akan tanda itah hansansila.’

²⁹Percaya bewei, ikei dia handak malawan TUHAN atawa terai manempo Ie dengan mandahang mesbeh beken akan parapah papui atawa parapah gandom atawa akan parapah je beken, awi mesbeh TUHAN, Hatallan itah jari aton intu baun Kemah TUHAN.”

³⁰Uras je inarang awi kare oloh suku Ruben, Gad tuntang suku Manase intu silan hila timor te ihining awi Imam Pinehas hayak sapuluh pamimpin oloh Israel bara silan barat Sungei Yordan. Maka ewen palus hanjak mahining panombah te.

³¹Palus koan Pinehas, anak Imam Eleasar, akan kare oloh suku Ruben, Gad, tuntang Manase timor, “Toh ikei katawan TUHAN hinje itah, awi keton dia malawan Ie. Keton jari manyalamat ungkup Israel bara hukuman TUHAN.”

³²Limbah te Pinehas balalu haguet dengan kare kapalan Israel te. Ewen malihi kare oloh Ruben tuntang Gad te intu Gilead, palus haluli akan Kanaan, limbah te mansuman taloh te akan ungkup Israel.

³³Ungkup Israel kea hanjak mahining taloh te, sampai ewen manara Hatalla. Ewen dia hakotak tinai tahiu kanahuang ewen akan manyarang kare oloh Ruben tuntang Gad, tuntang akan mampalomos lewue.

³⁴Suku Ruben tuntang Gad te balalu hamauh, “Mesbeh toh jadi saksi akan itah urase je TUHAN iete Hatalla.” Palus ewen manampa aran Mesbeh te “Saksi”.