Read Ngaju YOSUA 6 Bible Online

YOSUA 6 - Ngaju bible

YOSUA 6

¹Intu lewu Yerikho kare bauntonggang lawang injaga rantep tuntang iatep rapa-rapat mangat uras oloh Israel dia tau tame. Ije mahin dia je tau balua atawa tame akan lewu te.

²TUHAN hamuh dengan Yosua, “Toh aku manyarah akam Yerikho dengan rajae tuntang uras tantarae je bahanyi-bahanyi te.

³Ikau tuntang tantaram baris mangaliling lewu te sinde jandau katahin jahawen andau.

⁴Uju biti imam, genep bitie mimbit tarompet, mananjong intu hila baun Patin Janji. Intu andau je kauju, ikau tuntang tantaram mananjong mangaliling lewu te uju tingkat sambil kare imam mahimon tarompete.

⁵Limbah te kare imam te balalu mahimon tarompete mahapan auh je panjang. Sana keton mahining auh je panjang te, uras tantara malahap hai auhe, palus dinding lewu te kareh balongkang. Balalu keton uras tame lewu te.”

⁶Limbah te Yosua mantehau kare imam, tuntang hamauh, “Gatang Patin Janji te; uju biti bara marak keton mananjong intu hila baue sambil mimbit tarompet.”

⁷Palus Yosua manyoho tantarae baris mangliling lewu te, inanselo awi baris tantara je manjaga hila baun je mananjong helo bara Patin Janjin TUHAN.

⁸Tumon parentah Yosua, baris tantara je manjaga hila baun haguet mananselo kare imam je mahimon tarompet, intuntut awi kare imam je mamikul Patin Janji, limbah te inutup awi baris tantara je manjaga hila likut. Sambil metoh ewen mananjong; tarompet impahiau raju-rajur.

¹⁰Uras tantara jari irentah uka dia malahap tuntang dia hakotak aloh ije kabawak kotak amon Yosua hindai manenga tanda.

¹¹Kalote Yosua manyoho tantarae mimbit Patin Janji mangliling lewu te sinde tingkat, limbah te haluli akan eka kare kemah, tuntang bamalem intu hete.

¹²Susong hanjewu jewue, Yosua misik palus akan tingkat je kaduee kare imam tuntang tantara babaris mangaliling lewu te tumon ampin retei baris je andau heloe te; tamparae baris tantara je manjaga hila baun, limbah te uju imam je mahimon tarompet, inuntut awi kare imam je mamikul Patin Janji, tuntang hila likut inutup awi baris tantara je manjaga hila likut. Sambil metoh te tarompet impahiau raju-rajur.

¹⁴Intu andau je kadue te ewen mangaliling lewu sinde tingkat limbah te haluli akan eka kare kemah, kalote ilalus ewen genep andau katahin jahawen andau.

¹⁵Hong andau je kaujue ewen misik hanjewu metoh matanandau harue lembut. Palus ewen babaris uju tingkat mangaliling lewu Yerikho te dengan cara je sama. Baya hong andau je kauju te bewei, ewen mangaliling lewu te uju tingkat.

¹⁶Hong tingkat je kauju, sana kare imam mahimon tarompete, Yosua manenga tanda akan hapus pasukan uka malahap. Yosua hamauh, “TUHAN jari manyarah lewu toh akan keton!

¹⁷Hapus lewu dengan salepah huange imbinasa samasinde kilau parapah akan TUHAN. Baya Rahab bawin lontei te, dengan tundah kolae bewei tau inalua belom, awi ie jari mandohop kare oloh kalati ain itah.

¹⁸Dia tau manduan taloh en-en bara kakare taloh je musti imbinasa, amon keton manduae, kare kemah Israel akan buah calaka tuntang kajake.

¹⁹Uras ramo perak, amas, tambaga tuntang sanaman ingabeken akan TUHAN, tuntang ingkes intu huang eka mingkes ramo ayun TUHAN.”

²⁰ Palus kare imam mahimon kare tarompete. Sana kare oloh Israel mahining auh tarompet te, ewen malahap hai auhe, palus dinding lewu Yerikho balongkang. Uras tantara Israel palus mandai, tuntang tame akan lewu te hayak marampase.

²¹Uras taloh je aton intu huang lewu te, bakas tabela, bawi hatue, impatei hapan padang. Uras kare meto sapi, tabiri tuntang kalidai mahin impatei.

²²Akan kadadue biti je jadi oloh kalati, Yosua hamuh, “Lius akan human bawin lontei te, tuntang imbit ie balua haya-hayak dengan kaluargae kilau je injanji keton akae.”

²³Maka kadadue oloh kalati te haguet tuntang mimbit Rahab balua hayak dengan indu bapae, kare paharie, tuntang tundah kolae je beken. Hapus keluarga Rahab te dengan kare reware imbit balua akan eka je dia aton parang tokep eka kare kemah oloh Israel.

²⁴Limbah te tantara Israel mamapui lepah hapus lewu te dengan kare taloh samandiai je aton intu huange, kacuali kare amas, perak, tambaga tuntang sanaman. Kare ramo te induan ewen tuntang iimbit akan eka mingkes ramo ayun TUHAN.

²⁵ Tapi Rahab bawin lontei te dengan hapus tundah jalahae inalua belom awi Yosua, awi ie jari mandohop kadadue oloh kalati je inyoho Yosua akan Yerikho. (Sampai andau toh turonan Rahab magon aton hong Israel.)

²⁶ Metoh te Yosua mawi atoran mangahana jetoh, “Ewe-eweh je handak mamangun haluli lewu Yerikho toh, akan buah sapa awi TUHAN. Eweh je mandak galange akan nihau anak bakase; tuntang eweh je mangkepan kare bauntonggang tuntang lawange akan nihau anak je tambusue.”

²⁷TUHAN mampahayak Yosua, tuntang aran Yosua palus basewut hong hapus lewu te.