Read Ngaju YOSUA 7 Bible Online

YOSUA 7 - Ngaju bible

YOSUA 7

¹TUHAN jari marentah akan ungkup Israel iete bara taloh samandiai intu lewu Yerikho je musti imbinasa, ije mahin dia tau induan. Tapi parentah te dia inumon. Ije biti oloh hatue arae Akhan malanggar parentah te, mawi TUHAN sangit toto dengan ungkup Israel. (Bapa Akhan arae Karmi tuntang buee arae Sabdi bara jalahan Serah hong suku Yuda.)

²Metoh te Yosua manyoho pire-pire biti oloh bara Yerikho akan Ai, iete ije lewu hila timor Betel, tokep Bet-Awen. Kare oloh te inyohoe haguet mangalati tanah te. Limbah ewen malalus gawi te,

³ewen haluli tuntang mansanae akan Yosua. Ewen hamauh, “Dia perlu uras itah haguet manyarang Ai. Soho ih kira-kira due atawa telo kuyan biti. Ela manyoho uras tantara akan kanih mangat parang, awi lewu te korik bewei.”

⁴Jadi je haguet manyarang lewu te baya telo koyan biti, tapi ewen kalah balalu hadari undur.

⁵Kare oloh Ai manggoang ewen bara lawang lewu Ai sampai akan petak tambang, palus mampatei kira-kira telo puluh jahawen biti intu biring. Palus oloh Israel nihau akale tuntang mikeh.

⁶Yosua tuntang kare kapalan ungkup Israel paham pehe atei sampai ewen marabi-rabit pakaian ewen. Hapus andau sampai hamalem ewen sontop intu baun Patin Janji TUHAN hayak mandak kawo intu takolok ewen kilau tanda pehe atei.

⁷Yosua hamauh dengan TUHAN, “O Hatalla, TUHAN aingku! Kanduem mimbit ikei sampai akan dipah Yordan toh? En uka manyarah ikei akan kare oloh Amori? Mangat ikei matei? Labih bahalap ikei melai intu kanih bewei, dipah Yordan!

⁸O TUHAN! Musoh jari mampakalah oloh Israel sampai ewen hadari undur. Toh narai je patut insanangku?

⁹Oloh Kanaan tuntang hapus oloh beken intu tanah toh akan mahining tahiu taloh te. Ewen akan mangapong tuntang mampatei ikei urase! Palus narai je akan iawim uka mahaga hormat Aim?”

¹⁰TUHAN tombah auh Yosua, “Mendeng! Jaton gunae ikau sontop kilau te sampai petak!

¹¹Oloh Israel jari mawi dosa. Aku jari marentah uka ewen manumon janjin ewen dengangku, tapi ewen malanggar! Kare ramo je musti impalomos jari induan ewen. Ewen manakau tuntang manyahokae marak kare ramon ewen mangat dia gitan.

¹²Jete bukue ewen dia olih manang manaharep musoh. Ewen inamburop undur awi musoh ganan ewen kabuat kea jari ihukum uka imbinasa. Aku dia akan mampahayak ewen tinai, amon kare ramo je dia tau induan te hindai impalomos.

¹³Toh mendeng, Yosua! Parasih ungkup Israel tuntang soho ewen tatap uka naharep Aku. Rentah ewen uka tata-tatap jewu, awi Aku TUHAN, Hatallan Israel akan mansanan toh akan ewen: ‘O kare oloh Israel! Kare ramo je jari irentah-Ku keton uka impalomos, belahe aton intu keton. Sahindai keton manganan kare ramo te, keton dia akan olih manang malawan musoh!’

¹⁴Awi te, Yosua, sanan akan ewen iete hanjewu jewu ewen iriksa mije-mije suku. Amon Aku manunjok ije suku, uras jalahan suku te akan baun mije-mije jalahan. Tuntang amon Aku maninjok ije jalahan, uras keluarga hong jalahan te akan baun mije-mije keluarga. Limbah te amon aku maninjok ije keluarga, genep biti huang keluarga te akan baun mije-mije.

¹⁵Palus oloh je inunjok tuntang batantu mingkes kare ramo je ingahana te imapui lepah hayak dengan keluargae tuntang taloh samandiai je ayue; awi ie je malanggar janji tuntang mawi kapapa hai intu bentok ungkup Israel.”

¹⁶Andau jewue, susong hanjewu, Yosua manyoho ungkup Israel miar akan baun, mije-mije suku, palus suku Yuda je buah.

¹⁷Yosua manyoho suku Yuda miar akan baun, mije-mije jalahan, tuntang jalahan Serah je buah. Limbah te jalahan Serah inyoho miar akan baun, mije-mije keluarga, tuntang keluarga Sabdi je buah.

¹⁸Limbah te Yosua manyoho keluarga Sabdi miar akan baun, mije-mije; palus Akhan, anak Karmi, eson Sabdi je buah.

¹⁹Yosua hamauh dengan Akhan, “Anakku, ngaku ih tuntang suman tara-tarang intu hetoh, intu taharep TUHAN, Hatallan Israel, taloh je jari iawim. Suman akangku, ela nyahokae.”

²⁰“Toto,” koan Akhan, “Aku jari mawi dosa taharep TUHAN, Hatallan Israel. Jetoh je iawiku:

²¹Marak kare ramo je irampas itah; aku mite ije kalambar jubah je bahalap toto, tampan Babilonia, kea perak kira-kira due kilogram, tuntang ije kalempeng amas satengah kilo labih. Aku handak toto ramo te, palus induangku tuntang ingaliangku intu huang petak intu kemahku; perake aton intu penda haliai.”

²²Palus Yosua manyoho oloh bajeleng akan kemah Akhan. Kare ramo je ingahana induan te urase aton intu hete, ingalian intu huang petak, tuntang perake aton intu penda haliai.

²³Ewen manduan kare ramo te tuntang mimbite akan Yosua dengan hapus oloh Israel. Palus kare ramo te iandak intu taharep TUHAN.

²⁴Limbah te Yosua dengan hapus ungkup Israel manyingkap Akhan. Ie iimbit akan janah kasusah haya-hayak dengan kakare anake, sapi, kalidai, tabiri, kemah tuntang taloh samandiai je ayue dengan perak, jubah tuntang amas je inakaue.

²⁵Palus koan Yosua dengan Akhan, “Mbuhen ikau mawi kasusah akan itah? Toh TUHAN handak mawi kasusah akam,” Palus Akhan hayak keluarga imedak hapan batu sampai matei awi uras oloh Israel. Uras panataue, tuntang kea kare ramo je inakaue imapui lepah.

²⁶Limbah te ewen manimbok eka te mahapan batu are toto je sampai andau toh magon aton intu hete. Jete bukue eka te magon inyewut Janah Kasusah. Palus kasangit TUHAN te tende.