Read Ngaju YOSUA 24 Bible Online

YOSUA 24 - Ngaju bible

YOSUA 24

¹Yosua mamumpong uras suku bangsa Israel intu Sikhem, palus manyoho kare oloh basewut, pamimpin, hakim tuntang kare perwira dumah manaharep. Palus ewen dumah manaharep Hatalla.

² Limbah te Yosua hamauh dengan ewen samandiaie, “Hining taloh je insanang TUHAN, Hatallan Israel akan keton, ‘Horan metoh tato hiang keton melai intu dipah Sungei Euprat, tuntang manyembah kare dewa. Ije bara ewen iete Terah, bapa Abraham tuntang Nahor.

³ Palus ewen manduan Abraham tato keton te, bara lewu intu dipah Euprat te, tuntang manyoho ie mangombang hapus lewu Kanaan. Aku manenga akae are turonan. Solake inenga-Ku Isaak akae,

⁴ palus akan Isaak inenga-Ku due biti anak, iete Yakob tuntang Esau. Aku manenga akan Esau petak habukit Edom jadi petak ayue; tapi Yakob tato keton te bindah akan Misir, hayak dengan kare anake.

⁵ Limbah te Aku manyoho Moses tuntang Aron, mantakan Misir dengan calaka hai, balalu Aku mampalua keton bara hete.

⁶ Aku mimbit tato hiang keton te balua bara Misir, palus oloh Misir manggoang ewen hapan kareta parang tuntang tantara manungkang kuda. Tuntang katika tato hiang keton te sampai intu Tasik Raruju,

⁷ewen mangkariak manalih Aku balaku awat. Palus eka helang ewen dengan kare oloh Misir te ingaput-Ku. Palus inyangkulep-Ku oloh Misir hapan danum tasik sampai ewen uras leteng. Keton jari katawan uras taloh je ilalus-Ku mawi Misir. Tahi toto keton melai intu padang pasir.

⁸ Palus Aku mimbit keton akan lewun oloh Amori je melai intu silan hila timor Sungei Yordan. Ewen mamarang keton, tapi Aku mawi keton manang malawan ewen. Keton marampas lewun ewen, tuntang Aku mampalomos ewen.

⁹ Palus raja Moab iete Balak intu Sipor, malawan keton. Ie manyoho oloh akan Bileam anak Beor tuntang balaku mangat Bileam manyapa keton.

¹⁰Tapi Aku dia maku manumon kahandak Bileam, palus ie mamberkat keton. Kalote Aku manyalamat keton bara Balak.

¹¹ Limbah te keton dimpah Sungei Yordan, tuntang sampai intu Yerikho. Kare oloh Yerikho mamarang keton, kalote kea oloh Amori, oloh Feris, Kanaan, Het, Girgasi, Hewi tuntang oloh Yebusi. Tapi Aku manenga akan keton kamanang malawan kakare ewen.

¹² Katika keton miar manyarang ewen Aku mawi ewen nihau akale tuntang mikeh, sampai kadadue raja bara Amori te hadari malihi keton. Dia padangm tuntang dia kea panahm je mawi keton manang.

¹³ Tanah je inenga-Ku akan keton, inarima keton dia dengan kaheka. Kare lewu je inenga-Ku akan keton dia keton je mampendenge. Tapi toh keton je melai hong hete, tuntang keton kea je mangkeme bua anggor hayak saitune, padahal dia keton je mimbule.’ ”

¹⁴“Jadi toh,” koan Yosua tinai, “Keleh mahormat TUHAN. Keleh manempo Ie dengan kahias atei tuntang dengan baketep. Kanan kare hatalla beken je inyembah awi tato hiang keton horan intu Mesopotamia tuntang Misir. Keleh baya manempo TUHAN bewei.

¹⁵Amon keton dia maku manempo TUHAN, keleh mamutus andau toh kea, akan eweh keton nahuang manempo: akan kare hatalla beken je inyembah awi tato hiang keton intu Mesopotamia horan atawa akan kare hatallan oloh Amori je lewue ielai keton toh. Tapi ikei — aku tuntang keluargaku — baya handak manempo TUHAN bewei.”

¹⁶Palus ungkup Israel tombah, “Ikei samasinde dia akan malihi TUHAN balalu manempo kare hatalla beken.

¹⁷TUHAN, Hatallan itah bewei je mambebas tato hiang itah tuntang itah kabuat bara kahajipen intu Misir. Itah jari mite kare taloh heran je inenga awi TUHAN. TUHAN harajur mangalindong itah huang hapus pangguet itah, mahalau kare tanah bangsa beken.

¹⁸Tuntang katika itah tame lewu toh, TUHAN maharak uras oloh Amori je melai intu hetoh. Jadi, ikei nahuang manempo TUHAN, awi ie Hatallan itah.”

¹⁹Palus Yosua hamauh, “Tapi keton tau dia olih manempo TUHAN, awi Ie Hatalla je barasih, je tonggal. Ie dia nahuang aton je manyama Ie. Amon keton malihi Ie tuntang manempo kare hatalla beken, Ie dia akan mampun dosan keton. Malengkan Ie akan malawan tuntang mahukum keton. Ie akan mambinasa keton, aloh bihin Ie bahalap dengan keton.”

²¹Palus kare oloh Israel te tombah, “Dia! Ikei dia akan manempo kare hatalla beken. Ikei baya manempo TUHAN.”

²²Balalu Yosua hamauh, “Nah, keton kabuat saksie je keton jari mamutus uka menempo TUHAN bewei.” “Toto,” koan ewen, “ikei kabuat saksie.”

²³“Amon kalote, kanan kare hatallan kare bangsa beken je aton intu keton te,” Koan Yosua, “tuntang bajanji, je keton akan baketep manempo TUHAN, Hatallan Israel.”

²⁴Palus kare oloh te hamauh dengan Yosua, “Ikei baya manempo TUHAN, Hatallan itah. Ikei akan manumon kare parentah Aie.”

²⁵Maka andau te intu Sikhem Yosua mawi janji dengan ungkup Israel; tuntang intu hete ie manenga akan ewen kare parentah tuntang kare atoran je musti inumon awi ewen.

²⁶Uras parentah tuntang atoran te inyurate intu buku Parentah Hatalla. Limbah te ie manduan ije batu hai, palus mampendenge intu penda batang kayu je hai intu eka je tantai akan TUHAN.

²⁷Limbah te Yosua hamauh dengan kakare oloh te. “Batu toh jadi saksi akan itah. Uras kare auh je insanan TUHAN akan itah, jari insanan intu hila baun batu toh. Jadi batu toh je akan jadi saksi taharep keton, indu pampingat keton uka dia malawan Hatallan keton.”

²⁸Limbah te Yosua manyoho oloh are te buli; palus ewen urase haluli akan tanah ewen kabuat.

²⁹Limbah te Yosua anak Nun, rewar TUHAN te, matei hong umur saratus sapuluh nyelo.

³⁰ Ie ingubur intu petak ayue kabuat intu Timnat-Serah intu eka je petake habukit Epraim hila utara Bukit Gaas.

³¹Katahin Yosua belom, ungkup Israel manempo TUHAN. Tuntang limbah ie malihie, ewen magon tetep manempo TUHAN katahin magon aton kare pamimpin intu marak ewen je jari manyaksi kabuat taloh handiai je ilalus TUHAN akan ungkup Israel.

³² Hantun Yosep je imbit awi ungkup Israel bara Misir, ingubur intu Sikhem intu petak je jari imili Yakob dengan rega saratus duit perak bara kare anak Hemor, bapa Sikhem. Petak te iwaris akan turonan Yosep.

³³Limbah te Eleasar anak Aron matei kea, tuntang ingubur intu Gibea, iete lewu je aton intu tanah habukit Epraim. Lewu te jari inenga akan Pinehas, anak Eleasar.