Read Ngaju YOSUA 5 Bible Online

YOSUA 5 - Ngaju bible

YOSUA 5

¹Uras raja Amori intu silan barat Sungei Yordan, tuntang uras raja Kanaan intu saran Tasik Bentok mahining tahiu Sungei Yordan jari impateah awi TUHAN katahin ungkup Israel dimpah sungei te. Ewen palus mikeh tuntang hagenjeh awi oloh Israel.

²Metoh te TUHAN hamauh dengan Yosua, “Tampa pisau bara batu, palus awi tinai upacara sunat akan kare oloh Israel.”

³Balalu Yosua malalus parentah TUHAN, tuntang manyunat kare oloh Israel intu eka je inggare Bukit Sunat.

⁴ Metoh kare oloh Israel balua bara Misir, uras oloh hatue jari inyunat. Tapi metoh ewen manamuei intu padang pasir epat puluh nyelo katahie, kare anak ewen ije mahin hindai aton je inyunat. Tuntang intu lawin katika epat puluh nyelo te, oloh hatue je metoh balua bara Misir jari sampai umur je patut akan tame tantara, urase jari matei, awi dia manumon parentah TUHAN. Maka hasaroroi dengan sumpah TUHAN, ewen dia inyoho tame akan tanah je jaton bara katapas tuntang basiwoh je injanji Awie akan tato hiang ain ewen.

⁷Jete bukue uras anak hatue ain ewen hindai inyunat. Angkatan je rahian toh je inyunat awi Yosua.

⁸Limbah ewen uras jari inyunat, ewen melai intu kemah sampai himang ewen te keleh.

⁹TUHAN hamauh dengan Yosua, “Andau toh kahawen keton je kilau jipen intu Misir jari inganan awi-Ku.” Awi te eka toh inyewut Gilgal[1] sampai katika toh.

¹⁰ Metoh ewen melai kemah intu Gilgal hong petak rampar tokep Yerikho, ungkup Israel mahaga Paska hong halemei tanggal epat walas bulan te.

¹¹Andau jewue, tingkat je solake ewen kuman panginan hasil lewu Kanaan, iete: rote dia iragi tuntang gandom je imaru,

¹² Hong andau te kea manhu dia manjato tinai bara langit, tuntang oloh Israel terai kuman manhu. Bara katika te ewen kuman hasil tanah Kanaan.

¹³Sinde katika metoh Yosua aton intu tokep Yerikho salenga ie mite ije biti oloh hatue mendeng intu hila baue mimbing padang inyilak. Yosua manokep oloh te tuntang hamuh, “Ikau toh sobat, atawa musoh?”

¹⁴“Dia sobat, tuntang dia kea musoh,” tombah oloh te. “Aku dumah akan hetoh kilau pangkalima je mamimpin tantara ain TUHAN.” Mahining auh te Yosua palus sontop manyembah oloh te. Yosua hamauh, “Aku toh rewar Tuan. Narai je tau iawiku akan Tuan?”

¹⁵Pangkalima pamimpin tantara TUHAN te tombah, “Engkak sapatum, petak je ekam mendeng toh petak barasih.” Balalu Yosua mengkak sapatue.