Read Ngaju YOSUA 3 Bible Online

YOSUA 3 - Ngaju bible

YOSUA 3

¹Andau jewue Yosua tuntang hapus ungkup Israel misik susong, palus malihi eka kare kemah ewen intu Sitim, tuntang haguet akan Sungei Yordan. Intu hete ewen mampendeng kemah sambil mentai katikae akan dimpah.

²Limbah mahalau telo andau, kare pamimpin kaliling manalih hapus kare kemah.

³Ewen manenga parentah toh akan ungkup Israel, “Amon keton mite kare imam mamikul Patin Janjin TUHAN, Hatallan keton, keleh keton kea haguet malihi eka kare kemah toh. Nuntut Pati te,

⁴tapi ela mananjong lalau tokep dengan Pati te; nuntut bara likut, ije kilometer kakejaue. Tumon te keton akan katawan jalan je akan ihalau keton, awi keton hindai puji akan tanah toh.”

⁵Yosua hamauh dengan ungkup Israel, “Keleh keton mamparasih arep, awi jewu TUHAN handak malalus taloh heran intu bentok keton.”

⁶Palus Yosua marentah kare Imam uka manggatang Patin Janji te palus haguet mananselo ungkup Israel. Ewen palus malalus parentah Yosua.

⁷TUHAN hamauh dengan Yosua, “Nampara andau toh ikau handak iawi-Ku oloh hai sampai hapus ungkup Israel mahormat ikau tuntang mangatawan Aku je mampahayak ikau sama kilau Aku mampahayak Moses.

⁸Toh rentah kare imam je mamikul Patin Janji te uka sana ewen sampai intu sungei, ewen sewu akan danum hong sungei te tuntang mendeng tokep sarae.”

⁹Palus Yosua mantehau kare oloh Israel, tuntang hamauh, “Kantoh hining taloh je irentah TUHAN, Hatallam akan keton.

¹⁰Amon keton miar kareh, TUHAN batantu maharak oloh Kanaan, Het, Hewi, Peris, Girgasi, Amori tuntang Yebusi. Tinai metoh Patin Janjin TUHAN tempon salepah petak dimpah Yordan mananselo keton, keton akan mite ie Hatalla je belom aton intu bentok keton.

¹²Toh keleh keton mintih due walas biti-ije biti bara genep suku Israel.

¹³Kareh amon kare imam je mamikul Patin Janjin TUHAN mahunje danum Sungei Yordan te, dehes danume akan bagetu; danum je mahasor bara ngaju akan tende haleleng intu ije eka.”

¹⁴Metoh te kanjeran wayah getem; bahut danum Sungei Yordan handalem. Katika oloh Israel malihi kare kemah ewen uka dimpah Sungei Yordan, kare imam mananjong labih helo sambil mimbit Patin Janji. Palus metoh kare imam te mahunje danum sungei,

¹⁶hemben te kea dehes sungei te bageto. Kejau intu hila ngaju sungei, danume tende haleleng intu Adam, ije lewu je aton intu hila silan lewu Sartan. Danum intu hila ngawa je mahasor akan Tasik Matei bageto samasinde, sampai ungkup Israel tau dimpah hong hunjun petak keang tandipah dengan lewu Yerikho. Kare imam je mamikul Patin Janji te tetep mendeng intu bentok sungei sampai hapus ungkup Israel sampai akan dipah.