Read Ngaju YOSUA 4 Bible Online

YOSUA 4 - Ngaju bible

YOSUA 4

¹Limbah hapus bangsa te jari aton intu dipah, TUHAN hamauh dengan Yosua,

²“Intih due walas biti, ije biti bara genep suku.

³Rentah ewen uka manduan due walas kabawak batu bara bentok Sungei Yordan, bara eka kare pain imam mendeng. Nyoho ewen meton kare batu te sampai eka keton mampendeng kemah hamalem kareh.”

⁴Palus Yosua mantehau due walas biti je buah intih te,

⁵koae, “Lius akan bentok Sungei Yordan, akan hila baun Patin Janjin TUHAN, Hatallan keton. Genep biti manggatang ije kabawak batu bara hete — samandiaie aton due walas batu tumon kare suku hong bangsa Israel.

⁶Kare batu te akan mampingat bangsa toh tahiu taloh je jari ilalus awi TUHAN. Hong harian andau amon kare anakm misek narai riman kare batu toh akan keton,

⁷keleh keton mansanan akan ewen iete danum Sungei Yordan bageto metoh Patin Janjin TUHAN iimbit dimpah Sungei Yordan te. Kare batu te akan harajur mampingat bangsa Israel tahiu taloh je manjadi hong hetoh.”

⁸Due walas oloh te palus malalus parentah Yosua. Tumon atoh TUHAN dengan Yosua, ewen manduan due walas batu bara bentok Sungei Yordan — karee tumon kare suku bangsa Israel — palus mimbite akan eka ewen mampendeng kemah, balalu mempelaie hete.

⁹Intu bentok Yordan te kea, Yosua manyusun due walas kabawak batu puna intu eka kare imam mendeng mamikul Patin Janji te. (Kare batu te magon aton intu hete sampai toh).

¹⁰Kare imam tetep mendeng intu bentok Yordan sampai kare oloh te lepah malalus uras je irentah TUHAN akan ewen mahalau Yosua. Jete tumon kare atoh bara Moses akan Yosua. Ungkup Israel bajeleng dimpah Sungei Yordan.

¹¹Limbah uras oloh sampai intu dipah, kare imam je mamikul Patin Janji te mananjong intu hila baun ewen.

¹²Tumon je irentah awi Moses, kare tantara bara suku Ruben, Gad tuntang satengah suku Manase, jari labih helo dimpah

¹³Karee samandiaie 40.000 biti hatue je mahapan pakakas parang tatap akan parang. Intu taharep TUHAN, ewen dimpah manintu petak randah tokep Yerikho.

¹⁴Andau te TUHAN malalus kare taloh je mawi bangsa Israel mahormat Yosua kilau oloh hai. Sampai hapus umure ewen mahormat ie kilau ewen mahormat Moses.

¹⁵Limbah te TUHAN manyoho Yosua

¹⁶marentah kare imam je mamikul Patin Janji te uka balua bara Yordan.

¹⁷Yosua malalus taloh je irentah TUHAN akae.

¹⁸Sana kare imam te sampai intu saran sungei, danum te manampara mahasor haluli tuntang handalem kilau solake.

¹⁹Ungkup Israel sampai akan dipah Yordan hong tanggal sapuluh bulan ije. Ewen palus mampendeng kemah intu Gilgal hila timor Yerikho.

²⁰Intu hete Yosua manyusun due walas batu je induae bara huang Yordan.

²¹Palus Yosua hamauh dengan ungkup Israel, “Rahian andau amon kare anak keton misek tahiu riman kare batu toh,

²²sanan akan ewen iete ungkup Israel dimpah Sungei Yordan intu hunjun petak je keang.

²³Nyarita akan ewen iete TUHAN, Hatallan keton mampateah danum Sungei Yordan te akan keton sampai keton urase sampai akan dipah, sama kilau ie mampateah Tasik Raruju akan ikei,

²⁴uka uras oloh hong kalunen katawan lalehan kahaie kuasan TUHAN. Tagal te keton akan mahormat TUHAN, Hatallan keton sampai katatahie.”