Read Ngaju YOSUA 23 Bible Online

YOSUA 23 - Ngaju bible

YOSUA 23

¹Tahi limbah TUHAN manenga kasanai akan ungkup Israel; ewen dia tinai inderoh awi ancaman musoh. Metoh te Yosua jari bakas toto.

²Palus ie mantehau hapus ungkup Israel, kare oloh basewut, kare pamimpin, kare hakim, tuntang kare perwira, balalu hamauh, “Aku metoh toh jari bakas.

³Keton jari mite taloh handiai je ilalus TUHAN, Hatallan keton akan hapus bangsa intu hetoh tagal keton. Je hakalahi akan keton jete TUHAN, Hatallan keton kabuat.

⁴Tanah kare bangsa je magon batisa, kalote kea tanah hapus bangsa je jari impakalah Awie, iete tanah je hambirang bara silan timor Sungei Yordan palus sampai akan Tasik Bentok, urase jari imbagiku akan keton jadi ayun keton.

⁵TUHAN, Hatallan keton akan mawi kare bangsa te mikeh balalu undur tuntang hadari malihi keton amon keton haguet mamarang ewen. Keton manduan lewun ewen, kilau je jari injanji TUHAN, Hatallan keton akan keton.

⁶Awi te, haga uka keton manumon tuntang malalus uras kare taloh je tarasurat huang buku Atoran Moses. Ije mahin ela bara kare parentah te ilanggar.

⁷Awi te keton dia akan hewoi dengan kare bangsa je magon melai intu marak keton. Keton dia akan manyewut aran kare dewa ain ewen atawa sumpah mahapan aran te. Keton kea dia sombayang atawa sontop akan kare dewa te.

⁸Keton haream je harajur baketep manempo TUHAN, kilau je jari ialalus keton sampai toh.

⁹Kare bangsa je hai tuntang abas jari iharak TUHAN akan keton; ije mahin jaton bara ewen je olih malawan keton.

¹⁰ Genep biti intu marak keton tau mampakalah bakoya-koyan biti, awi TUHAN, Hatallan keton te je parang akan keton, kilau je jari injanji Awie.

¹¹Awi te, ingat keleh sinta TUHAN, Hatallan keton.

¹²Amon keton dia baketep tuntang keton hewoi dengan kare bangsa je magon melai intu marak keton, tuntang keton kawin dengan ewen,

¹³ingat, pasti TUHAN, Hatallan keton dia akan maharak kare bangsa te tinai akan keton. Malengkan ewen akan manjadi bahaya hai akan keton, awi ewen akan jadi kilau jarat atawa sama kilau jaring akan keton. Palus ewen akan mawi keton paham uyuh; awi ewen akan jadi sama kilau tali cambuk intu likut keton atawa kilau duhi huang matan keton. Keton akan harajur kapehe sampai jaton ije bara keton je balihi intu lewu je bahalap toh je inenga TUHAN, Hatallan keton akan keton.

¹⁴Toh jari sampai katikae aku matei. Keton samandiai, genep biti katawan toto je TUHAN, Hatallan keton jari manenga akan keton uras taloh je bahalap je injanji Awie. Genep janjin Aie jari ilalus Awie, ije mahin jaton je dia Ie malaluse.

¹⁵Tapi kilau Ie malalus gagenep janjin Aie dengan keton, kalote kea Ie pasti malalus gagenep ancaman Ayue mawi keton.

¹⁶Amon keton malanggar janji je jari irentah akan keton awi TUHAN, Hatallan keton mangat inumon, tuntang keton haguet sombayang akan kare hatalla beken hayak manyembah kare hatalla te, palus TUHAN akan sangit, tuntang mahukum keton. Hong katika je pandak uras keton akan lilap bara lewu je bahalap toh; je inenga TUHAN akan keton.”